الازدواجية عند الإعلاميين .. بقلم د.شهيرة عبد الهادي

أنا مش عارفة .. كيف يشتكي مُذيع من درجة الانحطاط والتدني في الأعمال السينمائية والتليفزيونية قولاً ومشاهد .. ثم يستضيف شخصية .. تهاجم هذه الأعمال .. بنفس درجة الانحطاط و التدني في الألفاظ التي يستخدمها أثناء انتقاده لتلك الأعمال .. ومُصر على استضافتها مراراً وتكراراً لتقول نفس الألفاظ المنحطة وبنفس التدني ..

حول تجميد 10 درجات الحضور والسلوك بالمدارس .. بقلم د.شهيرة عبد الهادي

إيه التخبط ده ..
وزير يقول : ضرورة وجود 10 درجات حضور وانضباط لتلاميذ المدارس ..
الوزير اللي بعده يقول: إلغاء الـ 10 درجات حضور وانضباط لتلاميذ المدارس .. ‫#‏يا_ترى_الثالث_حيقول_إيه_‬

باي باي : مسيري " بس يا ترى هو ده الحل .. بقلم د.شهيرة عبد الهادي

باي باي " مسيري " ... اللي بعده ..
واضح كده أن المرحلة القادمة شعارها " محافظ لكل نوة " بالإسكندرية .. ‫#‏والله_العظيم_لو_جابوا_لمحليات_مصر_الفاسدة_رئيس_من_السماء_ما_حيعرف_يعمل_معاهم_حاجة_دول_فسادهم_ممنهج‬
خلص الكلام ..

أكتب كلمة حق من واقع لا يعرف الحق .. بقلم د.شهيرة عبد الهادي

هذه ليست نظرة سوداوية .. وإنما رد فعل ونتاج لموقف حدث لأحد الزملاء الحالمين مثلي .. استدعى لديَّ هذا الواقع المؤلم .. وجعلني أكتب كلمة حق من واقع لا يعرف الحق .. وكلمتي الواقعية هي ..
مجتمع الفيس هو :مجتمع الحُلم الجميل .. مجتمع الأمل النبيل .. هو مجتمع المدينة الفاضلة التي نتمناها .. هو مجتمع الحب والترابط والتوحد الذي نصنعه لكي نستعيض به عن ما نراه في الواقع الأليم .. هو مجتمع الثورة العلمية والأدبية والأخلاقية التي ننشدها .. هو مجتمع الرومانسية فالثورة على كل فساد هي منتهى الرومانسية .. هو مجتمع الكلام الذي يُشبه الفعل ويتمنى التفعيل .. أما مجتمع الواقع : فهو مجتمع الضبِاع التي لا تشبع .. مجتمع الأسود المفترسة .. مجتمع التماسيح.. مجتمع الثعابين .. مجتمع الحية أم راسين .. مجتمع الضغينة .. مجتمع الحقد والحسد والكراهية.. مجتمع الخيانة .. مجتمع المؤامرات .. مجتمع المصالح الشخصية.. مجتمع السلبية ..مجتمع الغيبة والنميمة .. مجتمع النفاق والرياء.. مجتمع المكر والخداع .. مجتمع اللئيم الخبيث القذر الذي يضر غيره ويعمل له العمل وبعد أن يتم تدميره يلعب دور من يفك هذا العمل لكي يكون هو صاحب الفضل عليه .. مجتمع الفُرقة والتشرذم .. مجتمع فيه الكبير الفاسد بـ يأكل الصغير الشريف .. هذه هي الحقيقة المرة .. إلا من رحم ربي ..
-------------------------------------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

ألف مبرووووك يا مصر ...

تهنئة إلى حبيبتنا مصر بمناسبة فوزها بمقعد غير دائم بمجلس الأمن اليوم .. وقد حصلت مصر على 50 صوتاً زيادة عن المطلوب للفوز بهذا المقعد.. ما يهمنا هي حبيبتنا مصر .. مصر اللي في دمنا .. مهما كان ومهما يكون .. يا رب مصر .. تحيا مصر ..

عام هجري جديد سعيد 1437 على حضراتكم يا أهلي وناسي يا كل أصدقائي النبلاء الأفاضل المحترمين ..

عام هجري جديد سعيد 1437 على حضراتكم يا أهلي وناسي يا كل أصدقائي النبلاء الأفاضل المحترمين ..

