(كلمتين بالبلدي ) .. والله لو جه للبلد دي 20 سيسي ما حيقدر يعمل حاجة لوحده ما دمنا على هذه الدرجة من الفساد ..

(كلمتين بالبلدي) .. والله لو جه للبلد دي 20 سيسي ما حيقدر يعمل حاجة لوحده طول ما احنا فاسدين كده ..
=============================================================
اللي يحب البلد دي لازم يعترف بالأخطاء الموجودة ويلفت النظر ليها عشان يمكن المسؤولين يقدروا يصلحوها .. لأن لو التعليم استمر بالمهزلة اللي هو فيها دي مش حينصلح حالنا .. وعشان كده .. انا باعرض مواقف حدثت بالفعل من فساد التعليم في مصر ..واللي هي نتيجة تراكمات سنين كتير مش دلوقتي بس .. ومش المسؤول عنها اللي موجود دلوقتي بس .. لأ .. دا المسؤولين عنها كمان ..هم المسؤولين السابقين ولمدة 45 سنة فاتت .. لأن أي بلد بدون تعليم صحيح صحي لن تقوم لها قائمة .. المرة اللي فاتت عرضت الغش في الدراسات العليا .. النهارده بقى .. باعرض نماذج من الغش في المرحلة الجامعية الأولى .. يعني في أولى وتانية وتالتة ورابعة جامعة ....شوف بقى كمان يا سيدي المواقف الأخرى دي من الغش في الامتحانات بمصر .. و اللي كلها غش في غش .. دي طالبة بتغش .. فمسكت الدكتورة منها ورقة الغش مع الكراسة عشان تطبق القانون وتعمل لها محضر ..فقامت الطالبة .. هاجمة على الدكتورة وواخدة منها الورقة وبلعتها.. آه تصدقوا .. بلعتها بدون ماء .. فالدكتورة أخدت الموبايل لأنها ملاحظة أن البنت بتغش من الموبايل كمان .. تقوم البنت تعمل إيه بقى .. حضرتك حتتصدم دلوقتي .. تقوم هاجمة على الدكتورة وتعض في إيديها وتضرب فيها .. وتعمل إيه كمان .. حتتصدم حضرتك هنا أكتر وأكتر .. تقوم تعمل تمثيلية رخيصة جداً جداً .. متقمش بيها طالبة جامعية على خلق ومتربية تربية سليمة ..وهي إيه بقى .. تفتري على الدكتورة و تقعد تصوت وتصرخ وتقول .. ضربتني موتتني ضربتني موتتني وتصرخ كمان وكمان .. عمركوا شوفتوا تربية زي دي ؟ .. الطالبة تم تدريبها أو هي متدربة على كده .. لما تتمسك معاها ورقة غش تخطفها وتبلعها بدون ماء .. وشوف بقى المصيبة اللي جاية .. الطالبات زمايلها .. يقولوا لها .. خدي ميه يا حبيبتي واشربيها عشان البرشامة اللي بلعتيها متضرش الكلى بتاعتك ؟ تخيلوا بيقولوا لها كده .. تحس أن فيه شعل عصابات بيعملوه عشان يغشوا .. وشوف بقى المصيبة الأكبر اللي جاية دي كمان .. بعض الطالبات يقولوا .. يا دكتورة بتآخدي منها الموبايل ليه ؟ .. أكيد الموبايل عليه معلومات وبنفس الشكل والأرقام اللي في الامتحان .. لأن احنا بنآخد كورسات في المادة دي .. وأكيد الامتحان موجود على الموبايل .. شوفتوش مهزلة أكبر من كده .. شوفتوش فساد أكبر من كده .. لأ والأدهى .. بقى .. أن البنت تجمع زميلاتها .. وبقوموا كاتبين شكوى في الدكتورة .. ويقولوا عليها ما قال مالك في الخمر وبفتروا غليها ويقولوا حاجات محصلتش ويوقعوا كلهم عليها .. يعني عاوزين غش بالإكراه بالإجبار بالإرهاب .. المصيبة السودة بقى أنك تلاقي أمة لا إله إلا الله .. ملمومة عليك .. وتقول لك .. يا دكتورة .. كلهم كده والبلد كلها كده هو انت اللي حتصلحي الكون .. شوفتوش فساد أكتر من كده .. ولقطة تانية .. ده طالب عمال يدي إشارات لزميله بصوابعه مرة وببقه مره وبرجله مره .. لأن الامتحان كان موضوعي .. يجي المراقب أو الملاحظ يقول له عيب .. بردوو يقوم يعمل تمثيلية رخيصة ويرفع صوته ويهزق في راجل في سن أبوه .. ويصرخ .. ويقول أنا قغدتي كده رقبتي دائماً معووجة كده .. وتلاقي الطلاب زملاؤه بدأوا يعملوا هيصه وزمبليطة .. ويعلوا صوتهم عشان اللجنة تهيج ويعرفوا يغشوا .. يعني بردوو تحس أنك قدام شغل عصابات جماعية للغش مش طلاب جامعيين محترمين .. واللي كاتب على إيده واللي حاطط البرشامة في كم القميص وبيشدها بأستك واللي بيكتب على الدسك عيني عينك .. واللي بيكتب على رقم الجلوس قدامك .. ولما تكلمه يرد عليك بمنتهى قلة الأدب والوقاحة والسفالة والبجاحة .. والمصيبة السودة .. أن فيه ناس بتبقى واقفة وشايفة الغش ومش عاوزينك تعمل حاجة .. وأكتر من كده عاوزينك تسيب اللجنة .. والأمور تعدي وخلاص .. ويقولوا عليك أنك بتهيج اللجنة.. أما اللي بسيب الطلاب يغشوا .. فهو كيوت وهادي ومسالم وسكر وحلو خالص .. وطبعاً الغش ده هم متعودين عليه من الروضة والحضانة وابتدائي وإعدادي وثانوي .. وللأسف الأهالي لهؤلاء الطلاب عليهم مسؤولية كبيرة جداً .. لأن بعض الأهالي فعلاً ربوا ولادهم على الغش .. بل كمان بيروحوا المدارس أيام الامتحانات في ابتدائي وإعدادي وثانوي .. وبيتهجموا على المراقبين عشان يرغموهم يغششوا ولادهم .. ودي المصيبة السودة بتاعتنا .. وكمان من المصايب السودة التانية أن الإعلام فاتح لهم دراعاته .. ووالله من ساعة مدرسة المشاغبين ومن ساعة ما الإعلام فتح دراعاته للطلاب .. وهم تجرأوا على معلميهم .. وللإنصاف لازم نقول .. أن فيه بعض المعلمين وأساتذة الجامعات أيضاً هم من ساعدوا على هذا الغش والفساد العلمي .. وعشان كده .... والله العظيم .. لو جه للبلد دي عشرين سيسي ما حيقدر يعمل لوحده حاجة ما دمنا على هذه الدرجة من الفساد .. إنقذ التعليم في مصر يا سيسي .. بقوانين يتم تطبيقها بصرامة ..
---------------------------
د.شهيرة عبد الهادي

أنا مصري .. معدني أصيل ومش برَّاني ..

أنا مصري .. معدني أصيل  ومش برَّاني ..
مسيحي ومسلم .. مسلم ومسيحي ..
من بحري  من أسوان ومن الصعيد الجواني  ..
لا يهمني .. إرهاب  جواني ولا برَّاني ..
ولا بخاف  م اللي   مشغلك يا خسيس ..
ولا عمري في يوم ح أقول  منك آه ياني ..
أنا مصري معدني أصيل ومش براني .. 
----------------------------------
د.شهيرة عبد الهادي 

با مصر .. قومي .. وشدي حيلك تاني ..

يا مصر.....
قومي ..وشدي حيلك .. 
 من  تاني ..
امسحي دمعتك ..
قومي  عفية قوية  ..
من تاني ..
لا حد  قدر يذلك ..
في الأول ..
ولاحد  ح يقدر يذلك  ..
تاني ..
ولا حزن  ح يهزك .. 
ولا   إرهاب  ح يهمك ..
تاني ..
ابتسمي ..اضحكي ..
افرحي .. زهزهي ..
من تاني ..
احضني ولادك ..
ارفعي راسك ..
وراس ولادك ..
في الأول وفي التاني ..
دا عمر راسك ..
وراس ولادك..
ما تنحني أبدأً تاني ..
-----------------------
د.شهيرة عبد الهادي

ولنقرأ اليوم الفاتحة ولتدق أجراس الكنائس على أرواح كل ضحايا وشهداء مصر ..

إن الله وملائكته يصلون على النبي يا أيها الذين آمنوا صلوا عليه وسلموا تسليما ..
-----------
جمعتكم جمعة طهر ونقاء لهما صفتي الاستمرار والبقاء إن شاء الله .. اللهم اجعل أول جمعة على ضحايا طائرة مصر للطيران برداً وسلاماً .. ونعزي الشعب المصري كله ونغزي أنفسنا .. ونعزي شركة مصر للطيران .. وندعوا الله أن يجنب مصر كل مكروه .. وستظل مصر هي مصر .. رغم كل المحن.. ولنقرأ اليوم الفاتحة ولتدق أجراس الكنائس على أرواح كل ضحايا وشهداء مصر ..

