الفراخ عند التنجار المصريين .. فيها حاجة بتجيب إسهال ومغص .. أغيثونا ..

هم التجار المصريين الجشعين دووول .. عاوزين يعملزا فينا إيه أكتر من كده .. الفراخ وغلوها .. وكل حاجة غلوها .. لكن الجديد بقى .. أننا كل ما نآكل حتة فرخة مسلوقة والله مسلوقة ببصلة وشوية ملح وفلفل اسمر بس وفيها لسان عصفور بس .. يقوم يجيلنا إسهال ومغص وتبقى ليلة مش باين ليها نهار .. يكنش بيحطو لنا فيها سم مع الهرمونات اللي بيحقنوا بيها الفراخ عشان يخلصوا مننا .. طيب لو خلصوا مننا .. مين بقى حيشتري الفراح بتاعتهم .. أنا مقاطعة اللحمة .. طيب أأقاطع الفراخ كمان .. طب ح نآكل إيه بقى .. ربنا ينتقم منهم .. آمين .. وحسبنا الله ونعم الوكيل في أبشع تاجر على مستوى العالم اللي هو التاجر المصري.. هو فيه حد بيحصلوا كده زينا كل ما نآكل حتة فرخة والا احنا اللي محظوظين بس بالراجل بتاع الفراخ اللي تحتنا ..
..

مبارك علينا شهر الخير والبركة إن شاء الله ..

مبارك علينا  شهر الخير والبركة ..إن شاء الله ..
===============================
عن أبي هريرة رضي الله عنه .. أن رسول الله صلى الله عليه وسلم قال: "إذا كان أول ليلة من رمضان صفدت الشياطين ومردة الجن، وغلقت أبواب النار فلم يفتح منها باب، وفتحت أبواب الجنة فلم يغلق منها باب، وينادي منادٍ: يا باغي الخير أقبل، ويا باغي الشر أقصر، ولله عتقاء من النار، وذلك كل ليلة". ويا رب يكون رمضان فاتحة خير و الشياطين تبعد عن التلاميذ وما تغشش في امتحانات الثانوية العامة بقى .. وزي دلوقتي كده حنكون بنحضر للسحور بإذن الله ..
كل عام و حضراتكم بكل خير

( كلمتين بالبلدي ).. طبيب المخ والأعصاب .. وتعب الأعصاب ..

(كلمتين بالبلدي ): طبيب المخ والأعصاب .. وتعب الأعصاب
==================================
بالصدفة البحتة شاهدت برومو لبرنامج على قناة النهار اليوم .. هذا البرنامج يلتقي علماء مصر في الخارج في مختلف التخصصات ومنهم الأطباء .. وحضراتكم تعلمون أن مُعِّدي البرنامج والمخرج يختارون مقتطفات لإذاعتها في هذا البرومو كعامل مساعد على انتشار البرنامج وتوضيح مدى أهميته .. ما لفت نظري في هذا البرومو .. أن أحد الأطباء المصريين الذين يعملون بالخارج .. قال .. لو مصر .. عاوزاني .. تآخد رقبتي .. إلى هذا الحد .. والموضوع عادي .. لكن في اللقطة الثانية لهذا الطبيب .. موجهاً حديثه للمحاور ..قال : إنت بتكلم دكتور مخ وأعصاب مش بتكلم " منجد" .. بمنتهى الأمانة .. كلام هذا الطبيب استفزني .. وجعلني أكلم نفسي وأنا أصرخ وكأن هذا الطبيب أمامي فـ أقول : كان من الأولى يا سعادة طبيب المخ والأعصاب الهمام .. أن تقول المقطع الأول من كلامك .. ولا تقول المقطع الأخير منه .. ولا داعي للإقلال من شأن "المنحد " .. ألا تعرف يا طبيب المخ والأعصاب .. أنه إذا شعر إنسان بالدونية في حالة سماعه تشبيه سعادتك هذا .. فإن لذلك تأثير سئ على خلايا المخ نتيجة ما يُصاب به من حُزن .. وهذا يؤدي إلى تعب أعصابه يا طبيب المخ والأعصاب .. ألا تعلم يا سعادة طبيب المخ والأعصاب .. أن هذا "المنجد" .. أنت في حاجة إليه .. فهو من صنع لك " تنجيد" الـ كنبة التي تجلس عليها الآن وأنت مسترخي وتتباهى بنفسك وبتخصصك .. وهو الذي صنع لك " مراتب" السرير الذي تنام عليه لأخذ قسطاً من الراحة لكي تنتعش ذاكرتك و ترتاح أعصابك يا طبيب المخ والأعصاب .. ثم من الممكن أن يكون هذا الـ " منجد" أكثر إتقاناً لعمله وأكثر إخلاصاً وأكثر رحمة .. من طبيب مخ وأعصاب يأخذ من مهنته الطبية تجارة للربح المادي ..خاصة في هذا العصر الذي تحول فيه الطب إلى تجارة .. ومن الممكن أن هذا "المنجد" .. لم يذهب بعيداً عن مصر وطنه الأم و استقرفيها وظل بها لكي يخدم أبناء بلده .. بينما سعادتك ذهبت لبلاد الـ " فرنجة " لكي تخدم أبناءهم هناك ولا تستقر في وطنك لكي تخدم أبناء بلدك .. ألا تعلم أن مثل هذه الثقافة التي تحدثت بها سعادتك .. وتعاليت بها على صاحب مهنة لإنسان أراد له الله أن يمتهنها من أجل خدمة البشرية .. هي فعلاً سرِّ تخلفنا كـ أمة .. وسأقول لسعادتك مثالاً عايشته أنا بنفسي ..على طبيب مخ وأعصاب ..كان يأخذ من مهنته مجرد عملية تجارية وفقط .. و المثال هو .. كانت والدتي الله يشفيها .. بـ تتعالج عند طبيب مخ وأعصاب مشهور جداً في القاهرة بل كان طبيب مصر الأول في هذا التخصص حينئذٍ " الله يرحمه " بقى .. كان هذا الطبيب يقوم بـ " رص" المرضى في حجرة بعيدة عن حجرته التي يجلس فيها ليستقبل فيها من يشاء .. على حساب المرضى من عامة الشعب .. مع أن هؤلاء العامة هم سبب ثروته نتيجة الـ " هبش" اللي بـ " يهبشه " منهم .. ثم يأتي يمر عليهم كما لو أنه مفتش في الإتوبيس .. ويسأل كل مربض أو مريضة سؤال في ثانية .. ثم يكتب الدواء بسرعة البرق .. ويذهب لغرفته التي فيها شخصية مرموقة آنذاك وحولها علامات استفهام .. ولا داعي لذكر أكثر من ذلك لأن أخلاقياتي تمنعني .. وكل القصص معروفة في مصر .. وعلى فكرة في هذا الموقف بالذات .. لي أخ شقيق حُر الأخلاقيات والمبادئ يعمل طبيباً بيطرياً .. قام بفضح أمره في هذا اليوم أمام كل المرضى .. ولم نعد نذهب إليه بعد ذلك .. مع ملاحظة أنه في كثير من المرات كان يُرسل طبيباً مبتدئاً للكشف على المرضى بينما يتفرغ هو لزيارات مكتبه الخاص المشبوهة وجمع الفلوس .. يا سعادة طبيب المخ والأعصاب .. إذا كانت هذه هي نظرة سعادتك لأصحاب المهن الآخرى .. فـ فعلاً .. لك الله يا مصر .. ولو أنا صاحبة قرار .. سأقول لسعادتك .. شكراً .. على تقديم عرضك لخدمة مصر..وخليك في بلاد الـ " فرنجة " .. فلا تأتي .. لأن احتمال هذا المنجد البسيط يأتي لكي يقوم بالعلاج عندك .. فبالطبع ستتعامل معه بتعالي .. وربما لاتأخذ بالك أنت بـ تصرف له أي نوع من الدواء .. ما هو " منجد" .. بقى !!!!
--------------------------
د. شهيرة عبد الهادي 

من تجربتي الخاصة ....

من تجربتي الخاصة مع مرض ماما الفترة اللي فاتت .. بالنسبة لمرض الفشل الكبدي ودوالي المريء والمعدة والقرح في الجهاز الهضمي شفاها الله وعافاها هي وكل مرضى العالم .. بـ أقول لحضراتكم المعلومات التالية .. والتي كتبها الطبيب المعالج بالنسبة للأكل المناسب لهذه النوعية من الأمراض.. وقبل ما تآخدوا بيها بعيد الشر عنكم يا رب ..يجب استشارة الطبيب المعالج ..
-----------------------------------------
1- الأكل المسموح بيه .. هو.. كل أنواع الخضار واللون الأخضر عموماً والرز والشعرية والمكرونة وبدون ملح أو الإقلال من الملح جداً ويكون ني في ني أو مسلوق و ممكن إضافة نقط من زيت الذرة .. وبالنسبة للفواكه ودي جديدة بصراحة بالنسبة لي ..هي.. الاقتصار على مشروب عصير المانجو وعصير الرمان وعصير الفراولة بشرط يكون مخفف جداً جداً جداً وكمان شريحة واحدة من البطيخ وشريحة واحدة من الأناناس وممكن شريحة من التفاح .. وأكل الجبنة القريش فقط .. والإكثار من العسل الأبيض لدرجة ممكن شربه .. وبالنسبة للمشروبات : كل انواع المشروبات العادية زي اليانسون والحلبة والنعناع ووو................ إلخ ..
2- والأكل الممنوع .. هو.. كل الحوادق والمخلل والفسيخ والسردين والبيض والألبان الدسمة والجبن الرومي وأنواع الأجبان الآحرى والتونة والسردين والسمين والمسبك والطمام تكون بمعدل طمطماية واحدة في اليوم .. وكل أنواع المحشي .. وبالنسبة للفاكهة ممنوع البرتقال البلدي والخوخ والمشمش والبرقوق .. وكمان ممنوع كل أنواع المياه الغازية والقهوة ومشتقاتها والتدخين بكل أنواعه ..
ويا رب يكتب لماما ولنا ولحضراتكم الصحة والعافية .... ولا تنسى استشارة الطبيب المعالج ..