لقطات م اللي شفته في الدعاية الانتخابية النهارده .. بقلم د. شهيرة عبد الهادي

إيه  العدد الرهيب اللي مرشح نفسه للانتخابات   البرلمانية  ده  وانا معرفش منهم ولا واحد  .. و إيه العدد اللا نهائي من يفط  الدعاية  والعربيات الربع نقل   اللي شايلة  صور المرشحين  ومشغلة  الأغاني الوطنية الحماسية  وبشرة خير وتسلم الأيادي  اللي مالية البلد  بالشكل ده .. وإيه الفلوس اللي بتتصرف دي  واللي ممكن بالشكل ده توصل لمليارات  .. وح أقول   بقى ع اللي شفته   ..  أنا شفت لشاب منهم عنده 28 سنة  من عائلة معروفة عندنا من العرب  فردي مستقل .. عدد رهيب من اليفط  ومتكلفة  يعني متكلفة  فلوس كتير أوي ومغطية كل المباني .. ولأني بـ شجع الشباب  بأمانة  قلت اما اركز شوية  معاه  ..  شفت للشاب ده إيه بقى ..  بالإضافة للأعداد الرهيبة من اليفط الخاصة به ..شفت شاشات عرض في كل مكان وهو بيلقي خطاباته في المؤتمرات اللي عاملها .. وجمب كل شاشة  قاعدين نفس قاعدة الإخوان زمان .. وعاملين ترابيزة وبيكشفوا للناس من على الكمبيوتر عن رقم  لجنتهم ورقمهم في الكشف .. وده طبعاً عشان ينتخبوا الشاب ده .. وبيوزعوا بورشور خاص به  موضح فيه أنه  حيعمل الآتي : حيصلح التعليم والصحة  والمنظومة  الأمنية وح يراعي ذوي الاحتياجات الخاصة  وح يهتم بالمواطنة ويعمقها عند الشعب وكمان ح يصلح الاقتصاد وح يطور أسطول الصيد المصري  وح يطور الزراعة  وح يهتم بالمرأة  أما العمال بقى فحيعيشهم في نعيم   وبالنسبة للشباب بقى  ح يبني بيهم البلد  وح يحل كل مشكلات الدولة  وقاطرة التنمية  الاقتصادية بالذات  ح يآخد باله منها  وبعدين ح يستخدم الإسلوب الاقتصادي المعاصر B.O.O.T في تنمية الدولة المصرية بدون تحميل الموازنة العامة  للدولة المصرية أي أعباء مالية مثل تنمية السواحل المصرية  بجميع أنواعها  وعمل مجتمعات سكنية جديدة  وتنمية العشوائيات ووو... إلخ .. شفتوا  بقى لما يقعد ع كرسي البرلمان ح يعمل إيه .. ح يعمل كل اللي فات ده .. يعني مصر حتبقى  آخر حلاوة  .. المهم حضراتكم عارفين أن انا  يعني ساعات باكون مشاغبة باعتقد أن دمي خفيف  يعني .. خليت الشاب يكشفلي على رقمي الانتخابي قال  إيه أنا مش عارفة .. وقلتله  هو إيه الموضوع ..هو الشاب فلان الفلاني ده ملياردير ..هو جايب الفلوس دي كلها منين  وهو عنده 28 سنة  دا فيه شباب وصل 45 و50 سنة ومش قادر يتجوز ويعمل بيت .. رد قالي: لأ أصل احنا من عائلة فلان واحنا عائلة كبيرة والكل ساهم في الحملة دي .. قلتله طيب هو في الصورة هنا  اللي ع اليفط من غير ذقن  لكن في المؤتمرات له  ذقن " دوجلاس ليه " ..قالي .. والله يا حاجة ح يحلقها .. هو بس عشان من مؤتمر لمؤتمر ومبينامش خالص مش فاضي يحلق وأول ما ح تخلص الانتخابات  ح يحلقها علطول .. بس احنا عاوزينك تنتخبيه يا حاجة   شفتي برنامجه حيعمل فيه حاجات كتير  أوي  .. قلتله  إن شاء الله حانتخبه  .. قالي يعني اقتنعتي ببرنامجه ..قلتله :لأ   لأنه كاتب زي كل اللي مترشحين بيقولوه وهو مش حيعمل أي حاجة م اللي قالها أول ما يقعد ع الكرسي  والمهم يآخد الكرسي .. أنا حانتخبه عشان هو شكله حلو وينفع  يبقى نجم سينمائي وطمن مراته أنه شكله حلو .. وهو فعلا شكله وسيم وحلو  : قالي : والله  يا حاجة هو مش خاطب ولا متجوز خالص  يعني حيآخد باله م البلد .. هنا بقى انا اطمنت على مصر  :)    .. وقلت لنفسي .. لا فرق بين إخواني  وليبرالي  مصري  إلا بماركة اللاب توب اللي بيمسكها وقت الانتخابات ..

متابعة جادة من الدكتورة شهيرة والأستاذة سهام مع أول يوم من أيام التربية الميدانية لطالبات كلية التربية بالإسكندرية ..

لقاء تدريبى اليوم الثلاثاء الموافق 2105/10/13 ومتابعة جادة مع أول يوم من أيام التدريب الميداني لطالبات كلية التربية جامعة الإسكندرية يجمع بين الدكتورة شهيرة عبد الهادى بكلية التربية جامعة الاسكندرية والاستاذة سهام الموجهة الاولى لمادة الرياضيات مع معلمى مادة الرياضيات بالمدرسة وطالبات التربية العملية المتدربات بالمدرسة " مدرسة صفية زغلول الإعدادية للبنات " بمحطة الرمل لبدء تنظيم العمل ووضع النقاط الاساسية لخوض المجال العملى فى تدريس مادة الرياضيات وذلك من الناحية التربوية ومن الناحية الفنية لمادة الرياضيات وتأهيل طالبات التربية العملية للتعامل داخل المدرسة وتعاون معلمى المادة بالمدرسة معهن لإكسابهن خبرات يبدأن بها الحياة العملية التربوية فى مجال التربية والتعليم وقد كان اللقاء ثريا ومثمرا ومغطيا كﻻ الجانبين التربوى والفنى وتم ذلك ضمن الخطة الطارئة لوحدة التدريب والجودة تحت اشراف الاستاذة عبير خليفة منسق الجودة الشاملة بالمدرسة ومسئولة الوحدة ....فشكرا لهم تعاونهم معنا ونطمع منهم فى المزيد وشكرا للسادة الحضور من معلمى المادة الاستاذ طارق محمد على درويش والاستاذة راندا جمال والاستاذة مريم خالد والاستاذة نجاة فرج.. ..
------------------------------------------------------------
بقلم الأستاذة عبير خليفة منسق الجودة بالمدرسة ..
بعد أن قامت بنشره في موقع المدرسة وقد نقلته أنا كما هو .. 
 والأستاذة عبير معلمة لغة عربية بالمدرسة ..
والمسؤولة عن الموقع وهي إنسانة أكثر من رائعة ..

من أرشيف الزمان ..

من أرشيف الزمان .. بأمانة وانا بـ أبحث عن أوراق قديمة خاصة بي في حجرة عندي مليانة كتب وأوراق قديمة وو... إلخ زي اللي موجودة عند حضراتكم كلكم  .. لقيت طقم مكتب جلد قديم عندي .. ومن ضمن الطقم علبة جلد .. بـ افتح العلبة دي .. لقيت فيه الصورة الجميلة دي .. مع زميلة عمري وأختي وحبيبتي الأستاذة الدكتورة ماجدة حبشي .. ونحن كنا مدرسين مساعدين .. ومع أطيب ناس ممكن أن تتعامل معهم في الدنيا كلها .. مجموعة من أعضاء الجالية السودانية والنوبية في مدينة الإسكندرية.. وللزمالة حقٌ عليَّ .. للدكتورة ماجدة كل الحب التقدير والاحترام ..ولأهلي في النوبة والسودان كل الحب والتقدير والاحترام .. ولو انت قاعد في المقصورة الرئيسية أمام شاشة الفيس بوك .. أنا اللي قاعدة آخر واحدة على إيدك الشمال ولابسة فستان أخضر ونظارة أيام الشباب بقى .. خايفة بس لا محدش يعرفني هههههههههههه

كُن نفسك كما أنتَ..واعمل الخير ولا تنتظر الشكر من أحد..وتعمد ألا تؤذي الآخرين..سينصرك الله.. وجمعتكم طيبة بإذن الله ..

كن نفسك كما أنت ..
واعمل الخير ولا تنتظر الشكر من أحد .. وتعمد ألا تؤذي الآخرين .. سينصرك الله ..
جمعتكم .. جمعة طهر ونقاء لهما صفتي الاستمرار والبقاء .. إن شاء الله ..
وصباح حضراتكم زي الورد بإذن الله ..