وافهم بقى يا طيب .. فصدي يا عبيط ههههه

 بمناسبة  وزير الزراعة وحديثه اليوم.. تذكرت  أنه  ..في مصر .. في جميع المصالح الحكومية .. وفي جميع المناصب المستخبية.. حتى ولو كان  منصب خولي أنفار في الغيط   .. يبدأ  اللي عاوز منصب ..  يتمحلس  .. معلش  دي بلغة ستي .. يعني .. يتقرب  ويتقرب ويتقرب   للناس  اللي عاوز  يكون رئيسهم ..  ويسمع ويسمع ويسمع  لكل طلباتهم ..  وينتقد وينتقد وينتقد اللي  كان قبله..  ويوعد ويوعد ويوعد .. أنه حيعالج كل عيوب اللي قبله .. وبعد  ما  الطيبيين  هههههه  .. يعني   بلغتهم  كل عبيط وعبيطة  هههههه  .. يقعدوه  على الكرسي ..   يقوم  إيه بقى .. تبدأ  الثقافة المصرية تشتغل .. ف   يكون هناك  استقبال  حافل  من  كهنة المعبد  .. تنتشر فيه  الزهور  ورائحة البخور   والكهنة  تقوم بدورها المعهود  ..  وبعدين  .. تلاقي .. القطط  السمان  اللي كانوا ممشيين اللي قبله ..  عاوزينه يمشي في  نفس طريق اللي قبله   .. ويقعدوا  يخوفوه  ويخوفوه ويخوفوه .. وبعدين ينغخوه و ينفخوه  وينغخوه .. بتراتيل  الدعاء والسجود للرب الجديد .. لغاية ما يصدق نفسه  أنه بقى  رب ..  يقوم إيه بقى ..  ف  يبدأ ينسى كل اللي قاله ووعد بيه .. ويقوم يمشي زي اللي قبله بالظبط  ..  في نفس المدق .. وكمان فوقه  شوية مكر  مُعدل  .. ما هو استفاد بردوا من اللي سمعه  ..   وفوق ده كمان  عاوز الناس تنافقه    وتسجد  له    ومتتكلمش  ومتغتحش  بقها وتصلي له ركعتين قبل  ما تكلمه  .. ما هو الرب  الجديد   بقى ..   وينسى رب الكون .. وهكذا  يُصنع   صاحب المنصب في مصر حتى ولو كان خولي أنفار ..  وسيجيء اللي بعده واللي بعده   بنغس الطريقة .. وافهم بقى يا  طيب  .. قصدي يا عبيط ههههه ..  وانا منهم وأولهم  ههههههه .. لكن الطيب مبيفهمش مبيتعلمش  .. ما هو طيب بقى ..

 

كلمتين بالبلدي ..( مش عارفة أأقولك إيه يا سادات )

كلمتين بالبلدي ..( مش عارفة أأقولك إيه يا سادات )
-----------------------------------------------------------
جاء السادات للحكم مع بداية السبعينيات وقال : دولة العلم والإيمان .. ومرت 45 سنة .. واحنا دلوقتي نعاني الأمرين من التردي في المنظومة التعليمية .. يعني مبقاش فيه علم ولا بحث علمي .. أما بقى بالنسبة لجزئية الإيمان .. فأنا لا أجرؤ على التحدث فيها .. لأنني أصغر من ذلك .. بس أنا ملاحظة حاجة .. وهي .. كل اللي احنا كسبناه بعد ما السادات خرج الإخوان من السجون ونشر السلفيين في كل القرى والنجوع .. وترك الساحة لكل واحدة عاوزة تعمل داعية إسلامية وتروح المدن الجامعية وتحاضر فيها وكل مسجد وتحاضر فيه ..وكل واحد عاوز يعمل شيخ يروح كل قناة شوية ويستشيخ فيها .. ويروح كل مسجد وزاوية وينشر دعوته فيه .. كل اللي احنا كسبناه .. أن الرجالة في كل القرى دي والنجوع دي وفي المدن كمان .. لبست جلاليب بيضاء قصيرة وبناطيل قصيرة وشباشب بصباع وربت ذقونها .. والستات لبست االخمار مرة والنقاب مرة .. ودلوقتي الإيشارب على بنطلون فيزون وبدي شيفون .. ومرة الإسدال ومرة العبايات .. ومرة ملايس المحجبات .. لكن بيغشوا في كل حاجة .. في المواد التموينية وفي المباني وفي الامتحانات و كل حاجة في مصر بيغشوا فيها .. ناهيك عن الغيبة والنميمة والأحقاد التي زادت والكره الذي تفشى والألفاظ الحقيرة التي تقال والتحدث في أعراض الناس ووو ..... إلخ .. سواء في مجتمع الرجال أو في مجتمع النساء ..وهم بردوا لابسين الجلاليب القصيرة والبناطيل القصيرة والشياشب ومربيين ذقونهم ..و هن بردو لابسات الخمار والنقاب والإيشارب والإسدال .. وبينادوا على بعض يا حاج ويا حاجة.. ناهيك عن الانفلات الأخلاقي الذي انتشر ..والرداءة التي أصبحت منهاج حياة .. إلا من رحم ربي .. ومعرفش بقى هو ده الإيمان اللي كان يقصدوا السادات ولا إيه .. نحن في مصر نحتاج إلى إعادة بناء الإنسان المصري في مجالي العلم والإيمان .. ومعرفش أأقولك إيه يا سادات بقى .. يلا .. الله يرحمك .. لن تعود مصر التاريخ والجغرافيا والحضارة .. إلا بإعادة بناء الإنسان المصري ..
----------------------------
د.شهيرة عبد الهادي
Drshahera Abd Elhady Ibrahem

مهزلة الغش في الامتحانات

مهزلة الغش في الامتحانات ..

=====================

كلنا نعلم مهازل الغش في الامتحانات في مصر بداية من الروضة و الحضانة مروراًً بالمراحل التعليمية في ابتدائي و إعدادي و ثانوي و الجامعة .. لكن ما رأيته من بعض طلاب الدراسات العليا في لجان امتحاناتهم .. قد أحزنني .. ما هذا الغش .. غش غش غش .. وما يحزنني أكثر .. أن هؤلاء طلاب دراسات عليا .. بمعنى أن طالب الدراسات العليا .. المفروض أنه قد أتى بدافع داخلي من نفسه لكي يتعلم .. والمفروض أنه يكون ذو خلق قويم .. وما يزيد حزنك .. أنك عندما تحاول منع الغش وتوجه له إنذاراً بعدم محاولات الغش .. تجد منه إسلوباً في منتهى قلة الذوق وقلة الأدب والسفالة .. ووالله لا أبالغ أن قلت :والبلطجة ..بجد اساليب بلطجة .. بهدف السرقة العلمية والغش ..والقيام ببعض التمثيليات المبنية على الفهلوة والأونطة والكذب واللعب بالتلات ورقات والاستفزاز ..بحيث يهيج اللجنة .. لأ ويدخلك في موضوع ليس له أساس من الصحة مُستغلاً أوضاع البلد عشان يداري على محاولته للغش ويقولك : أنا عاوز اشرب هو انا من الكفار يعني انا من الكفار يعني انا من الكفار ويكررها ويزعق ويصرخ قال يعني مظلوم في تمثيلية رخيصة .. يعني ينتهج منهجاً في منتهى الإسفاف والترخص والبلطجة والأونطة والوقاحة.. حتى يوفر مناخاًً مناسباً للغش له ولزملائه .. ما هذا ..والله أجدني أمام بلطجي وليس طالب .. وما يحزنك أكثر .. أنه عندما تمسك معه أداة الغش ..كالبرشام والموبايل والمسطرة واستخدام أجزاء من الجسم الحرجة عند كل من الرجال والجنس اللطيف .. تجد مهازل .. فإذا ذهبت ملاحظة أنثى لكي تمسك أداة الغش عند طالب رجل.. يتهمها اتهامات باطلة وبقول لها ألفاظ تكسفها وتخوفها .. مفهومة لحضراتكم طبعاً ..وإذا ذهب ملاحظ رجل لكي يمسك أداة الغش عند طالبة .. تقوم باتهامه باتهامات سيئة باطلة .. مفهومة لحضراتكم طبعاً .. وما يحزنك أكثر .. أن تجد كل اللي حواليك يتجمعون عليك من جميع الفئات .. من الزملاء والزميلات ومن الملاحظين ومن ومن ومن .. ده يقول لك .. معلش يا دكتورة.. وده يقول هم غلابة وبيشتغلوا وبيدوا دروس خصوصية طوال االيوم ومش فاضيين للمذاكرة .. وده يقلك عشان مستقبله .. أنا مش عارفة مستقبل إيه لواحد حيبني مستقبله على الغش .. وده يقولك : فوتي يا دكتورة هو فيه إيه ماشي صح في البلد .. واللي يحزنك أكثر وأكثر .. إن من هؤلاء الطلاب من هو مدير مدرسة وبيغش .. ومن هو معلم وبيغش ..ومن هو محاسب وبيغش ..ومن هو طبيب بيطري وبيغش.. ومن هو طبيب بشري وبيغش ..ومن هو أخصائي اجتماعي وبيغش ..ومن هو وكيل مدرسة وبيغش .. ومنهم من هو بذقن طولها نصف متر وبيغش ..ومن هي مدام وسيدة كبيرة في السن وبتغش .. ومنتقبة وبتغش ..ومحجبة وبتغش ..أو من غير حجاب وبتغش .. غش غش غش .. واللي يحزنك أكثر وأكثر .. أن البعض لا يريدون منك أن تمسك حالات الغش .. عشان تبقى الأمور تمام التمام ..وكله تمام ياافندم.. ويقولولك :إن جالك الغصب إعملها بجميلة .. وده يقول : يا دكتوة كبري مخك ..وده يقول يا دكتورة إحنا مش في زمن العدل والحق .. معقولة .. غش غش غش ..وقلة أدب وسفالة وتحايل وفهلوة وبلطجة في السرقة .. من ناس المفروض أنها مسؤولة عن أجيال ..ومسؤولة في مواقع مختلفة ..ومنهم .. من نطالبهم يتولى شؤون البلاد مستقبلا.. وبعدين نقعد نتطاول على كل رئيس يأتي للبلاد.. والله لو ربنا نزل على البلد دي ملاك من السماء أمام اعينهم .. ونحن بخلق االغش هذا .. ما حنفلح أبدا ولا حنتقدم أبداً .. لابد أن نغير من أنفسنا للأفضل بأيدينا نحن .. لابد أن نتقي الله في كل ما نقوم به بأيدينا نحن ..لابد من وجود قوانين رادعة في مجال التعليم والعلم .. مع ضرورة تطبيقها بصرامة وحزم على الجميع بدون استثناء .. وإلا لو تركنا الوضع على ما هو عليه الآن ..سينهار التعليم أكثر ما هو منهار الآن ..ولن تقوم للتعليم قائمة بعد ذلك .. يا سادة من أمن العقوبة أساء الأدب ..