في الجمعة الأخيرة من شعبان .. يا رب يا رب يا رب ..

إنها الجمعة الأخيرة من شعبان يارب..
قال سيد الخلق صلى الله عليه وسلم ..ما من يوم جمعة إالا وفيه ساعة إجابة فادعوا معى لعلها تكون الساعة ..اللهى يا الله أشهد أنه لا رب غيرك ولا معبود سواك ولايجيب الدعاء إلا انت فأنت القريب المجيب الرءوف الرحيم أسالك أن تحقق فيك رجائى أنا المفتقر المحتاج لرحمتك وعفوك وغفرانك ومنتك كما رحمت وعفوت وغفرت ومننت على عبادك الصالحين يارب الأولين والآخرين وملجأ المحتاجين ورجاء السائلين ..فياربى كما أسعدت قوماً بعبادتك أسعدنى بعبادنك والتوجه إليك والإقبال عليك واكنبنى عندك من المقبولين المرحومين المرضيُ عنهم والمرضيين ولا تسوءنى فى نفسى ولا جسدى ولا روحى ولا عزيز لى ياربى يا من لايُرد من توجه إليه ودعاه ولا يخيب من رجاه .. ربى أسالك العافية من كل داء واجعل الابتلاء بقدر المقدرة واحتسبنا يامولانا من عبادك الصابرين ولاتحرمنا ثوابهم .. وصل اللهم على سيدنا محمد عبدك ورسولك وعلى آله وصحبه وسلم ..

هل نحن في حاجة ماسة الآن إلى ضرورة توعية المرأة المصرية بأضرار الغش على المجتمع ..

هل نحن في حاجة ماسة الآن إلى ضرورة توعية المرأة المصرية بأضرار الغش في الامتحانات على المجتمع ..
-------------------------------------------------------------------
إن قيمة المرأة في الإسلام عظيمة .. فـ المرأة ..عندما تكون إبنة .. فـ إنها تفتح باباً من الجنة لأبيها .. و عندما تكون زوجة .. فـ إنها تُكمل نصف دين زوجها .. و عندما تكون أماً ... فإن الجنة تحت أقدامها .. لو عرف كل شخص مكانة المرأة الحقيقية في الإسلام .. !!! .. لصاروا يتنافسون فى رعايتهم لها .. فهل وعى المجتمع لذلك .. وفي ظل مهرجان الغش للجميع السائد في المدارس والجامعات المصرية .. هل نحن في حاجة ماسة الآن إلى ضرورة توعية المرأة المصرية بأضرار الغش في الامتحانات على المجتمع ؟.. حتى تغرس في نفوس أبنائها .. من غشنا فليس منا .. للأمانة وليس من باب التحيز.. فـ إن المرأة المصرية من أكثر السيدات كفاحاً .. وهن جواهر وورود ولآليء المجتمع المصري .. لكن مسؤليتها كبيرة في هذه الجزئية ..
------------------------------------------------
د.شهيرة عبد الهادي
Drshahera Abd Elhady Ibrahem

شوفوا الغش بيبدأ منين ..........

إضحكوا معايا أو عليَّ شوية .. شوفوا الغش بيبدأ منين .. خلاص رفعت الراية البيضاء
===============================================
بقالي مُدة عمَّالة أتكلم عن الغش في التعليم المصري .. يقوم ربنا يبعت لي مثال .. إزاي بيتربى الغش في نفوس الأطفال من الصغر .. هو إيه بقى .. وأنا خارجة من أسانسير أحد المولات .. كان معايا أكياس .. لقيت طفل صغير طولة كده ميجيش 10 سنتيمتر .. هجم عليَّ .. فعلاً هجوم .. وقال لي.. هاتي أما أشيل لك الأكياس وأوصلك للحتة اللي انت عاوزاها يا حاجة .. صعب عليَّ الطفل .. وقلت له .. لأ يا حبيبي .. فهو ألَّح عليّ .. وآخدين بالكوا .. ألَّح .... فخليته شال كيسين وأنا شلت الكيس الكبير .. وأنا ماشية معاه وماسكة فيه وخايفة عليه .. سألته .. إنت في مدرسة يا بابا .. رد وقال .. لأ.. أنا مش في المدرسة .. وبعدين استرسل واستطرد في الكلام وقالي .. أنا أمي رجلها مقطوعة وقاعدة في البيت ..ولو كانت رجلها مش مقطوعة كانت خرجت واشتعلت وجابت لنا فلوس.. فصعب عليَّ أكتر .. وبعدين قال .. وأمي قالت لي .. روح المول .. وكل واحد نازل من الأسانسير شيل له الأكياس .. وأمي حتحوش الفلوس دي ..عشان تجيب لي هدوم ..وأعرف أروح بيها المدرسة.. أصل انا في سنة تانية إبتدائي .. واخدين بالكوا طلع أنه في المدرسة .. وكمان حتشتري لي بالفلوس دي هدوم دلوقتي عشان عيد رمضان.. وكل شوية يصعب عليَّ أكتر ..لأنه طفل صغير .. الولد جه معايا وبعد ما وصلني .. إديته اللي فيه النصيب .. وانا بارتب الشنط عشان أحطها في العربية .. وبأمانة .. بابص فجأة وبالصدفة .. لقيت الولد بيدي لأمه وأبوه الفلوس .. وأمه رجلها مش مفطوعة ولا حاجة .. أمه وأبوه مين بقى .. أمه وأبوه هم أصجاب المرجيحة اللي قدام المول .. وقام رايح تاني جري على أسانسير المول ..عشان يعيد الموال أو الفيلم من تاني .. شوفتوا بقى الغش بيتكون ازاي عند أطفال مصر .. بس أنا قعدت أضحك على نقسي والله .. وأأقول لنفسي .. وانت عمالة تكتبي وتتكلمي عن الغش يا بنتي كل شوية .. خلاص بقى يا بنتي ارفعي الراية البيضاء واسكتي .. الملخص : طفل ودي مأساة ..وكذب وده حرام ..وغش وده أكبر حرام .. ونصب ودي مصيبة ..وهدم لإنسان ودي مصيبة تانية ..وهدم لكيان بلد بيهدمه أهله من عامة الشعب ودي المصيبة الأكبر ..
------------------------------------------
د.شهيرة عبد الهادب
Drshahera Abd Elhady Ibrahem

إحنا اللي حنعبي اليورانيوم في إزازة .....

بلد التعليم فيها كله غش في غش .. وعاوزة تبقى من الدول المتقدمة .. طب ازاي .. حنروح نضرب التقدم .. ونقول له إحنا متقدمين يا ابن الكلب .. طب وحنعمل المفاعل النووي ازاي .. والنبي أنا خايفة .. يغشوا في اليورانيوم .. والراجل اللي واقف على باب المفاعل .. يقول للي داخل .. هات عشرة جنيه واديك شوية يورانيوم مشع درجة أولى .. ما  اهو  احنا  اللي حنعبي اليورانيوم في إزازة .. جاي جاي جاي .. إنقذوا التعليم في مصر يا مسؤولين عنه ..
=======================
د.شهيرة عبد الهادي Drshahera Abd Elhady Ibrahem

صدق أو لا تُصدق ( 2 ) ..

صدق أو لا تصدق
================
لما الدكتور يمسك طالب بيغش في الامتحان ويعمل له محضر غش .. عشان العملية .. يعني .. تتقنن شوية .. في مهرجان الغش اللي احنا عايشين فيه ده .. فيقوم الطالب عامل تمثيلية رخيصة .. ويروح لأي مسؤول .. يقوم المسؤول ده .. يقول للطالب اللي غش ده ..اللي غش .. واخدين بالكوا ..اللي غش وممسوك بأداة الغش .. إعمل شكوى في الدكتور .. ليه بقى .. عشان تبقى شكوى قدام شكوى .. ويقعد الطالب يكتب شكوى ويفتري فيها على الدكتور ويقول عليه ما قال مالك في الخمر وحصل منه وحصل منه وحصل منه داخل اللجنة وكمان يجيب شوية طلبة يوقعوا معاه - وهم على ضلال - على الشكوى دي .. والقضية تضيع .. والمحضر يتلغى .. والمسؤول يدنوا قاعد على كرسيه .. ما هو أهم حاجة الكرسي .. أو أنه يصل لكرسي تاني .. لأن الطالب ده .. ح يقول بقى .. أن المسؤول هو اللي أنفذني .. وفعلاً الطلاب بتقول كده ..أن المسؤول بيهمه مصلحة الطالب وهو بيقف في صف الطالب .. مع أنه طالب " غشاش " .. و بكده .. المسؤول يدنوا قاعد على كرسيه... شوفتوش مصيبة أكتر من كده بقى .. يا ناس يا عالم يا هوو . عاوزين قوانين يتم تفعيلها .. وإلا الجامعة حتبقى زي مدارس التعليم الفني والثانوي والإعدادي .. وبكده مصر ستعاني أكثر وأكثر .. يا مسؤولين في كل مكان إنقذوا التعليم في مصر .. جاي جاي جاي ..
==================================
د.شهيرة عبد الهادي
Drshahera Abd Elhady Ibrahe

التعليق ده كتبه مربي فاضل .. حول .. موضوع الغش في الامتحانات المصرية ..