خليك مع الله ............

الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ (173) فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُواْ رِضْوَانَ اللّهِ وَاللّهُ ذُو فَضْلٍ عَظِيمٍ (174).. آل عمران ..
خليك مع الله ......

يا عالم يا اهوو فهموني إيه اللي بيحصل في سوريا .. طلب بقلم د.شهيرة عبد الهادي

أنا مبقتش فاهمة حاجة في موضوع سوريا .. هي ثورة ولا حرب طائفية ..هو موضوع بقاء الرئيس بشار ولا تخليه عن الحكم .. طب إيه هو موقف الشعب السوري .. طب الموضوع موضوع داعش ولا عودة آخرى للحروب الطائفية .. طب روسيا دخلت تحارب داعش ولا بتحمي العلويين .. بأمانة أنا مبقتش فاهمة حاجة وكل ما اسمع الخبراء الاستراتيجيين باطلع مصدعة واتوه أكتر.. ومبقتش عارفة الحقيقة هي إيه .. والحقيقة الوحيدة اللي انا عارفاها أن جزء كبير من الشعب السوري بقى لاجيء في بلاد الله لخلق الله والله يفك كربهم يا رب .. أمانة عليكوا اللي فاهم الموقف يفهمني .. وانا باتكلم بمنتهى الجدية صدقوني ..
---------------------------------------
د.شهيرة عبد الهادي

تحية لهذا البطل الشهيد ولكل شهداء حرب اكتوبر في نصر 6 اكتوبر .. بقلم د.شهيرة عبد الهادي

يا حبايب قلبي وحبايب قلب كل مصرية يا ولاد جيش مصر العطيم.. إن خيرة ما أنجبته مصر هم من استشهدوا في حرب اكتوبر 1973م .. ومنهم الشهيد طيار سليمان ضيف الله و الذي كانت كلماته قبل استشهاده وإسقاطه لطائرة ميراج إسرائيلية هي " وديني ما انا سايبه" ..نموذج حي مشرف لأنه عايش وسيعيش في نفوسنا لكل شهداء حرب اكتوبر البواسل عليهم رحمة الله .. لقد صنعوا لنا النصر الذي نهنيء بعضنا به الآن وإن شاء الله هم ينعمون في جنات الرحمن .. كل عام وحضراتكم طيبيين يا مصريين كل عام ومصر طيبة بمناسبة نصر 6 اكتوبر المجيد .. وعقبال ما نعبر العبور الكبير أيضاً بالقضاء على الفساد المنتشر في مصر .. وعقبال ما نحقق أهداف ثورتي 25 يناير و30 يونيو .. عيش حرية عدالة اجتماعية كرامة إنسانية .. واللي عبر عبور 1973م قادر بإذن الله وفضله على هذا العبور الكبير..
----------------------------------------------
د.شهيرة عبد الهادي

لو كان الاستبداد رجلاً ... الكواكبي

لو كان الاستبداد رجلاً.. وأراد أن ينتسب.. لقال : أنا الشر.. وأبي الظلم.. وأمي الإساءة.. وأخي الغدر.. وأختي المسكنة.. وعمي الضر.. وخالي الذل.. وإبني الفقر.. وإبنتي البطالة.. ووطني الخراب.. وعشيرتي الجهالة..
---------------------------------------------
عبد الرحمن الكواكبي

وبدأت الانفلونزا ....... ههههههههههههههه

آآآآآآآآآه ياني .. وبدأت انفلونزا الشتاء معايا .. وهي بتحبني جداً وعشرية معايا أوي ومبتفارقنيش أبداً .. العادي بتاع كل سنة هههه.. يلا.. بقى .. حضراتكم تعالوا زوروني وكل محترم ومحترمة من حضراتكم يجيب لي زيارة 2 كيلو بصل اخضر و2 كيلو بصل ناشف عشان نقتلها الوحشة دي ..  ..

كم تمنينا العودة إلى براءة الطفولة .. بقلم د.شهيرة عبد الهادي

كم تمنينا .. العودة إلى .. براءة الطفولة .. بعد أن فرضت علينا .. سلوكيات أُناسٍ .. اجتهدوا لـ تلويثها .. وما بين .. براءة تريد إثبات وجودها .. وبراءة تشوهت .. شبه حياة .. يعيشها من كان بريئاً ..
------------------------
د.شهيرة عبد الهادي

لا ومليون لا لإهانة المصري بالخارج .. بقلم د.شهيرة عبد الهادي

أعتقد أنه بعد ثورتي 25 يناير و 30 يونيو وفي عهد الرئيس السيسي .. يجب ألا يُهان مصري بالخارج ويجب أن تحميه حكومة قوية ودولة أقوى .. لا ومليون لا لصفع خالد عامل المطعم بالأردن الذي تعرض للصفع من 4 أشخاص بمنتهى الغل والحقد والكره .. وللأسف من بينهم نائب في البرلمان الأردني .. نائب المفروض أنه يدافع عن الحق .. وكان عليه أن يمنع من يضربونه بهذه الوحشية والهمجية.. لقد صفعوه وأهانوه ثم مسكوه من إيديه ورجليه وألقوه على الأرض بمنتهى الوحشية وكأنهم يلعبون به الكرة ومسحوا بيه بلاط المطعم عشان اتأخر في تقديم الطعام لأحدهم ..وهذا واضح في الفيديو الأول وفي فيديو آخر حديث تم نشره الآن .. مع العلم بأن كاميرات المطعم هي من سجلت هذه المشاهد البربرية .. ما هذا .. ما كل هذا الكره للمصريين .. نحن مصر .. بلد الكرم مع كل عربي وأجنبي يأتي إليها .. ما هذا .. ليعلم كل إنسان أننا لدينا نواب في البرلمان المصري هم في السجون الآن .. كما أن لدينا رؤساء جمهورية وعائلاتهم في السجون الآن .. لماذا لا يُحاسب هذا النائب ؟ لماذا لا يتم إلقاء القبض على هؤلاء البلطجية ؟.. لا أحد فوق القانون .. ما هذا .. نحن في مصر نفتح قلوبنا وعقولنا وبيوتنا لكل عربي يلجأ إلينا أو يعمل في مصر.. نحن من كنا ندافع طوال عمرنا عن القضايا العربية واستشهد من أجلها مئات الألوف من خيرة شباب المصريين.. ليعلم الجميع- ويا رب تفهموا بقى - أننا في مصر من الممكن أن ننتقد أنفسنا ونجلد ذاتنا ونظهر سلبياتنا بهدف إصلاح بلدنا لأننا نريد لمصر أن تكون أحسن بلد في الدنيا .. لكن أن يُهان مصري بهذا الشكل لا ومليون لا .. لماذا يُهان المصري هكذا في الخارج؟ ..إهانة كرامة خالد هي إهانة لكرامة الشعب المصري كله ..
‫#‏لا_لإهانة_كرامة_المصري_بالخارج_‬