-------------------------------------------

د.شهيرة عبد الهادي

Drshahera Abd Elhady Ibrahem

مات الكلام ...

جمال حمدان .. لكي يكون المفكر جمال حمدان .. قدم استقالته من الجامعة المصرية آنذاك .. لينأى بنفسه عن الصراعات اليومية داخل الجامعة و التي تفتل كل إبداع ولكي يتفرغ للبحث العلمي ويكتب لنا شخصية مصر الجغرافيا والتاريخ والحضارة .. أحياناً .. يبدوا لي ..لو أن جمال حمدان كان عايش في أيامنا هذه التي تشهد مهازل الصراعات وصغائرها في الكليات الجامعية المصرية والتي أثرت على البحث العلمي سلباً بدرجة لا تُحتمل بل أنها قتلت البحث العلمي ودفنته .. كان قدم استقالته من الدنيا كلها .. ولا حول ولا قوة إلا بالله العلي العظيم ..

رسالة إلى الرئيس السيسي ( اانفذ االتعليم والبحث العلميي يا ريس )

رسالة إلى الرئيس السيسي ..
-----------------------------------
البحث العلمي والدراسات العليا في مصر في مأساة .. أصبحت هناك الآلاف إن لم يكن الملايين من رسائل الماجستير والدكتوراة في مصر خاوية من العلم وخلق العلم والجدية والمصداقية .. رسائل الماجستير والدكتوراة التي يتم منحها هذه الأيام ..الآن .. لا تساوي ثمن الحبر المكتوبة بيه .. ونظام الساعات المعتمدة هذا .. والذي شجع على وجود آلاف الرسائل الخاوية .. سيء سيء سيء ..يا ريت يتم إلغاء نظام الساعات المعتمدة .. من أجل إصلاح منظومة البحث العلمي في مصر .. إذا كانت النية لدى الحكومة ..هي إصلاح التعليم والبحث العلمي في مصر ..والذي أصبح مملوءً بالفساد العلمي والخلقي .. سعادة الرئيس السيسي .. لا أمل لنا نحن المواطنين العاديين الذين يريدون الإصلاح لوجه الله والوطن .. بعد الله .. إلا في سعادتكم .. مع ضرورة وجود قوانين يتم تفعيلها في المنظومة التعليمية ككل ..
--------------------------
د.شهيرة عبد الهادي
Drshahera Abd Elhady Ibrahem

إلى متى ؟ ولماذا ؟ وكيف ؟

إلى متى ؟ ولماذا ؟ وكيف ؟
-----------------------------
تغيبت عن الفيس بوك لمدة تزيد عن 6 أشهر بسبب مرض والدتي ونفسيتي المُنهكة .. ومما لاشك فيه أنني قد خسرت ببعدي هذا الكثير .. لأن خلال نلك الشهور .. كانت هناك الكثير من الأحداث .. وبأمانة لم أتابعها أيضاً .. لأن حال والدتي كانت صعبة .. ثم أراد الله أن أعود للفيس ثانية .. بعد أن من الله على حالة والدتي بالاستقرار النسبي البسيط .. وقمت بتصفح مواقع التواصل الاجتماعي .. لمحاولة التواصل معها .. فإذا بي أجد .. أن الحال هي هي كما تركتها قبل أكثر من 6 شهور .. المجتمع الفيس بوكي .. منقسم إلى ثلاث أقسام .. قسم يقوم بنشر حِكم ومواعظ .. منهم من أعرفه على أرض الواقع .. وأعلم أن الشيطان يأتي بواسطة له لكي يتعلم على يديه كيفية إيذاء البشر .. أما القسم الثاني : فهو دائم الشتائم في شخص السيسي و توجيه الاتهامات له ولرجاله بالخيانة والعمالة ووو...... إلخ تحت مسمى الإخوان والسلفيين والثوريين الاشتراكيين والأناركيين ووو ...... إلخ وهو يقوم بذلك بالعند فيما يسميهم العسكر وحكم العسكر .. وقسم ثالث : دائم التطبيل والتهليل والتمجيد لشخص السيسي وإنجازاته و توجيه الشتائم والاتهامات بالخيانة والعمالة للإخوان والسلفيين والثوريين الاشتراكيين والأناركيين ووو ....... إلخ وهو يقوم بذلك بالعند فيهم .. ولم أجد في حدود علمي آراء موضوعية إلا فيما ندر .. وكأننا رواد المجتمع الفيسبوكي .. نتعمد المزيد من الفرقة بين أفراد الوطن الواحد .. وللأسف هذه الثقافة الغريبة على المجتمع المصري هي انعكاس للواقع .. وهي منتشرة في أرض الواقع .. أبناء المهنة الواحدة والقسم الواحد يكرهون بعض .. وأبناء المهن المختلفة والأقسام المختلفة يكرهون بعض .. وأصحاب الديانات والمذاهب المختلفة يكرهون بعض .. الجيران في العمارة الواحدة يكرهون بعض.. ووو ...... إلخ .. إلا من رحم ربي .. والسؤال هو ..إلى متى سنظل هكذا ؟ .. إلى متى سنقوم بتوسيع رقعة الفرقة بين أبناء الوطن الواحد ؟.. ولماذا وصل الشعب المصري إلى تلك الحالة ؟ .. وكيف تمكنت وتملكت هذه الثقافة البغيضة من شعب قيل عنه في جوهر ثقافتنا الإسلامية أنه في رباط إلى يوم الدين ؟.. أين رجال الدين ؟ .. أين رجال الثقافة الرفيعة ؟ .. أين رجال العلم ؟ .. أين الضمير الجمعي لهؤلاء ؟ .. أين الإيثار ؟ .. أين الكلمة السواء ؟ .. أين القول الحق ؟.. أين الرجل الرشيد ؟ .. أهِ وآه يا مصر ..
------------------------------------------
د.شهيرة عبد الهادي
Drshahera Abd Elhady Ibrahem

جمعة طيبة مباركة ......

قال الحبيب المصطفى صلوات ربى وسلامه عليه ..ما من يوم جمعة إلا وفيه ساعة إحابة ..فادعو: معى لعلها تكون الساعة ..يا إلهى أنت ربى ..وعلمك حسبى.. يا من يجيب المضطر إذا دعاه ويا من يكشف السوء عمن ناداك .. ندعوك أن تنصرنا وتسترنا وتجبرنا وتحفظنا ولا تخزنا ولا تفضحنا ولاتذلنا ولا تضلنا ولا تفاجأنا ولا تفجعنا ولا تثقل بنا ولا تثقل علينا وعافنا واعفو عنا ..واحتسبنا يا مولانا من عبادك الصابرين ..أنت ربنا وليس لنا رب سواك ندعوه ..وأنت ولينا فى الدنيا والآخرة.. فتوفنا مسلمين وألحقنا بالصالحين ..وصل اللهم على سيدنا محمد وآله وصحبه وسلم ..
-------------------
د. السويفي

لكل من يكره مصر ..........

لكل منافق .. لكل آفاق .. لكل مرائي .. لكل فاسد .. لكل كاذب .. لكل آفاك ..
لكل من يحرق مصر ..
------
لكل شريف يحب مصر .. لكل مواطن يعمل من أجل مصر .. لكل مصري بيخاف على مصر ..
-----
.. هذه رسالة إليكم ..

الفساد هو الإرهاب بعينه .. الفساد أقوى من الإرهاب ..