التعليق ده من التعليقات التي كتبها مربي فاضل في التربية والتعليم .. عن موضوع الغش في الامتحانات .. داخل بلدي مصر .. ولما قرأت هذا التعليق .. إنتابني حزن أكثر مما أنا فيه .. السؤال بقى .. امتى إحنا نقدر نقضي على هذه الظاهرة .. لأن واضح أن الغش في الامتحانات انتقل إلى كل شيء في مصر .. وأصبح الغش منهج حياة وثقافة سائدة .. والتعليق أهوو " علاء الدين
علاء الدين
دكتورة انزلى تحت شوية وشوفى اللى بيحصل فى امتحانات الثانوية العامة فى بعض المحافظات اولياء الامور بيمروا على اللجان بالميكروفون وبيغششوا الطلبة من الشوارع المجاورة للمدرسة ولما رئيس اللجنة بيتصل بالشرطة والشرطة بتكون واقفة والراجل واقف جنب عربية البوليس وماسك الميكروفون لانهم اقرباء ومن بلد واحدة وفى اخر الامتحانات الملاحظين ورئيس اللجنة بيروحوا بلدهم فى حراسة الشرطة .. ضيفى على ذلك طالب فى مدرسة الحضرة الاعدادية بنين دخل اللجنة وكان قاعد وحاطط المطوة على الدسك وعلبة السجاير وفاتح الكتاب وبيغش امام الملاحظين ورئيس اللجنة .. اخيرا فى مدرسة الورديان الاعدادية بنين الملاحظ منع الطالب من الغش فغضب الطالب ثم ترك اللجنة ونط من على السور وبعد نصف ساعة عاد ومعة عدة بلطجية ونطوا من عى السور ايضا واقتحموا المدرسة وندمعهم السيوف والسنج والسكاكين فاختبأ المدرسين وتركوا اللجان وحبسوا نفسهم فى حجرة وقفلوا على انفسهم لحين تدحل الشرطة ولما حضرت الشرطة اكملو الامتحانات عادى جدا وكأن شىء لم يحدث ...هذا هو حال التعليم فى مراحل ما قبل الجامعة يبقى سؤال واحد من الذى اوصلنا الى هذاالحد ...؟ اشكرك على طرح الموضوع ومستعد للتعاون معك بأى صورة لايجاد الحلول الموضوعية "
====================================
د.شهيرة عبد الهادي
Drshahera Abd Elhady Ibrahe

( مكتوبة على توك توك مصري .. واللي صورها مصري .. ) من الثقافة التوكتوكية لبعض من الشعب المصري ..

رسالة إلى رئيس الجمهورية .. إنقذ التعليم في مصر يا سيسي ...

رسالة إلى رئيس الجمهورية الخلوق .. إنقذ التعليم في مصر يا سيسي ..
==========================================
لن أطيل على سعادتكم .. وأتمنى أن تصل رسالتي إلى سعادتكم .. وأنا أكتب بالتفصيل ويومياً على صفحتي المتواضعة عن فساد الغش في التعليم الجامعي .. إن الحال قد وصلت إلى حد يفوق بل فاق كل الحدود .. و رسالتي هي .. بعد الانفلات الأخلاقي غير المسبوق لبعض أو غالبية الطلاب والطالبات في الجامغات المصرية .. ومحاولاتهم الغش في الامتحانات بالإكراه بل بالإرهاب.. ولا أبالع أن قلت : أن الغش قد أخذ شكل عصابات ممنهجة الآن .. تستخدم كل الأساليب غير الأخلاقية التي تجعلها تغش .. لدرحة التعدي بالضرب والسباب على بعض أعضاء هيئة التدريس والملاحظين ومنهم مِنْ هن .. من السيدات للأسف الشديد .. وهذا يحدث من طلاب وطالبات الدرجة الجامعية الإولى "درجتي البكالوريوس والليسانس " .. أما الطامة الكبرى فهو إنه يحدث وبنفس الكيفية وعلى صور أبشع من جانب "غالبية أو كل طلاب الدبلوم العامة " .. وهؤلاء الطلاب من المفترض أنهم قد جاءوا برغبتهم .. من أجل التأهيل للعمل كمعلمين وتربويين أو لاستكمال طريق الدراسات العليا .. فكيف يعمل هذا في مكان ما بمصر بعد ذلك .. وهو قد حصل على مؤهله بالغش والإرهاب والقوة الجبرية والتحايل على كل القوانين .. بالإضافة إلى أن الغش يحدث أيضاَ من بعض طلاب الدبلوم المهنية والدبلوم الخاصة .. ناهيك عن السرقات العلمية في الماجستير والدكتوراه .. ولقد أصبحت الماجستير والدكتوراة الآن لا تساوي ثمن الحبر المكتوبة به .. خاصة بعد تطبيق نظام الساعات المعتمدة في الدراسات العليا في مصر.. هذا بالإضافة إلى فساد التعليم المفتوح الذي يُنتج للمجتمع أناساً أميين على درجة فاقت كل الحدود من الانفلات الأخلاقي .. إن مليارات من الجنيهات المصرية يتم صرفها على الدراسات العليا في مصر بداية من الدبلوم العامة مروراً بالدبلوم المهنية والخاصة والماجستير والدكتوراة وما بعدهم .. والعائد إنفلات خلقي وعلمي وفساد علمي غير مسبوق .. نستغيث بسعادتكم يا رئيسنا الخلوق ونقول .. جاي جاي جاي .. إنقذ التعليم في مصر يا سيسي .. بقوانين رادعة قوية مُفَّعلة تعاقب الطالب الغشاش والطالبة الغشاشة .. حتى يعود للتعليم المصري هيبته ولعضو هيئة التدريس في الجامعة هيبته ..
---------------------------------
د.شهيرة عبد الهادي
Drshahera Abd Elhady Ibrahem

صدق أو لا تُصدق ( 1 )..

صدق أو لا تصدق ..
=============
هذه واقعة حقيقية حدثت بالفعل .. حاولت زوجة أخي .. التحدث مع بعض أمهات زميلات إبنتها .. للقيام بعمل حملة لمحاربة الغش في المدارس .. مش حتصدق رد فعلهم كان إيه .. كان .. أنهم عاوزين ولادهم يغشوا في الإمتحانات ويجيبوا مجموع كبير زي اللي كل الولاد اللي بتغش بتجيبوا ..عشان عيالهم لما ما بتغشش ما بتجبش مجموع كبير يدخلهم اللي هم عاوزينه !!!! .. على فكرة غالبية الأمهات دووول .. فيهم المسلمة وفيهم المسيحية وفيهم المحجبة وفيهم غير المحجبة وفيهم المختمرة وفيهم المنتقبة ..وفيهم اللي بيحفظوا قرآن مع بعض في المسجد .. يعني مصيبة سودة .. ازدواجية ما بعدها ازدواجية .. جاي جاي جاي .. من الغش اللي انتشر في مصر .. معقولة الحال وصلت لكده .. طيب يعني احنا عاوزين نعلم الأب والأم من اول وجديد ان الغش حرام .. يا نهار لبني .. يا عالم يا اهوو .. مش احنا متعلمين في المسجد وفي الكنيسة أن الغش حرام .. جاي جاي جاي ..
============================
د.شهيرة عبد الهادي
Drshahera Abd Elhady Ibrahe

حكمة علقت على باب معبد الوفاء من قبل سبعة الاف عام ..

إذا كنتِ تتمني أن تعيشِ مائة عام،
فإنني أتمني أن أعيش مائة عام تنقص يوماً واحداً
كي لا أضطر للعيش بدونك.
حكمة علقت على باب معبد الوفاء من قبل سبعة الاف عام
-------------------------------------
من منشورات الأستاذ طارق ابو علفا

رسالة إلى رئيس الجمهورية الخلوق .. إنقذ التعليم في مصر يا سيسي ..