كفاية استخفاف بعقول الناس .. بقلم د.شهيرة عبد الهادي

إمبارح الخميس 2 / 10 / 2015م كانت السيدة جيهان السادات مع منى الشاذلي في برنامجها على قناة cbc بمناسبة ذكرى نصر 6 اكتوبر .. في الجزء الذي رأيته بالصدفة بمناسبة ذكرى نصر 6 اكتوبر .. في الجزء الذي رأيته بالصدفة من هذه الحلقة .. قالت السيدة جيهان السادات بالحرف:" بعد ما مات الرئيس السادات  بقيت مش عارفة امشي البيت ازاي  لأن المعاش كان 900 جنيه .. وكان محمود زوج بنتي الصغيرة جيهان ابن عثمان أحمد عثمان  كل يوم يجيلنا  هو وأسرته لمدة سنة كاملة ومعاهم غداهم   عشان يساعدونا وما يجرحوناش .. وبعدين أنا دورت على شغل خصوصاً إن اتعرض عليا من بره أني أشتغل بالدكتوراه اللي معايا فاشتغلت بيها بره عشان أصرف على البيت  .. والرئيس السادات ما سابش لنا حاجة خالص .. ولما سألتها المذيعة حتى ما سابش  لكوا أرض في ميت ابو الكوم .. ردت وقالت: هو ساب يعني 10 فدادين  بس انا محبتش أبيعهم .. ولما سألتها طيب مفيش شوية ذهب كده كنتي تبيعيهم .. ردت وقالت  : لأ يعني  كان عندي  ذهب زي الناس  مش قوي.. ومن الكلام اللي قالته كمان: أن الرئيس السادات  طول عمره وانا معاه من أيام ما كنا في العريش .. كان بيعمل بدلة واحدة في السنة وانا  كنت باعمل تايور واحد في السنة  ..وكنا بنجيب القماشات من غزة لأنهم كانوا بيجيبوا حاجات حلوة أوي  في غزة  ولأننا كنا جمبهم في العريش ..وصحيح هي بدلة واحدة ولا تايور واحد  في السنة ..بس بتكون   حاجة كويسة جدا يعني  ".. بأمانة أنا المواطنة العادية  الغلبانة باقول : ليه  ؟ وده كلام مش داخل دماغي .. وبعدين كل أولاد حضرتك اتجوزوا  في حياة الرئيس السادات  الجوازات التمام ومنهم جمال وأكيد كان له عمل  بيكسب منه وهو المسؤول عن حضرتك بعد موت الرئيس  .. وبعدين   هو مش الرئيس السادات  هو اللي عمل سياسة الانفتاح .. واللي قال فيها بالحرف : اللي مش حيغتنى في عهدي مش حيغتنى أبداً .. يعني ما اغتناتوش ليه  في عهد  هذا الانفتاح  السبهللي   ؟  وطنية يعني  مثلاً ؟ .. بالمناسبة  الانفتاح ده أسماه "أحمد بهاء الدين "  الانفتاح السداح مداح .. بأمانة أنا  المواطنة العادية مللت مثل هذه اللقاءات  وشايفة  أن الكلام ده كلام غير منطقي  وما يدخلش دماغ حد  .. وعموماً  الدكتوراة اللي حضرتك أخدتيها دي أخدتيها من الجامعات المصرية اللي سياستها دلوقتي   بردوو  الانفتاح  السبهللي السداح المداح  واللي   بتدي دكتوروهات وماجيستيرات  على ودنوا   لناس كتير  .. وبصراحة  بردوو  أنا غيرت رأي في منى الشاذلي   وبقى رأيي فيها سلبي .. وكفاية  استخفاف بعقول الناس  بقى .. بجد ملينا ..
----------------------------------
د.شهيرة عبد الهادي

فـ لنحاول ولنتدرب .. بقلم د.شهيرة عبد الهادي

فـ لنتدرب على ذِكر الغائب بالخير .. ونُدافع عنه خاصة إن كان مظلوماً .. حتى يذكرنا الحاضر بالخير حين نغيب .. ولنجعلها منهاج حياة .. فـ لنحاول ولنتدرب ..
-----------------------------
د.شهيرة عبد الهادي

حاولت التحدث مع نفسي ولكن .. بقلم د.شهيرة عبد الهادي

حاولت التحدث مع نفسي .. أبت .. نظرت إليَّ نظرة شفقة .. قالت .. عليكِ بالصمت يا عزيزتي .. لن تستطيعي بمفردك تغيير أي شيء .. حاولي أن تغيري من نفسك أنتِ " للأفضل" .. وإياكِ وأنت تحاولين التغيير .. أن "تنجرفي" .. لتيار عهر فسادهم الأخلاقي اللا متناهي ..
-------------------------------
د.شهيرة عبد الهادي

الكلمة نور .. وبعضها يؤدي إلى القبور .. فـ لنتخير كلماتنا .. حتى يُجبر المكسور ..

الكلمة نور .. وبعضها يؤدي إلى القبور .. فـ لنتخير كلماتنا .. حتى يُجبر المكسور ..

نجاة الصغيرة الهي ما اعظمك .. جُمعتنا جُمعة طُهر ونقاء لهما صفتي الاستمرار والبقاء إن شاء الله ..

         



إلهي ما أعظمك في قدرتك وعلاك ..
إلهي ما أعظمك في قدرتك وعلاك ..

إلهي ما أرحمك في قبضتك ورضاك ..
إلهي ما أكرمك للعبد لو ناداك..
جلّت صفاتك يا من لا إله سواك..

خلقت النور وقلت اسعوا في طلب النور ..
ومشيوا ناس وتاهوا ناس في وسط بحور ..

بعت الرحمه تهدي العبد والمغرور..
وفيه من تاني وفيه من تاني المقدور..

وبرضوا كريم وكنت حليم وكنت غفور..
الهي ما اعظمك .. الهي ما ارحمك .. الهي ما اكرمك..
جلت صفاتك يا من لا إله سواك..

وهبت العلم ابني طريق سلام وأمان ..
وفينا من رفع راية الهدى عفيان..

بدعوة جرح شارد يكتم العدوان..
يتوه الظلم والجبروت والطغيان..