لا أبالغ .. إن قلت .. أن كل شهر .. يتم بناء عمارة شاهقة مكونة من 20 دور وعلى أقل تقدير من 12 دور قي الإسكندرية وخاصة في العجمي البيطاش . لدرجة أن بين كل عمارة والثانية .. حارة . عرضها نصف متر .. وهذه مصيبة في حد ذاتها .. وأخطارها كثيرة جداً .. على سبيل المثال .. لو اشتعلت النيران في إحدى هذه العمائر .. لن تستطيع عربة الإطفاء الوصول إليها .. ناهيك عن أن الشقق كلها أصبحت مكشوفة للجار وجار الجار .. وما يترتب عن ذلك من مخاطر خُلقية .. والشبكات ضعفت .. والشقق أصبحت في ظلام ليلاً ونهاراً .. وأيضاً كلها عمارات مهددة بالانهيار .. لأنها كلها مخالفات .. لابد من وجود دولة قوية حازمة صارمة تضرب بيد من حديد على كل فاسد .. لم أكن أتوقع أن ثورة 25 يناير 2011م ستجعل بعض أبناء الشعب منعدمي الضمير يستغلون بلدهم مصر هكذا .. إن الثورات تبحث عن الجمال لكي تُميت القبح .. لكن في مصر .. للأسف لا يحدث ذلك بسبب الفساد ومنعدمي الضمير في المحليات الذين يحولون كل جمال إلى قبح .. إن الفساد هو الإرهاب بعينه بل أقوى من الإرهاب ..
‫#‏كانت__ثورة_وكانت_حلماً‬
‫#‏نريد_دولة__قوية___حازمة‬

لن تُحرق مصر .. وستبقى مصر ..

معقولة .. مسلسل الحرائق المنتشر في مصر ده .. في منطقة عرب العيايدة وفي الرويقي وفي العتبة وفي مخزن بالقصر العيني وفي العاشر من رمضان والشرقية وبالنخيل في الواحات وبمطعم في الدقي .. كل ده في يومين .. كل دي حرائق .. حفاً إن الحرائق داخل القلوب .. نعم داخل قلوب من يكرهون البلد دي .. كل ده عشان الكرسي .. لعنة الله على الكرسي .. لعنة الله على الإرهاب وتجار الدين وتجار الوطنية وتجار الحروب .. لعنة الله على من يحرق مصر .. لعنة الله على من يريد حرق مصر .. وإن شاء الله ستبقى مصر.. ولكن شريطة أن تكون دولة قوية حازمة صارمة قادرة على إطفاء كل أنواع الحرائق .. فادرة على القضاء على الفساد الإداري والخلقي .. إن الفساد أخطر على البلاد من الإرهاب .. بل هو الإرهاب بعينه ..

شهادة تقدير لي .. من طلابي الغاليين .. ألف شكر يا غاليين ..

الحمد لله كما ينبغي لجلال وجهه وعظيم سلطانه .. اليوم الأحد 8 / 5 /م 2016 م .. استلمت هذه الشهادة التي هي تاج على راسي من فوق ..من طلاب الدراسات العليا بالدبلوم العامة بكلية التربية بمرسى مطروح والتابعة لجامعة الإسكندرية وكلية التربية بالشاطبي.. عن طريق الكلية .. قيمة هذه الشهادة البسيطة والمكتوبة على ورق بسيط .. أنها .. من الطلاب والطالبات أنفسهم وبوازع من داخلهم .. وليست من أي جهة أو موجهة .. ألف شكر طلابي وطالباتي الغاليين .. بالرغم أني كنت بانخانق معاهم كنير  .. لكن واضح أنهم على قدر المسؤولية وفهموا أن هدفي كان هو مصلحتهم أولاً وأخيراً.. وهكذا وكما قلت بالامس إذا فهم الطالب المصري شخصية من يُعلّمه ووجد منها عطاءً سيعطيها التقدير..

حبيبتي الغالية .. مصر ..

فيها اللي فيها .. ومهما كان فيها ..
أنا مش حاقول فيها لا اخفيها ..
لأ .. حاقول ربي يبارك فيها ويخليها ..
حبيبتي الغالية مصر ..
وكل صالح عايش فيها وبيخاف عليها..

---------------------------------------
د. شهيرة عبد الهادي
Drshahera Abd Elhady Ibrahem

رسالة إلى الرئيس السيسي .....

رسالة إلى االرئيس السيسي
----------------------------------
سمعت أن التعليم المفتوح سيتم إلغائه .. لو هذا الخبر صحيح .. يبقى ألف مبرووك .. لأنه كله غش غش غش في كل شئ ومن كل شئ.. وانفلات علمي ناهيك عن الانفلات الخلقي .. يعني كله فساد علمي وفساد خلقي .. هو مهزلة بجد.. مهزلة بجميع المقاييس.. وأتمنى إلغائه نهائياًً .. وعقبال ما يتلغى نظام الساعات المعتمدة الذي أفسد الدراسات العليا و البحث العلمي في مصر .. االمطلوب تطهير التعليم من الفساد اللي فيه يا ريس ..لن تنهض بلد في الدنيا إلا بالتعليم الطاهر الحق النزيه الشريف.. الحمل كتير وكيبر يا ريس .. الله معك ..
-----------------------------
د.شهيرة عبد الهادي

هم يخترعون ويجيدون ونحن نستهلك فقط ولا نجيد إلا الكلام ...

https://www.facebook.com/abdaa3/videos/883576688419898/?fref=nf

حسبنا الله ونغم الوكيل .......

ما حدث في الساعاات الإولى من صباح اليوم في حلوان يُدمي القلوب .. والله ستعيش مصر رغم أنف الارهاب .. الأوطان لا ُتبنى بالسلاح ولكن ُتبنى بالعمل والكفاح.. الله يرحم شهداء مصر من الشرطة .. هم عاوزين بلد من غير شرطة ومن غير جيش ؟؟ طب بلد من غير شرطة ومن غير جيش تعيش ازاي ؟؟؟ ..أنا مش عارفة !!!!.. اللهم رد كيدهم في نحورهم ..

الرأي ده كتبه أخ سوري وانا جبته لحضراتكم كده زي ما هو منتشر على الفيس .. ما آراء حضراتكم حوله ؟؟؟؟؟؟؟؟؟؟؟

الرأي ده كتبه أخ سوري وانا جبته لحضراتكم كده زي ما هو منتشر على الفيس .. ما آراء حضراتكم حوله ؟؟؟؟؟؟؟؟؟؟؟

تعال سلم فريد الأطرش .. جبر الخواطر على الله .. مش طالب منك غير طلة .. تعالى سلم .. دي بقى لحضراتكم كلكم لأنكم وحشتوني .. تعالى بقى و سلم ههههه

جبر الخواطر على الله .. مش طالب منك غير طلة .. تعالى سلم ..
دي بقى لحضراتكم كلكم لأنكم وحشتوني .. تعالى بقى و سلم ههههه

مغ بعض طالباتي بشعبة طفولة في كلية النربية -جامغة الإسكندرية .. ولي معهم قصة ..

الصورة دي يوم الثلاثاء 29 / 3 /2016م مع بعض طالبات نهائي شعبة طفولة بكلية التربية جامعة الإسكندرية .. قابلوني وأنا نازلة على السلالم لإعطائهم المحاضرة وشرفوني بطلبهم أخذ الصورة دي معاهم..وأنا أول مرة أقوم بالتدريس لهم في هذا الترم من العام الدراسي الحالي 2015/2016م..وكنا بنقول واحنا بنتصور "تشييييييييييييييييييز"  هههه شقاوة بقى .. وأحسن حاجة في شغلانتنا دي ..أن الواحد مبيحسش أنه عجز أبداً  ههههههه .. لأنه كل سنة بيتعامل مع دفعات من الطلاب والطالبات صغيرين.. فبيفتكر أنه لسه صغير زيهم  ههههه ..وشوفوا بقى الكبير لما يدلع  هههه .. المهم .. أن لهذه الدفعة قصة معي سأسردها باختصار لحضراتكم ..وهي..أن ..الدفعة دي سمعت عنها أنها دفعة بتغلب الدكاترة شوية وشقية  ههههه..ولقد لاحظت ذلك فعلاً وعانيت منهم و معهم أول محاضرتين لدرجة أنني كنت أخرج زعلانة من المحاضرة ..لكن..لما شرحت لهم منهاجي في الحياة عموماً وفي التدريس العلمي خصوصاً وهو " الموضوعية" على قدر الطاقة ..وقلت لهم: أن الفيصل عندي هو الالتزام الخلقي ثم العلمي ..والعدل البشري بين الطلاب والطالبات ..وأنني لا أتبع منهاج الواسطة أو المحسوبية أو المحاباة لأحد.. وإنما أتحيز لفكر وعلم فقط ..و أن الطريق الوحيدة للوصول إليًّ هي ورقة الإجابة فقط لا غير.. وانني لا أعطي دروساً خصوصية ..ولا أعمل مذكرة امتحانات خاصة بي وأبيعها للطلاب .. ولا أقوم بعمل بحوث بأجر لأحد.. ولا بآخذ هدايا من حد .. وأن من حقكم عدد ساعات المحاضرة بالكامل.. ومن حقكم الرد على كل سؤال ..ومن حقكم الشرح بالقلم على السبورة ..وكل ما أطلبه منكم الالتزام الخلقي والعلمي ..وجدت منهم كل استجابة واحترام وتقدير ثم في الآخر الحُب ..أنا لا أتحدث عن نفسي بقدر ما أريد توصيل رسالة..وهي :أن الطالب المصري إذا وجد فانوناً والنزاماً ودستوراًً يُطبق ويُحترم من قٍِبل كل من يُدًّرسون له ويُعلًّمونه ومن قبل من يُديرون العملية التعليمية وأيضا يُحترم من جميع الطلاب والطالبات .. سيكون طالباً ملتزماً .. .وينطبق ذلك على كل شخصية في مصر وعلى كل مجالات الحياة في مصر ..الحل هو القانون والدسنور واحترامهما وتطبيقهما بعدل بين الناس عدلاً بشرياً على قدر طاقة البشر ..للقضاء على الفساد المنتشر في كل سنتيمتر في مصر..وأخيراً أتمنى لهذه الدفعة الرائعة التي أحببتها من قلبي التوفيق والنجاح كما أتمناهما لكل طلابي وطالباتي في الكلية وعلى مستوى الجمهورية..
----------------------------
د.شهيرة عبد الهادي
Drshahera Abd Elhady Ibrahem

وحشتوني ....