رسالة إلى رئيس الجمهورية الخلوق .. إنقذ التعليم في مصر يا سيسي ..
==========================================
لن أطيل على سعادتكم .. وأتمنى أن تصل رسالتي إلى سعادتكم .. وأنا أكتب بالتفصيل ويومياً على صفحتي المتواضعة عن فساد الغش في التعليم الجامعي .. إن الحال قد وصلت إلى حد يفوق بل فاق كل الحدود .. و رسالتي هي .. بعد الانفلات الأخلاقي غير المسبوق لبعض أو غالبية الطلاب والطالبات في الجامغات المصرية .. ومحاولاتهم الغش في الامتحانات بالإكراه بل بالإرهاب.. ولا ابالع أن قلت : أن الغش قد أخذ شكل عصابات ممنهجة الآن .. تستخدم كل الأساليب غير الأخلاقية التي تجعلها تغش .. لدرحة التعدي بالضرب والسباب على بعض أعضاء هيئة التدريس ومن السيدات للأسف الشديد .. وهذا يحدث من طلاب وطالبات الدرجة الجامعية الإولى "درجتي البكالوريوس والليسانس " .. أما الطامة الكبرى فهو إنه يحدث وبنفس الكيفية وعلى صور أبشع من جانب "غالبية أو كل طلاب الدبلوم العامة " .. وهؤلاء الطلاب من المفترض أنهم قد جاءوا من أجل التأهيل للعمل كمعلمين وتربويين أو لاستكمال طريق الدراسات العليا .. فكيف يعمل هذا في مكان ما بمصر وهو قد حصل على مؤهله بالغش والإرهاب والقوة الجبرية والتحايل على كل القوانين .. بالإضافة إلى أن الغش يحدث أيضاَ من بعض طلاب الدبلوم المهنية والدبلوم الخاصة .. ناهيك عن السرقات العلمية في الماجستير والدكتوراه .. ولقد أصبحت الماجستير والدكتوراة الآن لا تساوي ثمن الحبر المكتوبة به .. خاصة بعد تطبيق نظام الساعات المعتمدة في الدراسات العليا في مصر .. إن مليارات من الجنيهات المصرية يتم صرفها على الدراسات العليا في مصر بداية من الدبلوم العامة مروراً بالدبلوم المهنية والخاصة والماجستير والدكتوراة وما بعدهم .. والعائد إنفلات خلقي وعلمي وفساد علمي غير مسبوق .. نستغيث بسعادتكم يا رئيسنا الخلوق ونقول .. جاي جاي جاي .. إنقذ التعليم في مصر يا سيسي .. بقوانين رادعة قوية مفعلة تعاقب الطالب الغشاش والطالبة الغشاشة ..  حتى يعود للتعليم المصري هيبته ولعضو هيئة التدريس في الجامعة هيبته ..
---------------------------------
د.شهيرة عبد الهادي
Drshahera Abd Elhady Ibrahem

وبدأت ظاهرة الغش في الامتحاناتت المصرية مع هذا العهد .. بقلم د.شهيرة عبد الهادي

بدأ الغش في الامتحانات وقلة الأدب والسفالة والوقاحة والانحطاط والتردي والرداءة والجرأة من التلاميذ على المعلم مغ بداية السبعينيات .. مع الانفتاح السداح مداح ..ومع مدرسة المشاغبين .. ومع السماح للإخوان والسلفيين بممارسة أنشطتهم في كل سنتيمتر في مصر.. ومع رئيس الله يرحمه بقى ..جاب مذيعة الله يرحمها هي كمان ..وقعدها قدامه في التليفزيون وطول ما هو بيكلمها في البرنامج ..وهو بيقول لها يا بنتي يا بنتي يا بنتي .. والباقي حضراتكم عارفينه بقى .. والنتيجة أن بقت الحياة كلها كدب في كدب .. وأن مبقاش فيه حد بيعرف يتكلم كلمتين عربي على بعض في مصر .. حتى اللي متخرج من كليات اللغة العربية .. ومبقاش فيه تعليم في مصر.. وتم تجهيل الناس .. وحصروا كل شيء في جلابية قصيرة ولحية طويلة وفي حجاب ونقاب .. وكلهم بيغشوا .. وبقى فيه تطرف وإرهاب .. والتعليم كله غش في غش في غش .. جاي جاي جاي .. الغش كدب الغش كدب .. مش رسولنا قال كده ولا إيه .. الكدب بيؤدي للفتنة والفساد والقتل .. مش رسولنا قال كده يا ناس يا عالم يا اهو ولا إيه .. تسرق .. ممكن .. تزني .. ممكن .. تكدب .. لأ .. لأن الكدب فساد .. والغش كدب وسرقة وفتنة .. يعني فساد ..
-----------------------------
د.شهيرة عبد الهادي

الغش في الامتحانات المصرية وبلاويه (1)

لما المعلمين في المدارس .. يحطوا ورق المادة ..اللي الطلاب بيمتحنوا فيها .. في الحمام بتاع المدرسة .. عشان النلاميذ اللي كانوا بيآخدوا عندهم درس خصوصي أو درس لصوصي .. يقولوا للملاحظ : عاوزين نروح الحمام إحنا مزنوقين .. و يروحوا الحمام يغشوا ويرجعوا تاني .. ده يبقى اسمه إيه ؟.. على فكرة دي واقعة حقيقية .. لأن إبن أخويا اللي قالها لي .. وهو رفض يغش بالإسلوب ده .. و كانت النتيجة .. أنه جاب مجموع أقل من زملائه اللي غشوا في الحمام .. لأن كانت والدته بتعلموا علطول أن الغش حرام .. فلما راح ثانوي غير عقيدته وقال الدنيا كلها بتغش .. شوفتوا يا منعدمي الضمير يا اللي بنعلموا التلاميذ تغش في الحمام .. إنتوا بتعملوا إيه في الأجيال .. بتدمروهم وبتحولوهم لكائنات غشاشة .. على فكرة إبن أخويا ده كان في مدرسة خاصة .. فما بالك بالمدارس الحكومية .. منكم لله .. يا منعدمي الضمير .. ربنا ينتقم منكم .. شوفتوا إنتوا بتدمروا البلد إزاي يا حرامية يا لصوص .. وعلى فكرة ده بيحصل في الجامعة بردوو .. الله ينتقم منكم كلكم ..
----------------------------------------------------
د.شهيرةة عبد الهادي

مصر.. الحضارة والتاريخ والأ.صالة ..... بقلم د.شهيرة عبد الهادي

مصر  الجميلة .. تحبها  كل عين جميلة..
مصر الحضارة .. تحافظ عليها كل إيد أصيلة..
مصر التاريخ .. تحميها كل عقول م التزوير بريئة..
مصر  الأصالة ..تبنيها ثوابت  شعب  متماسك له عقيدة  ..
والعقيدة .. هي .. مصر .. مصر الحضارة والتاريخ والأصالة  المجيدة..
---------------------------
د.شهيرة عبد الهادي

.من زهور الإمامين .. مالك والشافعي..

رائعه وأكثر من رائعه
إختلف الإمامان الجليلان مالك والشافعي رضي الله عنهما ...
فالإمام مالك يقول أن الرزق بلا سبب بل لمجرد التوكل الصحيح على الله يرزق الانسان مستنداً للحديث الشريف :-

( لو توكلتم على الله حق توكله لرزقكم كما يرزق الطير تغدو خماصا وتروح بطانا ) .
أما إمامنا الجليل الشافعي فيخالفه في ذلك فيقول لولا غدوها ورواحها ما رزقت .
أي إنه لا بد من السعي .
- وكل على رأيه ....
فإمامنا مالك وقف عند :
( لرزقكم كما يرزق الطير )
وتلميذه الشافعي قال :
لولا الغدو والرواح لما رزقت .
فأراد التلميذ أن يثبت لإستاذه صحة قوله فخرج من عنده مهموما يفكر ، فوجد رجلا عجوزا يحمل كيسا من البلح وهو ثقيل فقال له : -
أحمله عنك يا عماه وحمله عنه فلما وصل إلى بيت الرجل أعطاه الرجل بضع تمرات إستحسانا منه لما فعله معه .. هنا ثارت نفس الشافعي وقال :
الآن أثبت ما أقول فلولا أني حملته عنه ما أعطاني وأسرع إلى أستاذه مالك ومعه التمرات ووضعها بين يديه وحكى له ماجرى .. وهنا إبتسم الإمام الرائع مالك وأخذ تمرة ووضعها في فيه وقال له :
وأنت سقت إلي رزقي دونما تعب مني .
فالإمامان الجليلان إستنبطا من نفس الحديث حكمين مختلفين تماما وهذا من سعة رحمة الله بالناس .
هي ليست دعوة للتواكل لذا سألحقها بقصة جميلة عن إبراهيم بن أدهم ..
فيحكى أنه كان في سفر له وكان تاجرا كبيرا .
وفي الطريق وجد طائرا قد كسر جناحه فأوقف القافلة وقال :- والله لأنظرن من ياتي له بطعامه أم أنه سيموت فوقف مليا .
فاذا بطائر يأتي ويضع فمه في فم الطائر المريض ويطعمه ..!!!
هنا قرر إبراهيم أن يترك كل تجارته ويجلس متعبدا بعد مارأى من كرم الله ورزقه فسمع الشبلي بهذا فجاءه وقال :- ماذا حدث لتترك تجارتك وتجلس في بيتك هكذا ..؟
فقص عليه ما كان من أمر الطائر فقال الشبلي قولته الخالدة :-
يا إبراهيم لم إخترت أن تكون الطائر الضعيف ولم تختر أن تكون من يطعمه ..؟؟؟
ولعله يقول في نفسه حديث الرسول صلى الله عليه وسلم :-
( المؤمن القوي خير وأحب إلى الله من المؤمن الضعيف ) .
يا الله على هذا الفهم الرائع والإستيعاب للرأي الآخر إذا كان له مسوغ شرعي .
الخلاصة: هنالك أرزاق بلا سبب فضلاً من الله ونعمة
وهنالك أرزاق بأسباب لا بد من بذلها.
أعجبتني فربما تعجبكم🍂

بــ احب ..لا هو عيب .. ولا حرام ..

<3 بأحب .. لا هو عيب .. و لا حرام <  3
<3 بأحب أسمع الشيخ الشعراوي و كمان أحب أسمع تشايكوفسكي ... لا هو حرام و لا عيب ...
<3
بأحب أقرأ للإمام محمد الغزالي و كمان أحب أقرأ لتشيكوف ... لا هو حرام و لا عيب ...