في صحوة ريح وغضب كتير أو بركان ..
إلهي ما أعظمك .. إلهي ما أرحمك .. إلهي ما أكرمك..
جلت صفاتك يا من لا إله سواك ..

على خدود الحجر غاب الزمن ده بعيد ..
تحكي لدنيا البشر قصة ملوك وعبيد ..

الكل راح وانتشر واتساوت المواعيد..
وكان في أقصر سور آياته تنبيه..

صلى عليه الزمن بالحمد والتوحيد..
إلهي ما أعظمك .. إلهي ما أرحمك .. إلهي ما أكرمك..
جلت صفاتك يا من لا إله سواك..
----------------------------------------------------------
كلمات الشاعر محمود حسن إسماعيل .. 
ألحان الموسيقار رياض السنباطي ..
الصوت الدافيء لنجاة الصغيرة ..
في زمن البراءة ..

نكتب عن الألم الآن ومستقبلاً نتمنى عودته .. وعجبي .. بقلم د.شهيرة عبد الهادي

نكتب عن الألم .. ونحن ننتقد الواقع ..ومن المفارقات .. أنه مع مرور الأيام .. سنكتب عنه مُستقبلاً .. على أنه ذكريات نتمنى عودتها .. فهل ذلك ضيق أفق .. أم عدم رؤية .. أم عدم دراية .. أم أنها طبيعة الحياة .. التي لا ندركها إلا متأخراً ..
-------------------------------------------
د.شهيرة عبد الهادي 

ما يحدث الآن في مصر والبلدان المجاورة لها فوق طاقة فهم أي بشر للأمور .. بقلم د. شهيرة عبد الهادي

في ضوء الأحداث في البلدان العربية من حولنا وحتى حادث رمي الجمرات في منى بـ موسم الحج الحالي 1436هـ/2015م .. أقول ..ربنا يستر على مصر .. ما نحن فيه أبعاده كُثر .. وفوق طاقة البشر ومدى فهمهم للأمور.. الموضوع فوق طاقة أي جماعة أوحزب أوسياسي أو ما إلى ذلك .. مُخطيء من يدعي المعرفة بجميع الجوانب .. نحن في خطر فعلاً من أنفسنا على أنفسنا .. يا رب مصر.. اللهم احم مصر وجيش مصر.. اللهم اجعل مصر في رباط إلى يوم الدين ..كما وعدتنا في كتابك الكريم يا رب العالمين ويا أرحم الراحمين .. اللهم تقبل في هذه الأيام المباركات ..
---------------------------
د.شهيرة عبد الهادي

إلى كل أصدقاء مدونة " مُحبي الله والوطن " .. بقلم د.شهيرة عبد الهادي

إلى جميع أصدقائي وصديقاتي : أساتذتي وأستاذاتي ..زملائي وزميلاتي..طلابي وطالباتي..إخواني وأخواتي جميع العاملين بكلية التربية جامعة الإسكندرية .. كل عام وحضراتكم بألف خير بمناسبة العام الدراسي الجديد.. وإن شاء الله يكون عام دراسي سعيد علينا وعلى حضراتكم .. اللهم إنا نسألك خير هذا العام و خير ما في هذا العام وخير ما بعد هذا العام كل الخير خلقاً وعلماً وحياةً .. ونعوذ بك من شر ما في هذا العام وشر ما بعد هذا العام .. اللهم اجعل مصر سخاءً رخاءً تنعم في أمن وأمان واستقرار ..آمين آمين يا رب العالمين ..
---------------------------------
د.شهيرة عبد الهادي

أنا مواطن مصري رخبص ... بقلم د.شهيرة عبد الهادي

كالعادة .. أهالي المتوفين والمفقودين من المصريين في حادث رمي الجمرات في حج هذا العام 1436هـ/ 2015م .. يصرخون على جميع الفضائيات : " أغيثونا احنا مش عارفين حاجة عن ذوينا ، كل القنصليات في العالم جاءت وأخدت ولادها ، والقنصلية المصرية في جدة غير متواجدة في موقع الحادث ، والسفارة المصرية في جدة لم تتحرك إلى الآن وما بتسألش فينا ، والخارجية المصرية معملتش لنا حاجة ،ورئاسة الوزراء المصرية في مصر لم تصدر بياناً حتى الآن عن الحادث داخل مصر عشان تطمنا على ناسنا ، والقنصلية تعطي لنا أرقاماً مبتردش ، وإذا ردت تقول هذا رقم منزل وليس رقم قنصلية ، ورئيس الوزراء يرسل وزير الصحة اليوم فقط إلى السعودية بعد مرور إسبوع على الحادث ، والأعداد أكثر بكثير من المعلن سواء بالنسبة للمتوفين أو المفقودين ".. ومن يتحركون هم الشباب المصري الذي يعمل بالسعودية والمقيم هناك وهم فقط من يبذلون جهداً مع أهالي الشهداء والمفقودين في مصر عبر الفيس بوك .. إلى متى سيظل يشعر المصري أنه رخيص بلا ثمن ؟..
------------------------------------------------------
د.شهيرة عبد الهادي

مطر غزير في الإسكندرية .. اللهم طهر به قلوبنا .. واجعله يجلو صدأ نفوسنا..

مطر غزير في الإسكندرية .. اللهم طهر به قلوبنا .. واجعله يجلو صدأ نفوسنا..

أرقام القنصلية المصرية بجدة واللي بترد ..

الرقمين دول بتوع " القنصلية المصرية بجدة" وبيردوا .. حاولوا كده وربنا معاكم .. وربنا يطمننا كلنا على المتوفين والمفقودين المصريين وغير المصريين في حج هذا العام 1436هـ/2015م.. تقبلهم الله من الشهداء وتغمدهم برحمته .. آمين
------------------------------------
00966568109795
00966500054094

يا رب ما يحرمني من حضراتكم أبداً .. آمين ..

يا رب ما يحرمني من حضراتكم أبداً .. آمين ..

أنا معرفش سعد زغلول قالها ولا لأ .. بس هي جت ع الجرح ههههه .. وشر البلية ما يُضحك ..

أنا معرفش سعد زغلول قالها ولا لأ .. بس هي جت ع الجرح ههههه ..
وشر البلية ما يُضحك ..