السلام عليكم ورحمة الله وبركاته ..والله العظيم وحشتوني .. والدنيا من غير حضراتكم كئيبة بجد .. بجد 6 شهور وأكتر أغيبهم عن حضراتكم كتير أوي .. بالنسبة لي .. لكن ما باليد حيلة ..ودي إرادة ربنا .. وأشكر كل فاضل وفاضلة قد سألوا عني ..سواء ع الموبايل أو الأرضي أو في الرسائل .. وأشكر كل من هنأني بيوم ميلادي سواء على صفحتي الشخصية أو في ملتقى محبي الله والوطن أو في الرسائل .. أثناء فترة غيابي .. التي كانت بسبب مرض والدتي ومرافقتي لها .. ومحاولة التوفيق بين ذلك والالتزام بمواعيد عملي .. بجد مليون مليون شكر .. وأنا بدون حضراتكم ناقصني كتير ..لأ مش ناقصني كتير بس .. دا ناقصني كل حاجة .. بأمانة وحشتوني وافتقدتكم ..
------------------------------
د.شهيرة عبد الهادي

مشادة بين وائل الإبراشي وفاطمة ناعوت .. بقلم د.شهيرة عبد الهادي

ويارب الشعب هو اللي يكسب في الآخر..
----------------------------------------------------
في حلقة العاشرة مساءً اليوم 26 / 10 / 2015م  ..
وموضوع الحلقة أن الضيفين المسيحيين الأستاذ روفائيل والأستاذ جاد الرب يتهمون فاطمة ناعوت بازدراء الدين المسيحي واستخدام الدين الإسلامي تارة والدين المسيحي تارة آخرى للفوز في الانتخابات .. وأنها قد كتبت في مقال أن الأستاذ جاد الرب قد أسلم على يديها .. وفيما يلي ما حدث في هذه الحلقة ..
1-مشادات قوية بين  وائل الإبراشي وفاطمة ناعوت  المرشحة لبرلمان 2015م  عن دائرة  مصر الجديدة..
2-فاطمة ناعوت تقول  له : أنت بتكذب يا وائل .. فيرد عليها .. لأ إنتِ اللي بتكذبي ..
3-ناعوت  : إنت يا وائل وفريق إعدادك كنت بتتحايلوا عليا عشان آجي البرنامج وأنا جيت عشان خاطرك إنت .. ويرد  الإبراشي  .. لأ .. إنت جاية عشان الجمهور..
4-ناعوت  : إنت جايب لي  ضيفين أنا معرفهمش .. ووائل يرد عليها .. يعني إنت بتتأففي من الضيوف ..
5-ناعوت  ..وكمان  إنت اللي بتتصل  بناس كلها ضدي .. والإبراشي يرد .. أنتِ شخصية عامة والمفروض تواجهي الناس كلها ..
6-ناعوت  : إنت كده خسرت شخصية .. ووائل يرد .. مش مهم ..
7-ناعوت  : لو كنت عاوزة أصوات المسيحيين كنت اترشحت في شبرا..
8-ناعوت  : أنا أكتب بإسلوب أدبي  وأنا غير مسؤولة عن  عدم فهمكم له -موجهة حديثها للضيوف-  ثم تستطرد قائلة: هو لو المتنبي  كتب والناس مفهمتهوش يتحاسب المتنبي ..  وأنا كاتبة أكتب في جرائد  معتبرة   وحاصلة على جوائز عالمية  في الأدب وفي الهندسة المعمارية ..
9-ناعوت : مقالي الذي تسبب في مشكلة للأستاذ روماني جاد الرب  الناشط الحقوقي  المسيحي  ..مقال ساخر ينتمي للأدب الساخر  شديد الوضوح .. وأنا مش ذنبي أن أنت  ما فهمتهوش -موجهة كلامها للأستاذ روماني-..ولو واحد قرأ لـ طه حسين ولا للمتنبي وما فهمش  يروح يحاسب طه حسين ولا المتنبي .. ولا يروح يتعلم يقرأ الأول .. وأنا مش ذنبي أنك مفهمتش المقال ..  واتعلم تقرأ الأول .. إنتوا ما بتقرأوش .. موجهة كلامها للأستاذ روفائيل والأستاذ روماني ..
10-ناعوت  : أنا أدافع عن المسيحيين منذ 15 عام وليس الآن  وأنا مهدر دمي عشان  مساندتي للمسحيين ..ولو كنت عاوزة أصوات المسيحيين كنت اترشحت في شبرا.. مصر الجديدة مفيش فيها مسيحيين كتير ..
11-ناعوت : أنا دخلت الانتخابات  وكنت مدفوعة دفعاً للتخلص من جزب النور .. والآن ألا وقد  لفظه الشعب العظيم ..فلم أعد متحمسة للانتخابات البرلمانية لأنها ستعطلني عن أعمالي الأدبية..
12-ناعوت : أنا أرفض وصف الانتخابات بأنها معركة إنتخابية لأن  من يتعارك فهو يتعارك  ويدخل البرلمان ليرتزق ..
13--ناعوت  : أنا أعتبر البرلمان القادم هو برلمان ما قبل البرلمان الحقيقي  ..

***هذا وقد انتهى اللقاء بمشادات حادة بينهما .. بين كل من وائل الإبراشي وفاطمة ناعوت  التي هي مرشحة لبرلمان 2015م    .. وكان  الغضب واضحاً على وجه كل منهما .. ويا رب الشعب هو اللي يكسب في الآخر ..
.

" شاسية" رؤية وعقلية الإعلاميين بعافية أوي ..بقلم د.شهيرة عبد الهادي

لما تتعمل حلقة ومواجهة بين شيخ أزهري والطبيب أسامة القوصي حوالين "الشاسيه " ويقعد المذيع يضحك ويخلي الشيخ الأزهري وشه يحمر ويضحك .. يبقى "شاسيه "رؤية وعقلية الإعلاميين بعافية أوي .. حتى ولو كان الهدف هو توضيح التحولات المتطرفة العكسية و بصورة 180 درجة في شخصية المتطرفين دينياً سابقاً .. ‫#‏ودي_بقى_أفضل_طريقة_لتخريب_شاسيه_عقلية_أي_شعب_‬

المضحكات المبكيات في بلاد عاوزة تعالج النكبات .. بقلم د.شهيرة عبد الهادي

دلوقتي الإعلام .. بيعمل مقابلات مع اللواء طارق المهدي .. اللي كان محافظ الإسكندرية قبل المهندس هاني المسيري مباشرة .. واللي الإعلام شالوا بردوو عشان مياه الأمطار اللي كانت مالية الشوارع في عهده وهو محافظ .. وشفنا نفس الناس والمراتب والحصان والشوارع اللي عايمة في المياه في عهده .. والمهدي بيقول أن المياه كانت في فترة توليه المحافظة في 4 شوارع بس .. ودخلنا في مزاد هههههههه.. تخيلوا حضراتكم دخلنا في مزاد .. وكل واحد حيبين نفسه أنه كان عنتر زمانه .. معقولة كده .. هي دي ثقافة المسؤولين في مصر.. معقولة دي تكون طريقة تناول الأزمات وحلول المشكلات في مصر .. فعلاً هي دي بقى .. المضحكات المبكيات في بلاد عاوزة تعالج النكبات .. أنا مش عارفة هو الإعلام شغلته إيه بالظبط .. مش قلت لحضرتكم إحنا في مرحلة شعارها " محافظ لكل نوة " بالإسكندرية ..
‫#‏يكنش_الإعلام_هو_اللي_بيحكم_مصر_‬
---------------------------------------------
المصدر:قناة الحياة :مع لبنى عسل: الإثنين 26 / 10 / 2015م

حول تجميد الـ 10 درجات الخاصة بالحضور والانضباط في المدارس .. بقلم د.شهيرة عبد الهادي

إيه التخبط ده ..
وزير يقول : ضرورة وجود 10 درجات حضور وانضباط لتلاميذ المدارس ..
الوزير اللي بعده يقول: إلغاء الـ 10 درجات حضور وانضباط لتلاميذ المدارس .. ‫#‏يا_ترى_الثالث_حيقول_إيه_‬

ستات مصر والانتخابات .. بقلم د.شهيرة عبد الهادي

ستات مصر في أي استحقاق انتخابي بيكونوا أربع أضعاف رجالة مصر عند الإدلاء بأصواتهم في الانتخابات .. والله أتمنى مجلس النواب المصري يكون كله من الستات المصريات .. بصفة عامة البحوث أثبتت أن النساء أقل فساداً من الرجال .. وبصفة خاصة الست المصرية أقل فساداً من الرجل المصري ..