<3
بأحب أقرأ للشيخ سيد سابق و كمان أحب أقرأ للدكتور يوسف إدريس ... لا هو حرام و لا عيب ...
<3
بأحب أشوف إبداع الخلق في ورقة الشجرة و كمان أحب أشوف إبداع خالق الخلق في لوحات رينوار و سيف وانلي ... لا هو حرام و لا عيب ...
<3
بأحب أسمع إبتهالات الشيخ سيد النقشبندي و كمان أحب أسمع أوبرا عايدة ... لا هو حرام و لا عيب ...
<3
بأحب أقرأ في سيرة الصحابة و كمان أحب أقرأ في سيرة رجال الوطنية المصرية ... لا هو حرام و لا عيب ...
<3
بأحب أفطر في رمضان علي صوت أذان الشيخ محمد رفعت و كمان أحب أسهر علي قهوة في سيدنا الحسين ... لا هو حرام و لا عيب ...
<3
بأحب أسامة إبن زيد و كمان بأحب سعد الدين الشاذلي و فؤاد غالي ... لا هو حرام و لا عيب ...
 <3
بأحب أشوف فيلم فجر الإسلام و كمان أحب أشوف فيلم رصيف نمره خمسة ... لا هو حرام و لا عيب ...
<3
بأحب الملاية اللف للست المصرية القديمة و كمان بأحب موضة إيف سان لوران ... لا هو حرام و لا عيب ...
<3
بأحب الملكة حتشبسوت و كمان بأحب درية شفيق ... لا هو حرام و لا عيب ...

<3 بأحب الحاج حسين عبد الله اللي علمني أصول تجويد القرآن و بأحب عم لويس الخطاط إللي كان لازم
يصوم معانا يوم في رمضان ... لا هو حرام و لا عيب ... <3   

أنا مخلوق معجون بدين و حضارة و تاريخ ... عشان كده أنا "مصــري" ...

<3 مشكلتك إنك مش قادر تبقي "مصــري" .. عشان كده عاوز تدمر "مصــري" ...

<3 لو سمحت لك تدمر "مصــري" .. يبقي هو ده "الحرام" .. و هو ده "العيب" ... <3

-----------------------------

مؤنس زهيري

سبع البرمبة اللي جه

امبارح في الشارع بتاعنا .. كان فيه .. سبوع طفل .. أهله .. عمالين مشغلين .. أغنية الحفيد بتاعة عبد المنعم مدبولي في مكبرات صوت عالية جداً ودق الهون و زغاريط و شماريخ وضرب نار في الهواء.. وسبوع اتكلف آلاف مؤلفة .. والناس تتوحوح وتشتكي وتقول ممعناش فلوس .. محدش قال .. الناس متفرحش .. بس مش لدرجة الإزعاج ده لغاية الساعة 2 بالليل .. وهم عمالين يضربوا نار عشان سبع البرمبة اللي جه .. وكل ده و في نفس الشارع ..محل مشغل قرآن واللي جمبه مشغل أم كلثوم واللي بعد اللي جميه مشغل حمؤه بتاع الدخيلة.. احنا من تدهور لتدهور .. إحنا من انحطاط في الذوق العام لانحطاط تاني وتاني وتالت في السلوكيات وفي الذوق العام ..
------------------
د.شهيرة عبدالهادي
+DrShahera abdelhady 

حُلم......

حُلم ........
=======
أحلم أن الفراق يتركني . .و أن الحزن يفارقني .. يأتي الحُب يُصادقني ..يتحدث الود ُيقاربني.. يسمع الحنين و يرحمني .. يشدو الفرح يُلازمني .. وحروف السعادة تكتبني .. وتفارق الدموع سهر عيني .. أحُلم ..
------------
د.شهيرة عبد الهادي

مفقودات ... لـ أحمد مطر

مفقـــــــودات
ـــــــــــــــــــــــــــــــــــــــــ
زارَ الرئيسُ المؤْتَمَنْ
بعضَ ولاياتِ الوطنْ
وحينَ زارَ حيَّنا
قالَ لنا :
هاتوا شكْواكُمْ بصدْقٍ في العلَنْ
ولا تخافُوا أحَدا
فقدْ مضى ذاكَ الزمنْ

فقال صاحبي حسنْ :
يا سيِّدي؛
أينَ الرَّغيفُ واللبنْ؟
وأين تأمينُ السكَنْ؟
وأينَ منْ
يوفِّرُ الدَّوَاءَ للفقيرِ دونَمَا ثمنْ؟
لمْ نرَ من ذلكَ شيئًا أبدَا
قال الرئيسُ في حَزَنْ :
أحْرَقَ ربِّي جسدي
أَكُلُّ هذا حاصِلٌ في بلدي ؟
شكرًا على صدقِك في تنبيهِنَا يا ولدي
سوفَ ترى الخيرَ غدَا
وبعدَ عامٍ زارَنا
ومرةً ثانيةً قال لنا :
هاتوا شكْواكُمْ بصدْقٍ في العلَنْ
ولا تخافُوا أحَدا
فقدْ مضى ذاكَ الزمنْ
لمْ يشْتَكِ الناسُ
فقلتُ مُعْلنًا:
أينَ الرَّغيفُ واللبنْ؟
وأين تأمينُ السكَنْ؟
وأينَ توفيرُ المِهَنْ؟
وأينَ منْ
يوفِّرُ الدواءَ للفقيرِ دونَمَا ثمنْ؟
معذرةً يا سيدي
....... وأينَ صاحبي حسنْ ؟ ؟ ؟ ؟
* * * * * *
أحمد مطر

(كلمتين بالبلدي ) .. والله لو جه للبلد دي 20 سيسي ما حيقدر يعمل حاجة لوحده ما دمنا على هذه الدرجة من الفساد ..

(كلمتين بالبلدي) .. والله لو جه للبلد دي 20 سيسي ما حيقدر يعمل حاجة لوحده طول ما احنا فاسدين كده ..
=============================================================
اللي يحب البلد دي لازم يعترف بالأخطاء الموجودة ويلفت النظر ليها عشان يمكن المسؤولين يقدروا يصلحوها .. لأن لو التعليم استمر بالمهزلة اللي هو فيها دي مش حينصلح حالنا .. وعشان كده .. انا باعرض مواقف حدثت بالفعل من فساد التعليم في مصر ..واللي هي نتيجة تراكمات سنين كتير مش دلوقتي بس .. ومش المسؤول عنها اللي موجود دلوقتي بس .. لأ .. دا المسؤولين عنها كمان ..هم المسؤولين السابقين ولمدة 45 سنة فاتت .. لأن أي بلد بدون تعليم صحيح صحي لن تقوم لها قائمة .. المرة اللي فاتت عرضت الغش في الدراسات العليا .. النهارده بقى .. باعرض نماذج من الغش في المرحلة الجامعية الأولى .. يعني في أولى وتانية وتالتة ورابعة جامعة ....شوف بقى كمان يا سيدي المواقف الأخرى دي من الغش في الامتحانات بمصر .. و اللي كلها غش في غش .. دي طالبة بتغش .. فمسكت الدكتورة منها ورقة الغش مع الكراسة عشان تطبق القانون وتعمل لها محضر ..فقامت الطالبة .. هاجمة على الدكتورة وواخدة منها الورقة وبلعتها.. آه تصدقوا .. بلعتها بدون ماء .. فالدكتورة أخدت الموبايل لأنها ملاحظة أن البنت بتغش من الموبايل كمان .. تقوم البنت تعمل إيه بقى .. حضرتك حتتصدم دلوقتي .. تقوم هاجمة على الدكتورة وتعض في إيديها وتضرب فيها .. وتعمل إيه كمان .. حتتصدم حضرتك هنا أكتر وأكتر .. تقوم تعمل تمثيلية رخيصة جداً جداً .. متقمش بيها طالبة جامعية على خلق ومتربية تربية سليمة ..وهي إيه بقى .. تفتري على الدكتورة و تقعد تصوت وتصرخ وتقول .. ضربتني موتتني ضربتني موتتني وتصرخ كمان وكمان .. عمركوا شوفتوا تربية زي دي ؟ .. الطالبة تم تدريبها أو هي متدربة على كده .. لما تتمسك معاها ورقة غش تخطفها وتبلعها بدون ماء .. وشوف بقى المصيبة اللي جاية .. الطالبات زمايلها .. يقولوا لها .. خدي ميه يا حبيبتي واشربيها عشان البرشامة اللي بلعتيها متضرش الكلى بتاعتك ؟ تخيلوا بيقولوا لها كده .. تحس أن فيه شعل عصابات بيعملوه عشان يغشوا .. وشوف بقى المصيبة الأكبر اللي جاية دي كمان .. بعض الطالبات يقولوا .. يا دكتورة بتآخدي منها الموبايل ليه ؟ .. أكيد الموبايل عليه معلومات وبنفس الشكل والأرقام اللي في الامتحان .. لأن احنا بنآخد كورسات في المادة دي .. وأكيد الامتحان موجود على الموبايل .. شوفتوش مهزلة أكبر من كده .. شوفتوش فساد أكبر من كده .. لأ والأدهى .. بقى .. أن البنت تجمع زميلاتها .. وبقوموا كاتبين شكوى في الدكتورة .. ويقولوا عليها ما قال مالك في الخمر وبفتروا غليها ويقولوا حاجات محصلتش ويوقعوا كلهم عليها .. يعني عاوزين غش بالإكراه بالإجبار بالإرهاب .. المصيبة السودة بقى أنك تلاقي أمة لا إله إلا الله .. ملمومة عليك .. وتقول لك .. يا دكتورة .. كلهم كده والبلد كلها كده هو انت اللي حتصلحي الكون .. شوفتوش فساد أكتر من كده .. ولقطة تانية .. ده طالب عمال يدي إشارات لزميله بصوابعه مرة وببقه مره وبرجله مره .. لأن الامتحان كان موضوعي .. يجي المراقب أو الملاحظ يقول له عيب .. بردوو يقوم يعمل تمثيلية رخيصة ويرفع صوته ويهزق في راجل في سن أبوه .. ويصرخ .. ويقول أنا قغدتي كده رقبتي دائماً معووجة كده .. وتلاقي الطلاب زملاؤه بدأوا يعملوا هيصه وزمبليطة .. ويعلوا صوتهم عشان اللجنة تهيج ويعرفوا يغشوا .. يعني بردوو تحس أنك قدام شغل عصابات جماعية للغش مش طلاب جامعيين محترمين .. واللي كاتب على إيده واللي حاطط البرشامة في كم القميص وبيشدها بأستك واللي بيكتب على الدسك عيني عينك .. واللي بيكتب على رقم الجلوس قدامك .. ولما تكلمه يرد عليك بمنتهى قلة الأدب والوقاحة والسفالة والبجاحة .. والمصيبة السودة .. أن فيه ناس بتبقى واقفة وشايفة الغش ومش عاوزينك تعمل حاجة .. وأكتر من كده عاوزينك تسيب اللجنة .. والأمور تعدي وخلاص .. ويقولوا عليك أنك بتهيج اللجنة.. أما اللي بسيب الطلاب يغشوا .. فهو كيوت وهادي ومسالم وسكر وحلو خالص .. وطبعاً الغش ده هم متعودين عليه من الروضة والحضانة وابتدائي وإعدادي وثانوي .. وللأسف الأهالي لهؤلاء الطلاب عليهم مسؤولية كبيرة جداً .. لأن بعض الأهالي فعلاً ربوا ولادهم على الغش .. بل كمان بيروحوا المدارس أيام الامتحانات في ابتدائي وإعدادي وثانوي .. وبيتهجموا على المراقبين عشان يرغموهم يغششوا ولادهم .. ودي المصيبة السودة بتاعتنا .. وكمان من المصايب السودة التانية أن الإعلام فاتح لهم دراعاته .. ووالله من ساعة مدرسة المشاغبين ومن ساعة ما الإعلام فتح دراعاته للطلاب .. وهم تجرأوا على معلميهم .. وللإنصاف لازم نقول .. أن فيه بعض المعلمين وأساتذة الجامعات أيضاً هم من ساعدوا على هذا الغش والفساد العلمي .. وعشان كده .... والله العظيم .. لو جه للبلد دي عشرين سيسي ما حيقدر يعمل لوحده حاجة ما دمنا على هذه الدرجة من الفساد .. إنقذ التعليم في مصر يا سيسي .. بقوانين يتم تطبيقها بصرامة ..
---------------------------
د.شهيرة عبد الهادي