يا رب احفظ مصر وسوريا وسائر بلاد العرب والمسلمين يا رب

يا رب يا الله .. في هذه الأيام المباركات .. تبتهل إليك .. بأن تحفظ بلدنا مصرنا الحبيبة من شر أعدائها في الداخل وأعدائها من الخارج وأن تنعم عليها بأمنك وأمانك وخيرك ورخائك .. مصر التي ذكرتها يا ربنا في كتابك الكريم تناجيك يا رب العالمين.. وأن تنصر إخواننا الشعب السوري وتعينهم وتهديهم إلى الاختيار الصحيح والطريق السليم وأن ترحمهم من ويلات الانشقاق والهجرة والنفاق .. وأن تنعم على إخواننا في العراق وليبيا ولبنان والسودان واليمن وفي سائر بلاد العرب والمسلمين والمسيحيين والعالم الإنساني كله بالاستقرار والأمن والأمان.. يا رب نبتهل إليك بأن يجيء عيد الأضحى المبارك العام القادم ونحن بمصر وإخواننا العرب والمسلمين والمسيحيين وإخواننا في الإنسانية على مستوى العالم أجمع في أحسن حال .. آمين آمين .. إنك سميع مجيب الدعوات يا رب العالمين ..
--------------------------------------------
د.شهيرة عبد الهادي 

كل عام وحضراتكم بألف ألف خير .. وقفة عرفات مباركة ..

لبيك اللهم لبيك .. لبيك لا شريك لك لبيك ..
إن الحمد والنعمة لك والملك .. لا شريك لك لبيك ..

وفاة الكاتب المسرحي علي سالم

لا إله إلا الله .. الكاتب على سالم اللي كنا بننتقد كلامه في الجزء الأول من برنامج "مانشيت" مع القرموطي على قناة "أون تي في" .. من يومين .. يوم الأحد 20 / 9 / 2015م .. توفي اليوم الثلاثاء 22 / 9 / 2015م من أربع ساعات فقط.. الله يرحمه ويسامحه .. وإنا لله وإنا إليه راجعون .. وأنا قد علمت الخبر بالصدفة اليوم عندما كانت تتم إعادة الحوار الأخير له في حلقة يوم الأحد الماضي.. وسمعت قوله ورأيه في ما قد وجه له من اتهام حول رؤيته عن التطبيع مع إسرائيل .. وقال أنه لم ينادي بالتطبيع وأن زيارته لإسرائيل زمان كانت دعوة فردية .. ثم استطرد قائلاً .. أنا أقول أن سيدنا موسى مصري وأن العبرانيين يحبون المصريين وهذا ما قد لمسته بنفسي ولابد من دراسة اللغات العبرية والتركية والفارسية .. وأن حل مشكلة فلسطين لن تتم إلا عن طريق علاقات قوية بين مصر وإسرائيل .. في الحقيقة بالرغم من اختلافي مع الكاتب علي سالم في بعض وجهات نظره المختلفة .. لكن بالنسبة للجزئية الخاصة بالقضية الفلسطينية وبأمانة شديدة -والرجل الآن في دار الحق_ أرى أنه واضح وصريح مع الذات ويحلل القضية سياسياً .. والأيام هي من ستوضح الكثير حول هذه القضية عند العرب المتشرذمين المنقسمين على أنفسهم ..الله يرحمه الله يرحمه ويسامحه ..

يا رب يا رب يا رب ...

رسالة إلى الرئيس السيسي .. بقلم د.شهيرة عبد الهادي

رسالة إلى الرئيس السيسي
----------------------------
بأمانة شديدة أنا عندي ثقافة مقاطعة السلع الغذائية المغالى في سعرها .. وفعلاً أنا وبعض أفراد أسرتي الكبيرة قد قاطعنا اللحمة .. لكن أسعار كل شيء مغالى فيها .. أسعار الفاكهة والخضار والبقوليات والدواجن والأسماك ووو.... إلخ .. فهل سنقاطع كل أنواع الأكل بهذا الشكل .. هذا شيء مؤلم للنفس البشرية على اختلاف مستويات دخلها الشهري .. هل من المعقول الجشع الذي يتمسك به التاجر المصري .. نحن مع الدولة المصرية في حربها ضد الإرهاب ومصر فعلاً في حالة حرب .. ونحن نؤيد سياسة الرئيس السيسي الخارجية التي هي بامتياز .. لكن الداخل المصري يحتاج المزيد من الاهتمام يا سعادة الرئيس .. نحن نعلم أن التركة ثقيلة .. لكن لا يمكن أن نتصور أن فئة التجار ينصبون من أنفسهم دولة داخل الدولة .. يجب النظر إلى الشأن الداخلي للمواطن المصري البسيط .. الذي هو رمانة الميزان في كل شأن .. يجب إعادة النظر في القيادات المسؤولة عن القوت اليومي للمواطن المصري والغلاء الفاحش الذي يعاني منه عندما يريد توفير قوته اليومي .. وهنا تحضرني مقولة للدكتور علي الغتيت وهي " نحن في مصر نفتقد الفكِر والخبرة والدقة والمعايير الصحيحة للاختيار" .. شكراً للدكتور الغتيت الذي لخص جوهر المشكلة .. ونتمنى من سعادة الرئيس السيسي الخلوق الضرب بيد من حديد على جشع هؤلاء التجار وإعادة النظر في القيادات الحالية المسؤولة عن مجالات الحياة اليومية للمواطن المصري ..
------------------------------------------------------
د.شهيرة عبد الهادي
#Drshahera_Abd_Elhady_Ibrahem