مجلس شعب " نواب المنفوح " . بقلم د.شهيرة عبد الهادي

بدون ذكر أسماء .. والنائب المنفوح ..
-----------------------------------------
كل مرحلة لمجلس من مجالس نواب مصر ولها شعارها .. فقد إتصل طبيب أمراض نفسية بأحد القنوات المعروفة في برنامج المُذيع المعروف و التي استضافت أحد الفائزين المعروف أيضاً .. لتهنئته بفوزه من أول مرة في انتخابات برلمان 2015م .. وقال هذا الطبيب الذي هو صديق شخصي للنائب الناجح .. أن النائب المذكور هو من آل البيت وأنه دائماً يزور آل البيت .. وأنه نجح عشان هو " منفوح " من آل البيت .. وأخذ يُكرر أن النائب " منفوح " دي أكثر من خمس مرات.. والنائب نفسه قال عن نفسه في نفس اللقاء : أنا كنت دايخ من المجهود بتاع الانتخابات .. وسألتهم هو الفجر حيدَّن على كام .. قالولي حيدن على الساعة أربعة .. فقلت ليهم ..يلا بينا نصلي الفجر في مسجد كذا .. صليت الفجر ورجعت ..لقيتني ناجح في البرلمان .. رد عليه الطبيب النفسي وقاله : طبعاً أمال ايه مش إنت صليت في مسجد كذا .. مش باقولك إن إنت " منفوح " .. واضح كده أن شعار المرحلة الحالية للبرلمان الحالي .. هو .. " النائب المنفوح " .. وبدون ذكر أسماء .. بدل ما اتحول أنا من مواطن " مفقوع " إلى مواطن " منفوح " وحطوا انتوا النقطة بقى .. وربنا يستر عليَّ وما اتنف... ش .. فاكرين مجلس شعب " نواب القروض " .. وفاكرين مجلس شعب " نواب الآذان " .. إحنا دلوقتي بقى .. واضح كده .. أننا داخلين على مجلس شعب " نواب المنفوح " .. وربنا يستر عليكِ يا مصر ..

مشكلتنا في مصر هي " تنانين الفوضى" .. بقلم د.شهيرة عبد الهادي

مشكلتنا  في مصر  عدم احترام النظام والقانون  والعشوائية  لدرجة الهمجية  والفوضى  في تصرفاتنا  وأقوالنا وأفعالنا  وأيضاً  عدم تطبيق  علوم  الإدارة .. بالأمس الخميس 22 / 10 / 2015م .. كنت أباشر عملي  في الإشراف على التربية العملية بإحدى المدارس النموذجية .. وخدوا بال حضراتكم من النموذجية دي  عشان اللي جاي قدام .. وهي روضة  وابتدائي وإعدادي ..  أنا كان  مجال عملي  مرتبط فقط  بمرحلة الروضة " الطفولة " .. للأمانة  بالنسبة للروضة  دي .. هي تعتبر من أفضل الأماكن التي   قمت بالإشراف عليها .. إلا أنني قد لاحظت أنها لم تعد بالمستوى السابق  التي كانت  عليه.. ثم لاحظت وشاهدت  الآتي  ..  ما أن جاءت الساعة 11 ظهراً  وإلى الساعة 11.45  ظهراً .. وهي ساعة  بداية خروج الأطفال من الروضة .. إلا ووجدتني ومعي الموجهة ..  كما لو أننا  نعيش  في شارع وليس مكان  تربوي تعليمي محترم مثل هذا .. بدأ  الأهالي  والسائقين .. أهالي الأطفال  والسائقين ..وبصوت عالي جداً جداً جداً  يقفون على بوابة الروضة ..ويُنادون على أطفالهم  بصوت  لا يمكن تخيل طريقته ونبراته العالية جداً .. أما الطامة الكبرى  بقى ..  فهي عندما جاءت الساعة  الثانية عشرة  ظهراً .. فإذا بي  ومعي الموجهة  ..  نرى مشهداً لا يمكن تصوره .. رأينا  حوالي  30 سواق  توناية وميكروباس  يدخلون بأنفسهم .. بطريقة عشوائية همجية  فوضوية .. إلى حجرات الدراسة .. كما لو أنه هجوووووووم تتاري ..  يقتحمون  الروضة ..  ويدخلون الحجرات الدراسية نفسها  والتي بها معلمة ..  وينادون على الأطفال .. ويقومون بوضعهم في طابور.. ثم يقومون بعدَّهم .. ويشوفوهم كام طفل ..ثم يأخذونهم إلى الميكروباس أو التوناية  .. وهم بيقولوا لهم  ..  إمشوا ورايا  إنت وهو ..  يلا ورايا .. والمصيبة السودة أن الدادات قاعدين.. ومفيش  حد  فيهم  عاوز يتحرك ينظم العملية   مع أن ده  من صميم  عملهم .. وقاعدين يتفرجوا على السواقين والأطفال والعشوائية والهمجية  والفوضى .. بأمانة وبجد مفيش حد في  مصر  عاوز يشتغل ويؤدي عمله كما ينبغي .. وطبعاً سواق التوناية عاوز يخلص من الأطفال دول ويوصلهم بيوتهم  عشان يروح يجيب دور تاني في مكان تاني  وكده يعني  .. وقد أبدى كل منا  .. أنا و الموجهة    رغبته  في  لفت نظر مديرة الروضة   لهذه الجزئية .. إلا أنني لاحظت أن الموجهة  مُتحفظة  في الحديث مع المديرة .. ليه ؟ الله أعلم  .. فقمت  أنا  و تحدثت بمنتهى الود مع مديرة الروضة  ..واقترحت عليها حلاً تنطيمياً  لتلافي هذه العشوائية والهمجية .. والسيدة للأمانة متعاونة ومحترمة  واعترفت أنها فشلت مع أولياء الأمور ومع السواقين  في تنظيم  هذه العملية .. وأنا بجد وبأمانة .. مصدَّقاها  .. وإن كانت لابد وأن تتحمل تبعة الإدارة  بقدرة  وحسم أكثر من ذلك  .. التعليم في مصر يواجه مشاكل عدة من بينها اقتحام أولياء الأمور والسواقين للمؤسسات التعليمية  دون مراعاة لأي نظام أو قانون .. وفي مدارس آخرى يتعدون على مدراء المدارس والمعلمين بالألفاظ غير الائقة وأحياناً بالضرب .. التعليم في مصر  يعاني  ويحتاج إلى تغيير للأفضل
.. وطول ما تنانين الفوضى موجودة في التعليم بمصر لا فائدة ..

ما لفت نظري في حديث هيكل مع الحديدي .. بقلم د.شهيرة عبد الهادي

لفت نظري في  الجزء الذي سمعته من حديث الأستاذ محمد حسنين هيكل مع لميس الحديدي اليوم الجمعة 23 / 10 / 2015م في برنامجها على قناة cbc  والمذاع على الهواء  من ثواني ..عدة نقاط ..
1-هيكل يقول: أنا عايش في ألغاز ومش قادر أفهم إيه اللي بيحصل لأن مفيش توضيح لكل ما حدث ويحدث : مثلاً: موضوع أن ورثة المشير أبو غزالة بيتخانقوا على الإرث  اللي  تركه  وهو  مُقدَّر  بـ 100 مليون دولار في بنوك  أمريكا والتحقيق جاري في أمريكا حتى هذه اللحظة وممكن أجيب صور التحقيقات لكِ  حالاً هي معي -موجهاً كلامه إلى لميس-.. ثم مثلاً: موضوع السفاري مع فرنسا والدور الذي لعبته المخابرات في إثيوبيا .. أما بالنسبة لما حدث في مصر في الأربع سنوات الماضية فلم يتطرق إليها بعمق ؟؟؟!!!!
2-هيكل يقول:على الرئيس عبد الفتاح السيسي أن يوسع الدائرة من حوله بمعنى وجود دوائر عمل دائمة من حولة مثل دائرة للأزمات ودائرة لالانتخابات وهكذا ..
3-هيكل يقول : على الرئيس ومعاونيه محاولة القيام بخطاب مقنع للشعب ..
4-هيكل يقول :الآن أصبح القرار في الشارع المصري والأمور قد تغيرت ..
5-هيكل يقول: عزوف الناس عن الانتخابات البرلمانية يجب أن تتم دراسته بوضوح وصراحة من خلال كشوف واضحة وإحصاءات واضحة..
6-هيكل يقول: أنا كنت صديق صدوق للرئيس السادات إلى أن ذهب إلى إسرائيل في تل أبيب وحتى كان الإسرائيلين نفسهم لايعرفوض أنه رايح ليهم  وليس هكذا تحل المشكلات الدولية ..
7-هيكل  يقول: يجب أن تكون مصر في قلب  مشكلات الدول العربية  وألا تكون بعيدة عن اليمن والسعودية وسوريا والعراق وليبيا وووو..  ولابد من علاقات لها مع إيران ..
8-هيكل يقول : أنه من ضمن أسباب انخفاض نسبة  التصويت في الانتخابات البرلمانية 2015  أن الناس مش حاسة بالتغيير للأفضل .. وعاوزة حد يقنعها بإمكانيات الدولة بصدق ..
9-هيكل يقول : الإعلام  لا يحكم  وإنما يوضح ..
10-أما السيدة لميس وللأسف بـ تُحِّمل الشعب المصري المسؤولية وتقول " أنه مش عارف يختار برلمان كويس يُمثله " .. يا خسارة يا إعلامية .. وحسبنا الله ونعم الوكيل .. بردوو الشعب هو اللي مش عارف يختار والا ظروف قانون الانتخابات وترشح أعضاء الحزب الوطني السابق وطريقة القائمة اللي محدش عارفها والفردي اللي مترشح فيه عدد لا نهائي والحملات الإعلامية التي كانت تمهد لفوز قائمة بذاتها بإسلوب مُقنَّع   والإحباط اللي أصاب الناس ووو..... إلخ