أنا مصري .. معدني أصيل ومش برَّاني ..

أنا مصري .. معدني أصيل  ومش برَّاني ..
مسيحي ومسلم .. مسلم ومسيحي ..
من بحري  من أسوان ومن الصعيد الجواني  ..
لا يهمني .. إرهاب  جواني ولا برَّاني ..
ولا بخاف  م اللي   مشغلك يا خسيس ..
ولا عمري في يوم ح أقول  منك آه ياني ..
أنا مصري معدني أصيل ومش براني .. 
----------------------------------
د.شهيرة عبد الهادي 

با مصر .. قومي .. وشدي حيلك تاني ..

يا مصر.....
قومي ..وشدي حيلك .. 
 من  تاني ..
امسحي دمعتك ..
قومي  عفية قوية  ..
من تاني ..
لا حد  قدر يذلك ..
في الأول ..
ولاحد  ح يقدر يذلك  ..
تاني ..
ولا حزن  ح يهزك .. 
ولا   إرهاب  ح يهمك ..
تاني ..
ابتسمي ..اضحكي ..
افرحي .. زهزهي ..
من تاني ..
احضني ولادك ..
ارفعي راسك ..
وراس ولادك ..
في الأول وفي التاني ..
دا عمر راسك ..
وراس ولادك..
ما تنحني أبدأً تاني ..
-----------------------
د.شهيرة عبد الهادي

ولنقرأ اليوم الفاتحة ولتدق أجراس الكنائس على أرواح كل ضحايا وشهداء مصر ..

إن الله وملائكته يصلون على النبي يا أيها الذين آمنوا صلوا عليه وسلموا تسليما ..
-----------
جمعتكم جمعة طهر ونقاء لهما صفتي الاستمرار والبقاء إن شاء الله .. اللهم اجعل أول جمعة على ضحايا طائرة مصر للطيران برداً وسلاماً .. ونعزي الشعب المصري كله ونغزي أنفسنا .. ونعزي شركة مصر للطيران .. وندعوا الله أن يجنب مصر كل مكروه .. وستظل مصر هي مصر .. رغم كل المحن.. ولنقرأ اليوم الفاتحة ولتدق أجراس الكنائس على أرواح كل ضحايا وشهداء مصر ..

وافهم بقى يا طيب .. فصدي يا عبيط ههههه

 بمناسبة  وزير الزراعة وحديثه اليوم.. تذكرت  أنه  ..في مصر .. في جميع المصالح الحكومية .. وفي جميع المناصب المستخبية.. حتى ولو كان  منصب خولي أنفار في الغيط   .. يبدأ  اللي عاوز منصب ..  يتمحلس  .. معلش  دي بلغة ستي .. يعني .. يتقرب  ويتقرب ويتقرب   للناس  اللي عاوز  يكون رئيسهم ..  ويسمع ويسمع ويسمع  لكل طلباتهم ..  وينتقد وينتقد وينتقد اللي  كان قبله..  ويوعد ويوعد ويوعد .. أنه حيعالج كل عيوب اللي قبله .. وبعد  ما  الطيبيين  هههههه  .. يعني   بلغتهم  كل عبيط وعبيطة  هههههه  .. يقعدوه  على الكرسي ..   يقوم  إيه بقى .. تبدأ  الثقافة المصرية تشتغل .. ف   يكون هناك  استقبال  حافل  من  كهنة المعبد  .. تنتشر فيه  الزهور  ورائحة البخور   والكهنة  تقوم بدورها المعهود  ..  وبعدين  .. تلاقي .. القطط  السمان  اللي كانوا ممشيين اللي قبله ..  عاوزينه يمشي في  نفس طريق اللي قبله   .. ويقعدوا  يخوفوه  ويخوفوه ويخوفوه .. وبعدين ينغخوه و ينفخوه  وينغخوه .. بتراتيل  الدعاء والسجود للرب الجديد .. لغاية ما يصدق نفسه  أنه بقى  رب ..  يقوم إيه بقى ..  ف  يبدأ ينسى كل اللي قاله ووعد بيه .. ويقوم يمشي زي اللي قبله بالظبط  ..  في نفس المدق .. وكمان فوقه  شوية مكر  مُعدل  .. ما هو استفاد بردوا من اللي سمعه  ..   وفوق ده كمان  عاوز الناس تنافقه    وتسجد  له    ومتتكلمش  ومتغتحش  بقها وتصلي له ركعتين قبل  ما تكلمه  .. ما هو الرب  الجديد   بقى ..   وينسى رب الكون .. وهكذا  يُصنع   صاحب المنصب في مصر حتى ولو كان خولي أنفار ..  وسيجيء اللي بعده واللي بعده   بنغس الطريقة .. وافهم بقى يا  طيب  .. قصدي يا عبيط ههههه ..  وانا منهم وأولهم  ههههههه .. لكن الطيب مبيفهمش مبيتعلمش  .. ما هو طيب بقى ..

 

كلمتين بالبلدي ..( مش عارفة أأقولك إيه يا سادات )

كلمتين بالبلدي ..( مش عارفة أأقولك إيه يا سادات )
-----------------------------------------------------------
جاء السادات للحكم مع بداية السبعينيات وقال : دولة العلم والإيمان .. ومرت 45 سنة .. واحنا دلوقتي نعاني الأمرين من التردي في المنظومة التعليمية .. يعني مبقاش فيه علم ولا بحث علمي .. أما بقى بالنسبة لجزئية الإيمان .. فأنا لا أجرؤ على التحدث فيها .. لأنني أصغر من ذلك .. بس أنا ملاحظة حاجة .. وهي .. كل اللي احنا كسبناه بعد ما السادات خرج الإخوان من السجون ونشر السلفيين في كل القرى والنجوع .. وترك الساحة لكل واحدة عاوزة تعمل داعية إسلامية وتروح المدن الجامعية وتحاضر فيها وكل مسجد وتحاضر فيه ..وكل واحد عاوز يعمل شيخ يروح كل قناة شوية ويستشيخ فيها .. ويروح كل مسجد وزاوية وينشر دعوته فيه .. كل اللي احنا كسبناه .. أن الرجالة في كل القرى دي والنجوع دي وفي المدن كمان .. لبست جلاليب بيضاء قصيرة وبناطيل قصيرة وشباشب بصباع وربت ذقونها .. والستات لبست االخمار مرة والنقاب مرة .. ودلوقتي الإيشارب على بنطلون فيزون وبدي شيفون .. ومرة الإسدال ومرة العبايات .. ومرة ملايس المحجبات .. لكن بيغشوا في كل حاجة .. في المواد التموينية وفي المباني وفي الامتحانات و كل حاجة في مصر بيغشوا فيها .. ناهيك عن الغيبة والنميمة والأحقاد التي زادت والكره الذي تفشى والألفاظ الحقيرة التي تقال والتحدث في أعراض الناس ووو ..... إلخ .. سواء في مجتمع الرجال أو في مجتمع النساء ..وهم بردوا لابسين الجلاليب القصيرة والبناطيل القصيرة والشياشب ومربيين ذقونهم ..و هن بردو لابسات الخمار والنقاب والإيشارب والإسدال .. وبينادوا على بعض يا حاج ويا حاجة.. ناهيك عن الانفلات الأخلاقي الذي انتشر ..والرداءة التي أصبحت منهاج حياة .. إلا من رحم ربي .. ومعرفش بقى هو ده الإيمان اللي كان يقصدوا السادات ولا إيه .. نحن في مصر نحتاج إلى إعادة بناء الإنسان المصري في مجالي العلم والإيمان .. ومعرفش أأقولك إيه يا سادات بقى .. يلا .. الله يرحمك .. لن تعود مصر التاريخ والجغرافيا والحضارة .. إلا بإعادة بناء الإنسان المصري ..
----------------------------
د.شهيرة عبد الهادي
Drshahera Abd Elhady Ibrahem

مهزلة الغش في الامتحانات

مهزلة الغش في الامتحانات ..