(كلمتين بالبلدي) عروس الحادية عشرة وعريس السابعة عشر .. بقلم د.شهيرة عبد الهادي

كلمتين بالبلدي
----------------
بجد بعد ما شفت  نهى العروس ذات الحادية عشر من العمر  وخطيبها وجيه سائق التوك توك  ذو السابعة عشر من العمر الأحد 13 / 9 / 2915م .. ومُذيع العاشرة مساءً يحاورهما  وهما مش فاهمين حاجة  منه .. والعريس وجيه يا حبة عيني بيبصولوا  وهو مذهول  وأكيد بيقول  لنفسه.. بينه وبين نفسه " هو الراجل ده بيقول إيه" .. ثم سمعت مداخلات المسؤولة  الأولى عن الأمومة والطفولة في مصر ..وهي بتقول  بالحرف الواحد  " هم فرحانين على إيه إحنا بنبني مصر وهم عاملين فرح على زواج أطفال ثم تستطرد وتقول وهو العريس  بيحجز  العروس يعني إيه حاجزها هي سلعة يعني" !!! .. طبعاً هي بكده حلت المشكلة وعملت اللي عليها  وقالت الشعارات اللي بتتقال في مثل هذه المواقف دون تفعيل لها في أرض الواقع في القرى والنجوع المصرية ؟!.. ثم مداخلة الدكتور المتخصص في العلاقات الأسرية  وكلامه وهو بيقول " العروسة قاعدة في منتهى الثقة  بالنفس  وهي طفلة  " ؟!.. والفنانة اللي قالت " أنا من نفس البلد لكن مولودة في لبنان  وانا من  فرع تاني من العائلة بتاعة العروس ومعندناش الكلام ده  وانا حاسأل ولاد عمي عن الموضوع ده"  ؟!وهنا منتهى التناقض  الفنانة من البلد وفي نفس الوقت هي اتولدت في لبنان  وعاشت في لبنان  ثم القاهرة يعني متعرفش حاجة عن البلد  ؟!  وكمان أنا  مش عارفة ولاد عمها حيعملوا إيه بصراحة ؟!.. والصحفي  اللي م البلد و اللي جه عشان يقول بلدنا مش جاهلة  وفيها شباب  متعلم في جميع التخصصات" ؟!.. بعد ما شاهدت وسمعت كل ذلك .. أنا حزنت .. على عدم تحمل المسؤولية  التي يتمتع بها غالبية المسؤولين  والدارسين في مصر  أصحاب الياقات البيضاء والمؤتمرات التي تنعقد في فنادق 5 نجوم  وهم لا يعرفون عن القرية المصرية والنجع المصري أي شيء .. كما حزنت على السطحية  التي  أظهرتها هذه الحلقة عند المسؤولين في المعالجة  لهذه المشكلة   .. وكمان  .. حسيت  أنهم غيرانين  من  الولد والبنت   ههههههه "  دعابة  " .. وبعدين  أنا مش عارفة هم زعلانين ليه   .. ما الطفل اللي بتقولوا عليه طفل  اللي عنده 17 سنة  ساب مدرسة الصنايع  و اشتغل على توك توك  وعمل جمعية  وجاب شبكة بـ 6 آلاف جنيه لعروسته  وحجزها لأن اتقدم لها 6 عرسان وهو خايف أنها تطير منه  يعني راجل أهو    مش زي ناس  بتلعب ببنات الناس هههههه .. يعني عمل بوصية رئيس وزراء مصر السابق  اللي قال معدش وظائف  لحد  وكل واحد يروح يشوف شغلانة على توك توك  ولا حاجة.. عاوزين إيه تاني بقى ..  خليكوا انتوا بقى كده  قاعدين  ومعندكوش توك توك وعنسوا   ههههه.. بصراحة  جهل  المتعلمين   والمسؤولين  هو أخطر بكثير من جهل فقراء   مصر  في قراها ونجوعها  .. مش ده برده حصاد  أفعالكم وأقوالكم  وتصريحاتكم  وإعلامكم  وإهمالكم   للقرى والنجوع  على مر العصور يا مسؤولي مصر.. قال مركز أمومة وطفولة قال .. قال دكتور في العلاقات الأسرية قال .. قال فنانة م البلد قال ..  قال صحفي قال ..  مع  كامل احترامي  للجميع ..  لأنني أتحدث عن مواقف  ومسؤولية وليس أشخاص ومراكز.. ومثل هذه المشكلة  لا تحل في حلقة من برنامج ولا من مداخلات الشو الإعلامي .. قرى ونجوع مصر تعاني الفقر والجهل والمرض من زمااااااااااااااااااااااااااااااااان   يا دنيا  ..  آه يا بلد ..  شر البلية ما يُضحك ..
----------------------------------------------------------
د.شهيرة عبد الهادي
#Drshahera_Abd_Elhady_Ibrahem

لماذا تحاربك الشخصية القذرة ؟ ..بقلم د.شهيرة عبد الهادي

لما بتكون شخصية نظيفة .. الشخصية القذرة .. لازم تحاربك وتستبعدك وتهمشك .. بكل الأساليب التي استمدت قذارتها من مكونات شخصيتها غير النظيفة .. لأن وجودك بجوارها حيوضح أبعاد ومدى قذارتها .. وهو ده الفساد بعينه ..
----------------------------
د.شهيرة عبد الهادي

حول حادثة الواحات .. بقلم د.شهيرة عبد الهادي

بمناسبة  حادثة  الواحات ..  هو ليه محدش مصدق .. إن احنا بلد ماشية  هميوني  يعني معندهاش تطبيق لعلوم الإدارة  والتخطيط في المجالات المختلفة .. و العملية كلها  فهلوة  في فهلوة  وشيلني واشيلك  ومشي أمورك تسلك   وعك وربك يفك  وعشوائية وتخبط  في كل شيء    .. وزي ما قرأت وسمعت الآن  عن هذه الحادثة ..  كلها  أقوال متضاربة .. عربيات ماشية من غير تصاريح  .. المتحدثة بإسم وزارة السياحة .. بتقول .. الشركة  قامت بعمل مخالفات صارخة .. وقريب المرشد اللي استشهد بيقول  أن كلامها  خطأ .. وصاحب عربيات الدفع الرباعي  بيقول  كل أصحاب العربيات ممعهمش تراخيص .. مع العلم بأن الموضوع قيد التحقيق  .. يا ريت محدش يزعل مني  في اللي ح أأقوله دلوقتي  وهو ..   المصري ما دام مصري  سواء كان يهودي أو مسيحي أو مسلم  بأمانة معندوش ضمير   .. أيون   المصري معندوش ضمير ..  صدقوني عدم الضمير ده  هو شعار المصري في كل سنتيمتر في مصر ..  ومحدش يقولي  بقى  إخوان ولا سلفيين ولا مدنيين  ولا ليبراليين  ولا علمانيين ولا بتنجانيين .. أصل انا زهقت بجد م الشماعات دي ..  وكمان  الواقع مُر قوي يعني .. هو  احنا  مش شايفين  الهمجية و التخبط اللي بيحصل  في كل مكان بنتعامل   معاه  داخل مصر ..  هو  احنا  مش شايفين  الفساد  اللي في كل  سنتيمتر في مصر .. والله .. لو لم نتق الله .. نحن  شعب مصر .. ثم نتق الله في مصر .. لـ ربنا حيعاقبنا  عقاب عسير  ..  وحنشوف أيام  أسود من قرن الخروب .. إحنا لسة مشفناش حاجة .. وأعتذر عن أي كلمة صدرت مني من حزني .. كفاية أن عناوين الصحف الأجنبية  التي  ما صدقت  وقوع هذا الحادث بدأت تروج ضد مصر و تقول .. الجيش المصري بيقتل السياح في  مصر .. يعني  مصيبة سودة ..يعني خسائر لمصر من جميع النواحي .. وربنا  يهد كل من يريد   إيذاء مصر..
---------------------------------------------------
د.شهيرة عبد الهادي
#Drshahera_Abd_Elhady_Ibrahem