الازدواجية عند الإعلاميين .. بقلم د.شهيرة عبد الهادي

أنا مش عارفة .. كيف يشتكي مُذيع من درجة الانحطاط والتدني في الأعمال السينمائية والتليفزيونية قولاً ومشاهد .. ثم يستضيف شخصية .. تهاجم هذه الأعمال .. بنفس درجة الانحطاط و التدني في الألفاظ التي يستخدمها أثناء انتقاده لتلك الأعمال .. ومُصر على استضافتها مراراً وتكراراً لتقول نفس الألفاظ المنحطة وبنفس التدني ..

حول تجميد 10 درجات الحضور والسلوك بالمدارس .. بقلم د.شهيرة عبد الهادي

إيه التخبط ده ..
وزير يقول : ضرورة وجود 10 درجات حضور وانضباط لتلاميذ المدارس ..
الوزير اللي بعده يقول: إلغاء الـ 10 درجات حضور وانضباط لتلاميذ المدارس .. ‫#‏يا_ترى_الثالث_حيقول_إيه_‬

باي باي : مسيري " بس يا ترى هو ده الحل .. بقلم د.شهيرة عبد الهادي

باي باي " مسيري " ... اللي بعده ..
واضح كده أن المرحلة القادمة شعارها " محافظ لكل نوة " بالإسكندرية .. ‫#‏والله_العظيم_لو_جابوا_لمحليات_مصر_الفاسدة_رئيس_من_السماء_ما_حيعرف_يعمل_معاهم_حاجة_دول_فسادهم_ممنهج‬
خلص الكلام ..

أكتب كلمة حق من واقع لا يعرف الحق .. بقلم د.شهيرة عبد الهادي

هذه ليست نظرة سوداوية .. وإنما رد فعل ونتاج لموقف حدث لأحد الزملاء الحالمين مثلي .. استدعى لديَّ هذا الواقع المؤلم .. وجعلني أكتب كلمة حق من واقع لا يعرف الحق .. وكلمتي الواقعية هي ..
مجتمع الفيس هو :مجتمع الحُلم الجميل .. مجتمع الأمل النبيل .. هو مجتمع المدينة الفاضلة التي نتمناها .. هو مجتمع الحب والترابط والتوحد الذي نصنعه لكي نستعيض به عن ما نراه في الواقع الأليم .. هو مجتمع الثورة العلمية والأدبية والأخلاقية التي ننشدها .. هو مجتمع الرومانسية فالثورة على كل فساد هي منتهى الرومانسية .. هو مجتمع الكلام الذي يُشبه الفعل ويتمنى التفعيل .. أما مجتمع الواقع : فهو مجتمع الضبِاع التي لا تشبع .. مجتمع الأسود المفترسة .. مجتمع التماسيح.. مجتمع الثعابين .. مجتمع الحية أم راسين .. مجتمع الضغينة .. مجتمع الحقد والحسد والكراهية.. مجتمع الخيانة .. مجتمع المؤامرات .. مجتمع المصالح الشخصية.. مجتمع السلبية ..مجتمع الغيبة والنميمة .. مجتمع النفاق والرياء.. مجتمع المكر والخداع .. مجتمع اللئيم الخبيث القذر الذي يضر غيره ويعمل له العمل وبعد أن يتم تدميره يلعب دور من يفك هذا العمل لكي يكون هو صاحب الفضل عليه .. مجتمع الفُرقة والتشرذم .. مجتمع فيه الكبير الفاسد بـ يأكل الصغير الشريف .. هذه هي الحقيقة المرة .. إلا من رحم ربي ..
-------------------------------------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

ألف مبرووووك يا مصر ...

تهنئة إلى حبيبتنا مصر بمناسبة فوزها بمقعد غير دائم بمجلس الأمن اليوم .. وقد حصلت مصر على 50 صوتاً زيادة عن المطلوب للفوز بهذا المقعد.. ما يهمنا هي حبيبتنا مصر .. مصر اللي في دمنا .. مهما كان ومهما يكون .. يا رب مصر .. تحيا مصر ..

عام هجري جديد سعيد 1437 على حضراتكم يا أهلي وناسي يا كل أصدقائي النبلاء الأفاضل المحترمين ..

عام هجري جديد سعيد 1437 على حضراتكم يا أهلي وناسي يا كل أصدقائي النبلاء الأفاضل المحترمين ..

لقطات م اللي شفته في الدعاية الانتخابية النهارده .. بقلم د. شهيرة عبد الهادي

إيه  العدد الرهيب اللي مرشح نفسه للانتخابات   البرلمانية  ده  وانا معرفش منهم ولا واحد  .. و إيه العدد اللا نهائي من يفط  الدعاية  والعربيات الربع نقل   اللي شايلة  صور المرشحين  ومشغلة  الأغاني الوطنية الحماسية  وبشرة خير وتسلم الأيادي  اللي مالية البلد  بالشكل ده .. وإيه الفلوس اللي بتتصرف دي  واللي ممكن بالشكل ده توصل لمليارات  .. وح أقول   بقى ع اللي شفته   ..  أنا شفت لشاب منهم عنده 28 سنة  من عائلة معروفة عندنا من العرب  فردي مستقل .. عدد رهيب من اليفط  ومتكلفة  يعني متكلفة  فلوس كتير أوي ومغطية كل المباني .. ولأني بـ شجع الشباب  بأمانة  قلت اما اركز شوية  معاه  ..  شفت للشاب ده إيه بقى ..  بالإضافة للأعداد الرهيبة من اليفط الخاصة به ..شفت شاشات عرض في كل مكان وهو بيلقي خطاباته في المؤتمرات اللي عاملها .. وجمب كل شاشة  قاعدين نفس قاعدة الإخوان زمان .. وعاملين ترابيزة وبيكشفوا للناس من على الكمبيوتر عن رقم  لجنتهم ورقمهم في الكشف .. وده طبعاً عشان ينتخبوا الشاب ده .. وبيوزعوا بورشور خاص به  موضح فيه أنه  حيعمل الآتي : حيصلح التعليم والصحة  والمنظومة  الأمنية وح يراعي ذوي الاحتياجات الخاصة  وح يهتم بالمواطنة ويعمقها عند الشعب وكمان ح يصلح الاقتصاد وح يطور أسطول الصيد المصري  وح يطور الزراعة  وح يهتم بالمرأة  أما العمال بقى فحيعيشهم في نعيم   وبالنسبة للشباب بقى  ح يبني بيهم البلد  وح يحل كل مشكلات الدولة  وقاطرة التنمية  الاقتصادية بالذات  ح يآخد باله منها  وبعدين ح يستخدم الإسلوب الاقتصادي المعاصر B.O.O.T في تنمية الدولة المصرية بدون تحميل الموازنة العامة  للدولة المصرية أي أعباء مالية مثل تنمية السواحل المصرية  بجميع أنواعها  وعمل مجتمعات سكنية جديدة  وتنمية العشوائيات ووو... إلخ .. شفتوا  بقى لما يقعد ع كرسي البرلمان ح يعمل إيه .. ح يعمل كل اللي فات ده .. يعني مصر حتبقى  آخر حلاوة  .. المهم حضراتكم عارفين أن انا  يعني ساعات باكون مشاغبة باعتقد أن دمي خفيف  يعني .. خليت الشاب يكشفلي على رقمي الانتخابي قال  إيه أنا مش عارفة .. وقلتله  هو إيه الموضوع ..هو الشاب فلان الفلاني ده ملياردير ..هو جايب الفلوس دي كلها منين  وهو عنده 28 سنة  دا فيه شباب وصل 45 و50 سنة ومش قادر يتجوز ويعمل بيت .. رد قالي: لأ أصل احنا من عائلة فلان واحنا عائلة كبيرة والكل ساهم في الحملة دي .. قلتله طيب هو في الصورة هنا  اللي ع اليفط من غير ذقن  لكن في المؤتمرات له  ذقن " دوجلاس ليه " ..قالي .. والله يا حاجة ح يحلقها .. هو بس عشان من مؤتمر لمؤتمر ومبينامش خالص مش فاضي يحلق وأول ما ح تخلص الانتخابات  ح يحلقها علطول .. بس احنا عاوزينك تنتخبيه يا حاجة   شفتي برنامجه حيعمل فيه حاجات كتير  أوي  .. قلتله  إن شاء الله حانتخبه  .. قالي يعني اقتنعتي ببرنامجه ..قلتله :لأ   لأنه كاتب زي كل اللي مترشحين بيقولوه وهو مش حيعمل أي حاجة م اللي قالها أول ما يقعد ع الكرسي  والمهم يآخد الكرسي .. أنا حانتخبه عشان هو شكله حلو وينفع  يبقى نجم سينمائي وطمن مراته أنه شكله حلو .. وهو فعلا شكله وسيم وحلو  : قالي : والله  يا حاجة هو مش خاطب ولا متجوز خالص  يعني حيآخد باله م البلد .. هنا بقى انا اطمنت على مصر  :)    .. وقلت لنفسي .. لا فرق بين إخواني  وليبرالي  مصري  إلا بماركة اللاب توب اللي بيمسكها وقت الانتخابات ..