=====================

كلنا نعلم مهازل الغش في الامتحانات في مصر بداية من الروضة و الحضانة مروراًً بالمراحل التعليمية في ابتدائي و إعدادي و ثانوي و الجامعة .. لكن ما رأيته من بعض طلاب الدراسات العليا في لجان امتحاناتهم .. قد أحزنني .. ما هذا الغش .. غش غش غش .. وما يحزنني أكثر .. أن هؤلاء طلاب دراسات عليا .. بمعنى أن طالب الدراسات العليا .. المفروض أنه قد أتى بدافع داخلي من نفسه لكي يتعلم .. والمفروض أنه يكون ذو خلق قويم .. وما يزيد حزنك .. أنك عندما تحاول منع الغش وتوجه له إنذاراً بعدم محاولات الغش .. تجد منه إسلوباً في منتهى قلة الذوق وقلة الأدب والسفالة .. ووالله لا أبالغ أن قلت :والبلطجة ..بجد اساليب بلطجة .. بهدف السرقة العلمية والغش ..والقيام ببعض التمثيليات المبنية على الفهلوة والأونطة والكذب واللعب بالتلات ورقات والاستفزاز ..بحيث يهيج اللجنة .. لأ ويدخلك في موضوع ليس له أساس من الصحة مُستغلاً أوضاع البلد عشان يداري على محاولته للغش ويقولك : أنا عاوز اشرب هو انا من الكفار يعني انا من الكفار يعني انا من الكفار ويكررها ويزعق ويصرخ قال يعني مظلوم في تمثيلية رخيصة .. يعني ينتهج منهجاً في منتهى الإسفاف والترخص والبلطجة والأونطة والوقاحة.. حتى يوفر مناخاًً مناسباً للغش له ولزملائه .. ما هذا ..والله أجدني أمام بلطجي وليس طالب .. وما يحزنك أكثر .. أنه عندما تمسك معه أداة الغش ..كالبرشام والموبايل والمسطرة واستخدام أجزاء من الجسم الحرجة عند كل من الرجال والجنس اللطيف .. تجد مهازل .. فإذا ذهبت ملاحظة أنثى لكي تمسك أداة الغش عند طالب رجل.. يتهمها اتهامات باطلة وبقول لها ألفاظ تكسفها وتخوفها .. مفهومة لحضراتكم طبعاً ..وإذا ذهب ملاحظ رجل لكي يمسك أداة الغش عند طالبة .. تقوم باتهامه باتهامات سيئة باطلة .. مفهومة لحضراتكم طبعاً .. وما يحزنك أكثر .. أن تجد كل اللي حواليك يتجمعون عليك من جميع الفئات .. من الزملاء والزميلات ومن الملاحظين ومن ومن ومن .. ده يقول لك .. معلش يا دكتورة.. وده يقول هم غلابة وبيشتغلوا وبيدوا دروس خصوصية طوال االيوم ومش فاضيين للمذاكرة .. وده يقلك عشان مستقبله .. أنا مش عارفة مستقبل إيه لواحد حيبني مستقبله على الغش .. وده يقولك : فوتي يا دكتورة هو فيه إيه ماشي صح في البلد .. واللي يحزنك أكثر وأكثر .. إن من هؤلاء الطلاب من هو مدير مدرسة وبيغش .. ومن هو معلم وبيغش ..ومن هو محاسب وبيغش ..ومن هو طبيب بيطري وبيغش.. ومن هو طبيب بشري وبيغش ..ومن هو أخصائي اجتماعي وبيغش ..ومن هو وكيل مدرسة وبيغش .. ومنهم من هو بذقن طولها نصف متر وبيغش ..ومن هي مدام وسيدة كبيرة في السن وبتغش .. ومنتقبة وبتغش ..ومحجبة وبتغش ..أو من غير حجاب وبتغش .. غش غش غش .. واللي يحزنك أكثر وأكثر .. أن البعض لا يريدون منك أن تمسك حالات الغش .. عشان تبقى الأمور تمام التمام ..وكله تمام ياافندم.. ويقولولك :إن جالك الغصب إعملها بجميلة .. وده يقول : يا دكتوة كبري مخك ..وده يقول يا دكتورة إحنا مش في زمن العدل والحق .. معقولة .. غش غش غش ..وقلة أدب وسفالة وتحايل وفهلوة وبلطجة في السرقة .. من ناس المفروض أنها مسؤولة عن أجيال ..ومسؤولة في مواقع مختلفة ..ومنهم .. من نطالبهم يتولى شؤون البلاد مستقبلا.. وبعدين نقعد نتطاول على كل رئيس يأتي للبلاد.. والله لو ربنا نزل على البلد دي ملاك من السماء أمام اعينهم .. ونحن بخلق االغش هذا .. ما حنفلح أبدا ولا حنتقدم أبداً .. لابد أن نغير من أنفسنا للأفضل بأيدينا نحن .. لابد أن نتقي الله في كل ما نقوم به بأيدينا نحن ..لابد من وجود قوانين رادعة في مجال التعليم والعلم .. مع ضرورة تطبيقها بصرامة وحزم على الجميع بدون استثناء .. وإلا لو تركنا الوضع على ما هو عليه الآن ..سينهار التعليم أكثر ما هو منهار الآن ..ولن تقوم للتعليم قائمة بعد ذلك .. يا سادة من أمن العقوبة أساء الأدب ..

-------------------------------------------

د.شهيرة عبد الهادي

Drshahera Abd Elhady Ibrahem

مات الكلام ...

جمال حمدان .. لكي يكون المفكر جمال حمدان .. قدم استقالته من الجامعة المصرية آنذاك .. لينأى بنفسه عن الصراعات اليومية داخل الجامعة و التي تفتل كل إبداع ولكي يتفرغ للبحث العلمي ويكتب لنا شخصية مصر الجغرافيا والتاريخ والحضارة .. أحياناً .. يبدوا لي ..لو أن جمال حمدان كان عايش في أيامنا هذه التي تشهد مهازل الصراعات وصغائرها في الكليات الجامعية المصرية والتي أثرت على البحث العلمي سلباً بدرجة لا تُحتمل بل أنها قتلت البحث العلمي ودفنته .. كان قدم استقالته من الدنيا كلها .. ولا حول ولا قوة إلا بالله العلي العظيم ..

رسالة إلى الرئيس السيسي ( اانفذ االتعليم والبحث العلميي يا ريس )

رسالة إلى الرئيس السيسي ..
-----------------------------------
البحث العلمي والدراسات العليا في مصر في مأساة .. أصبحت هناك الآلاف إن لم يكن الملايين من رسائل الماجستير والدكتوراة في مصر خاوية من العلم وخلق العلم والجدية والمصداقية .. رسائل الماجستير والدكتوراة التي يتم منحها هذه الأيام ..الآن .. لا تساوي ثمن الحبر المكتوبة بيه .. ونظام الساعات المعتمدة هذا .. والذي شجع على وجود آلاف الرسائل الخاوية .. سيء سيء سيء ..يا ريت يتم إلغاء نظام الساعات المعتمدة .. من أجل إصلاح منظومة البحث العلمي في مصر .. إذا كانت النية لدى الحكومة ..هي إصلاح التعليم والبحث العلمي في مصر ..والذي أصبح مملوءً بالفساد العلمي والخلقي .. سعادة الرئيس السيسي .. لا أمل لنا نحن المواطنين العاديين الذين يريدون الإصلاح لوجه الله والوطن .. بعد الله .. إلا في سعادتكم .. مع ضرورة وجود قوانين يتم تفعيلها في المنظومة التعليمية ككل ..
--------------------------
د.شهيرة عبد الهادي
Drshahera Abd Elhady Ibrahem

إلى متى ؟ ولماذا ؟ وكيف ؟

إلى متى ؟ ولماذا ؟ وكيف ؟
-----------------------------
تغيبت عن الفيس بوك لمدة تزيد عن 6 أشهر بسبب مرض والدتي ونفسيتي المُنهكة .. ومما لاشك فيه أنني قد خسرت ببعدي هذا الكثير .. لأن خلال نلك الشهور .. كانت هناك الكثير من الأحداث .. وبأمانة لم أتابعها أيضاً .. لأن حال والدتي كانت صعبة .. ثم أراد الله أن أعود للفيس ثانية .. بعد أن من الله على حالة والدتي بالاستقرار النسبي البسيط .. وقمت بتصفح مواقع التواصل الاجتماعي .. لمحاولة التواصل معها .. فإذا بي أجد .. أن الحال هي هي كما تركتها قبل أكثر من 6 شهور .. المجتمع الفيس بوكي .. منقسم إلى ثلاث أقسام .. قسم يقوم بنشر حِكم ومواعظ .. منهم من أعرفه على أرض الواقع .. وأعلم أن الشيطان يأتي بواسطة له لكي يتعلم على يديه كيفية إيذاء البشر .. أما القسم الثاني : فهو دائم الشتائم في شخص السيسي و توجيه الاتهامات له ولرجاله بالخيانة والعمالة ووو...... إلخ تحت مسمى الإخوان والسلفيين والثوريين الاشتراكيين والأناركيين ووو ...... إلخ وهو يقوم بذلك بالعند فيما يسميهم العسكر وحكم العسكر .. وقسم ثالث : دائم التطبيل والتهليل والتمجيد لشخص السيسي وإنجازاته و توجيه الشتائم والاتهامات بالخيانة والعمالة للإخوان والسلفيين والثوريين الاشتراكيين والأناركيين ووو ....... إلخ وهو يقوم بذلك بالعند فيهم .. ولم أجد في حدود علمي آراء موضوعية إلا فيما ندر .. وكأننا رواد المجتمع الفيسبوكي .. نتعمد المزيد من الفرقة بين أفراد الوطن الواحد .. وللأسف هذه الثقافة الغريبة على المجتمع المصري هي انعكاس للواقع .. وهي منتشرة في أرض الواقع .. أبناء المهنة الواحدة والقسم الواحد يكرهون بعض .. وأبناء المهن المختلفة والأقسام المختلفة يكرهون بعض .. وأصحاب الديانات والمذاهب المختلفة يكرهون بعض .. الجيران في العمارة الواحدة يكرهون بعض.. ووو ...... إلخ .. إلا من رحم ربي .. والسؤال هو ..إلى متى سنظل هكذا ؟ .. إلى متى سنقوم بتوسيع رقعة الفرقة بين أبناء الوطن الواحد ؟.. ولماذا وصل الشعب المصري إلى تلك الحالة ؟ .. وكيف تمكنت وتملكت هذه الثقافة البغيضة من شعب قيل عنه في جوهر ثقافتنا الإسلامية أنه في رباط إلى يوم الدين ؟.. أين رجال الدين ؟ .. أين رجال الثقافة الرفيعة ؟ .. أين رجال العلم ؟ .. أين الضمير الجمعي لهؤلاء ؟ .. أين الإيثار ؟ .. أين الكلمة السواء ؟ .. أين القول الحق ؟.. أين الرجل الرشيد ؟ .. أهِ وآه يا مصر ..
------------------------------------------
د.شهيرة عبد الهادي
Drshahera Abd Elhady Ibrahem

جمعة طيبة مباركة ......

قال الحبيب المصطفى صلوات ربى وسلامه عليه ..ما من يوم جمعة إلا وفيه ساعة إحابة ..فادعو: معى لعلها تكون الساعة ..يا إلهى أنت ربى ..وعلمك حسبى.. يا من يجيب المضطر إذا دعاه ويا من يكشف السوء عمن ناداك .. ندعوك أن تنصرنا وتسترنا وتجبرنا وتحفظنا ولا تخزنا ولا تفضحنا ولاتذلنا ولا تضلنا ولا تفاجأنا ولا تفجعنا ولا تثقل بنا ولا تثقل علينا وعافنا واعفو عنا ..واحتسبنا يا مولانا من عبادك الصابرين ..أنت ربنا وليس لنا رب سواك ندعوه ..وأنت ولينا فى الدنيا والآخرة.. فتوفنا مسلمين وألحقنا بالصالحين ..وصل اللهم على سيدنا محمد وآله وصحبه وسلم ..
-------------------
د. السويفي

لكل من يكره مصر ..........

لكل منافق .. لكل آفاق .. لكل مرائي .. لكل فاسد .. لكل كاذب .. لكل آفاك ..
لكل من يحرق مصر ..
------
لكل شريف يحب مصر .. لكل مواطن يعمل من أجل مصر .. لكل مصري بيخاف على مصر ..
-----
.. هذه رسالة إليكم ..

الفساد هو الإرهاب بعينه .. الفساد أقوى من الإرهاب ..

لا أبالغ .. إن قلت .. أن كل شهر .. يتم بناء عمارة شاهقة مكونة من 20 دور وعلى أقل تقدير من 12 دور قي الإسكندرية وخاصة في العجمي البيطاش . لدرجة أن بين كل عمارة والثانية .. حارة . عرضها نصف متر .. وهذه مصيبة في حد ذاتها .. وأخطارها كثيرة جداً .. على سبيل المثال .. لو اشتعلت النيران في إحدى هذه العمائر .. لن تستطيع عربة الإطفاء الوصول إليها .. ناهيك عن أن الشقق كلها أصبحت مكشوفة للجار وجار الجار .. وما يترتب عن ذلك من مخاطر خُلقية .. والشبكات ضعفت .. والشقق أصبحت في ظلام ليلاً ونهاراً .. وأيضاً كلها عمارات مهددة بالانهيار .. لأنها كلها مخالفات .. لابد من وجود دولة قوية حازمة صارمة تضرب بيد من حديد على كل فاسد .. لم أكن أتوقع أن ثورة 25 يناير 2011م ستجعل بعض أبناء الشعب منعدمي الضمير يستغلون بلدهم مصر هكذا .. إن الثورات تبحث عن الجمال لكي تُميت القبح .. لكن في مصر .. للأسف لا يحدث ذلك بسبب الفساد ومنعدمي الضمير في المحليات الذين يحولون كل جمال إلى قبح .. إن الفساد هو الإرهاب بعينه بل أقوى من الإرهاب ..
‫#‏كانت__ثورة_وكانت_حلماً‬
‫#‏نريد_دولة__قوية___حازمة‬

لن تُحرق مصر .. وستبقى مصر ..

معقولة .. مسلسل الحرائق المنتشر في مصر ده .. في منطقة عرب العيايدة وفي الرويقي وفي العتبة وفي مخزن بالقصر العيني وفي العاشر من رمضان والشرقية وبالنخيل في الواحات وبمطعم في الدقي .. كل ده في يومين .. كل دي حرائق .. حفاً إن الحرائق داخل القلوب .. نعم داخل قلوب من يكرهون البلد دي .. كل ده عشان الكرسي .. لعنة الله على الكرسي .. لعنة الله على الإرهاب وتجار الدين وتجار الوطنية وتجار الحروب .. لعنة الله على من يحرق مصر .. لعنة الله على من يريد حرق مصر .. وإن شاء الله ستبقى مصر.. ولكن شريطة أن تكون دولة قوية حازمة صارمة قادرة على إطفاء كل أنواع الحرائق .. فادرة على القضاء على الفساد الإداري والخلقي .. إن الفساد أخطر على البلاد من الإرهاب .. بل هو الإرهاب بعينه ..

شهادة تقدير لي .. من طلابي الغاليين .. ألف شكر يا غاليين ..

الحمد لله كما ينبغي لجلال وجهه وعظيم سلطانه .. اليوم الأحد 8 / 5 /م 2016 م .. استلمت هذه الشهادة التي هي تاج على راسي من فوق ..من طلاب الدراسات العليا بالدبلوم العامة بكلية التربية بمرسى مطروح والتابعة لجامعة الإسكندرية وكلية التربية بالشاطبي.. عن طريق الكلية .. قيمة هذه الشهادة البسيطة والمكتوبة على ورق بسيط .. أنها .. من الطلاب والطالبات أنفسهم وبوازع من داخلهم .. وليست من أي جهة أو موجهة .. ألف شكر طلابي وطالباتي الغاليين .. بالرغم أني كنت بانخانق معاهم كنير  .. لكن واضح أنهم على قدر المسؤولية وفهموا أن هدفي كان هو مصلحتهم أولاً وأخيراً.. وهكذا وكما قلت بالامس إذا فهم الطالب المصري شخصية من يُعلّمه ووجد منها عطاءً سيعطيها التقدير..

حبيبتي الغالية .. مصر ..

فيها اللي فيها .. ومهما كان فيها ..
أنا مش حاقول فيها لا اخفيها ..
لأ .. حاقول ربي يبارك فيها ويخليها ..
حبيبتي الغالية مصر ..
وكل صالح عايش فيها وبيخاف عليها..

---------------------------------------
د. شهيرة عبد الهادي
Drshahera Abd Elhady Ibrahem

رسالة إلى الرئيس السيسي .....

رسالة إلى االرئيس السيسي
----------------------------------
سمعت أن التعليم المفتوح سيتم إلغائه .. لو هذا الخبر صحيح .. يبقى ألف مبرووك .. لأنه كله غش غش غش في كل شئ ومن كل شئ.. وانفلات علمي ناهيك عن الانفلات الخلقي .. يعني كله فساد علمي وفساد خلقي .. هو مهزلة بجد.. مهزلة بجميع المقاييس.. وأتمنى إلغائه نهائياًً .. وعقبال ما يتلغى نظام الساعات المعتمدة الذي أفسد الدراسات العليا و البحث العلمي في مصر .. االمطلوب تطهير التعليم من الفساد اللي فيه يا ريس ..لن تنهض بلد في الدنيا إلا بالتعليم الطاهر الحق النزيه الشريف.. الحمل كتير وكيبر يا ريس .. الله معك ..
-----------------------------
د.شهيرة عبد الهادي

هم يخترعون ويجيدون ونحن نستهلك فقط ولا نجيد إلا الكلام ...

https://www.facebook.com/abdaa3/videos/883576688419898/?fref=nf