متابعة جادة من الدكتورة شهيرة والأستاذة سهام مع أول يوم من أيام التربية الميدانية لطالبات كلية التربية بالإسكندرية ..

لقاء تدريبى اليوم الثلاثاء الموافق 2105/10/13 ومتابعة جادة مع أول يوم من أيام التدريب الميداني لطالبات كلية التربية جامعة الإسكندرية يجمع بين الدكتورة شهيرة عبد الهادى بكلية التربية جامعة الاسكندرية والاستاذة سهام الموجهة الاولى لمادة الرياضيات مع معلمى مادة الرياضيات بالمدرسة وطالبات التربية العملية المتدربات بالمدرسة " مدرسة صفية زغلول الإعدادية للبنات " بمحطة الرمل لبدء تنظيم العمل ووضع النقاط الاساسية لخوض المجال العملى فى تدريس مادة الرياضيات وذلك من الناحية التربوية ومن الناحية الفنية لمادة الرياضيات وتأهيل طالبات التربية العملية للتعامل داخل المدرسة وتعاون معلمى المادة بالمدرسة معهن لإكسابهن خبرات يبدأن بها الحياة العملية التربوية فى مجال التربية والتعليم وقد كان اللقاء ثريا ومثمرا ومغطيا كﻻ الجانبين التربوى والفنى وتم ذلك ضمن الخطة الطارئة لوحدة التدريب والجودة تحت اشراف الاستاذة عبير خليفة منسق الجودة الشاملة بالمدرسة ومسئولة الوحدة ....فشكرا لهم تعاونهم معنا ونطمع منهم فى المزيد وشكرا للسادة الحضور من معلمى المادة الاستاذ طارق محمد على درويش والاستاذة راندا جمال والاستاذة مريم خالد والاستاذة نجاة فرج.. ..
------------------------------------------------------------
بقلم الأستاذة عبير خليفة منسق الجودة بالمدرسة ..
بعد أن قامت بنشره في موقع المدرسة وقد نقلته أنا كما هو .. 
 والأستاذة عبير معلمة لغة عربية بالمدرسة ..
والمسؤولة عن الموقع وهي إنسانة أكثر من رائعة ..

من أرشيف الزمان ..

من أرشيف الزمان .. بأمانة وانا بـ أبحث عن أوراق قديمة خاصة بي في حجرة عندي مليانة كتب وأوراق قديمة وو... إلخ زي اللي موجودة عند حضراتكم كلكم  .. لقيت طقم مكتب جلد قديم عندي .. ومن ضمن الطقم علبة جلد .. بـ افتح العلبة دي .. لقيت فيه الصورة الجميلة دي .. مع زميلة عمري وأختي وحبيبتي الأستاذة الدكتورة ماجدة حبشي .. ونحن كنا مدرسين مساعدين .. ومع أطيب ناس ممكن أن تتعامل معهم في الدنيا كلها .. مجموعة من أعضاء الجالية السودانية والنوبية في مدينة الإسكندرية.. وللزمالة حقٌ عليَّ .. للدكتورة ماجدة كل الحب التقدير والاحترام ..ولأهلي في النوبة والسودان كل الحب والتقدير والاحترام .. ولو انت قاعد في المقصورة الرئيسية أمام شاشة الفيس بوك .. أنا اللي قاعدة آخر واحدة على إيدك الشمال ولابسة فستان أخضر ونظارة أيام الشباب بقى .. خايفة بس لا محدش يعرفني هههههههههههه

كُن نفسك كما أنتَ..واعمل الخير ولا تنتظر الشكر من أحد..وتعمد ألا تؤذي الآخرين..سينصرك الله.. وجمعتكم طيبة بإذن الله ..

كن نفسك كما أنت ..
واعمل الخير ولا تنتظر الشكر من أحد .. وتعمد ألا تؤذي الآخرين .. سينصرك الله ..
جمعتكم .. جمعة طهر ونقاء لهما صفتي الاستمرار والبقاء .. إن شاء الله ..
وصباح حضراتكم زي الورد بإذن الله ..

خليك مع الله ............

الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ (173) فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُواْ رِضْوَانَ اللّهِ وَاللّهُ ذُو فَضْلٍ عَظِيمٍ (174).. آل عمران ..
خليك مع الله ......

يا عالم يا اهوو فهموني إيه اللي بيحصل في سوريا .. طلب بقلم د.شهيرة عبد الهادي

أنا مبقتش فاهمة حاجة في موضوع سوريا .. هي ثورة ولا حرب طائفية ..هو موضوع بقاء الرئيس بشار ولا تخليه عن الحكم .. طب إيه هو موقف الشعب السوري .. طب الموضوع موضوع داعش ولا عودة آخرى للحروب الطائفية .. طب روسيا دخلت تحارب داعش ولا بتحمي العلويين .. بأمانة أنا مبقتش فاهمة حاجة وكل ما اسمع الخبراء الاستراتيجيين باطلع مصدعة واتوه أكتر.. ومبقتش عارفة الحقيقة هي إيه .. والحقيقة الوحيدة اللي انا عارفاها أن جزء كبير من الشعب السوري بقى لاجيء في بلاد الله لخلق الله والله يفك كربهم يا رب .. أمانة عليكوا اللي فاهم الموقف يفهمني .. وانا باتكلم بمنتهى الجدية صدقوني ..
---------------------------------------
د.شهيرة عبد الهادي

تحية لهذا البطل الشهيد ولكل شهداء حرب اكتوبر في نصر 6 اكتوبر .. بقلم د.شهيرة عبد الهادي

يا حبايب قلبي وحبايب قلب كل مصرية يا ولاد جيش مصر العطيم.. إن خيرة ما أنجبته مصر هم من استشهدوا في حرب اكتوبر 1973م .. ومنهم الشهيد طيار سليمان ضيف الله و الذي كانت كلماته قبل استشهاده وإسقاطه لطائرة ميراج إسرائيلية هي " وديني ما انا سايبه" ..نموذج حي مشرف لأنه عايش وسيعيش في نفوسنا لكل شهداء حرب اكتوبر البواسل عليهم رحمة الله .. لقد صنعوا لنا النصر الذي نهنيء بعضنا به الآن وإن شاء الله هم ينعمون في جنات الرحمن .. كل عام وحضراتكم طيبيين يا مصريين كل عام ومصر طيبة بمناسبة نصر 6 اكتوبر المجيد .. وعقبال ما نعبر العبور الكبير أيضاً بالقضاء على الفساد المنتشر في مصر .. وعقبال ما نحقق أهداف ثورتي 25 يناير و30 يونيو .. عيش حرية عدالة اجتماعية كرامة إنسانية .. واللي عبر عبور 1973م قادر بإذن الله وفضله على هذا العبور الكبير..
----------------------------------------------
د.شهيرة عبد الهادي

لو كان الاستبداد رجلاً ... الكواكبي

لو كان الاستبداد رجلاً.. وأراد أن ينتسب.. لقال : أنا الشر.. وأبي الظلم.. وأمي الإساءة.. وأخي الغدر.. وأختي المسكنة.. وعمي الضر.. وخالي الذل.. وإبني الفقر.. وإبنتي البطالة.. ووطني الخراب.. وعشيرتي الجهالة..
---------------------------------------------
عبد الرحمن الكواكبي

وبدأت الانفلونزا ....... ههههههههههههههه

آآآآآآآآآه ياني .. وبدأت انفلونزا الشتاء معايا .. وهي بتحبني جداً وعشرية معايا أوي ومبتفارقنيش أبداً .. العادي بتاع كل سنة هههه.. يلا.. بقى .. حضراتكم تعالوا زوروني وكل محترم ومحترمة من حضراتكم يجيب لي زيارة 2 كيلو بصل اخضر و2 كيلو بصل ناشف عشان نقتلها الوحشة دي ..  ..

كم تمنينا العودة إلى براءة الطفولة .. بقلم د.شهيرة عبد الهادي

كم تمنينا .. العودة إلى .. براءة الطفولة .. بعد أن فرضت علينا .. سلوكيات أُناسٍ .. اجتهدوا لـ تلويثها .. وما بين .. براءة تريد إثبات وجودها .. وبراءة تشوهت .. شبه حياة .. يعيشها من كان بريئاً ..
------------------------
د.شهيرة عبد الهادي