من المضحكات المبكيات في قضية مدرسة الحامول الثانوية للبنين بكفر الشيخ .. بقلم.د.شعيرة عبد الهادي

آآه ياني .. من المضحكات المبكيات  .. في قضية مدرسة الحامول الثانوية للبنين  بمحافظة كفر الشيخ  ..  اللي المعلمين فيها نجّحوا 40 طالب كانوا راسبين أساساً في أوراق الإجابات ولا يستحقون النجاح .. لكن هم نجحوهم لأنهم واخدين رشوة  .. ما قاله التلاميذ .. وهو .. إحنا دفعنا   الفلوس " الرشوة " للأستاذ  وللكنترول عشان ينجحنا  في الترم الأول .. ونجحنا و " الحمد لله "    ههههه..  واخدين بالكم  بيقول " والحمد لله "   ..  لكن في التيرم التاني  دفعنا الفلوس وما نجحناش  .. والمدرس قال لما تنجحوا  نبقى نآخد الحلاوة .. والحلاوة دي حسب ما يطلب .. والعلامة داخل الكراسة ليها تسعيرة .. والنجاح في الكنترول له تسعيره .. وعلى الجانب الآخر المعلمين بيقولوا : الطلاب جايين لينا المدرسة مستواهم غير حقيقي لأنهم نجحوا بالغش  واتنقلوا من ابتدائي لإعدادي لثانوي بالغش .. والفلوس اللي بيدفعوها  دي فلوس الدروس الخصوصية .. وولي أمر بيعترف أنه  عرض على المدرس 2000 جنيه عشان ينجح إبنه ووو..... إلخ .. هذا بالإضافة لما  أظهرته القضية من علاقة سيئة جداً بين الطالب والمعلم   لدرجة أن الطالب قال للمعلم  أنت  طلبت  رشوة " حمام "  و " سمك"  من زميلنا فلان الفلاني .. أما مدير الإدارة التعليمية فقد قال : أن النتيجة ظهرت بدون ما " أشوفها  واعتمدها " هههه .. وعلى فكرة  يا سادة .. كل ما قيل في هذه القضية  دي  والمهزلة دي  والمستنقع ده صحيح  ويحدث مُنذ بداية السبعينيات  وحتى الآن .. وموجود بالفعل  في غالبية مراحل التعليم في مصر .. بداية من الروضة مروراً  بالحضانة وابتدائي وإعدادي والثانوي  بأنواعه  وحتى في الجامعة  وما بعد الجامعة .. إلا من رحم ربي  من الشرفاء .. وهكذا  الكل شريك  في  إفساد  العملية التعليمية   الطلاب وأولياء الأمور والمعلمين  والمسؤولين .. المسؤولية مشتركة بين جميع أركان العملية التعليمية  .. وهو ده.. حال التعليم في مصر .. الفساد الفساد الفساد .. المنظومة كلها  طالب   وولي أمر وعلم  وتربية  وتعليم   ومنهج ونظام وقوانين   ومسؤولين تحتاج إلى إعادة نظر  .. لا أمل في بلد تعليمها فاسد  .. ولن  أيأس  وسأظل أقولها: نحن في مصر  في حاجة شديدة  إلى ثورة  ضمير وأخلاق  على أنفسنا ومن أجل أنفسنا ومن أجل بلدنا مصر يا ناس  .. نحن في مصر نحتاج إلى إعادة بناء  الإنسان المصري ..
---------------------------------------------------
د.شهيرة عبد الهادي
#Drshahera_Abd_Elhady_Ibrahem

رسالة إلى سعادة الرئيس السيسي .. بقلم د.شهيرة عبد الهادي

رسالة إلى سعادة الرئيس السيسي
-----------------------------------------
سأظل أقولها .. تحيا ثورة 25 يناير 2011م .. والتي أظهرت حجم العفن والفساد المتغلغل في كل سنتيمتر من أرض مصر .. وعفن وفساد نفوس الحيتان الكبيرة المتوحشة في العهود السابقة .. ولعل إظهارها لتلك لحيتان على السطح وجعلهم يأكلون بعضهم البعض .. يكون في مصلحة الشعب المصري .. وده عاوز قلب من حديد لا يخاف إلا الله .. ونُطالبكم بهذا القلب الحديدي الذي أعلم تماماً أنه مُحب مُخلص لمصر ولا يخاف إلا الله سبحانه وتعالى وحده .. الله معك ..
--------------------------------
د.شهيرة عبد الهادي

يا ترى ما أسباب حالة الارتباك التي نعيشها في مصر الآن .. بقلم د.شهيرة عبد الهادي

امبارح  كنت في حالة " زهقان" .. مسكت الريموت وقعدت أقلب بين القنوات .. ولقتني مش عاجبني حاجة   ولا فيه حاجة بتغذي عقلي  ولا بتشدني   وفي نفس الوقت مليش نفس أقرأ   أي حاجة.. وانا باقلب  .. لقيت  الكاتب  وحيد حامد  على قناة cbc في برنامج ممكن .. قلت .. حلو يلا فيه حاجة كويسة أهي  إسمعيها  وشوفيها  .. فـ مما لاشك فيه أنه كاتب رائع .. وجلست أستمع إليه  ..  تنقل  الكاتب وحيد حامد بين موضوعات متنوعة  مطروحة على الساحة .. لم أجد فيها جديداً لديه  عما نعرفه  نحن  عنها  .. كل ما قاله  نحن نعلمه  ونتحدث فيه  وبنفس الكيفية .. تناول الفساد في البلد  في شتى صوره .. فساد الأخلاق  والضمير و فساد  بعض الفئات  التي تعمل  في البلد  والتي تحدث عنها في أعماله من سنوات وسنوات .. أمناء الشرطة وقانون الخدمة المدنية  وصفر مريم  والإخوان والسلفيين والجماعة  والمهندس إبراهيم محلب والمهندس شريف إسماعيل  وقضية وزير الزراعة  صلاح هلال ووو... إلخ  .. لكنه لم يضع حلولاً للعلاج  وعندما أعيد عليه السؤال لتصوره  عن الحلول   لم يستطع الإجابة .. واستمر هكذا ..  إلى أن قال في آخر حديثه وآرائه  بالبرنامج  ..  رداً على سؤال للمذيع و تكرار مطالبته له بأن يضع حلولاًُ لتلك المشاكل  .. أنا في حالة ارتباك  والمشهد كله في حالة ارتباك .. هنا  بقى .. أنا  اطمنت على نفسي .. يعني حالة الارتباك  التي أعانيها أنا شخصياً وتتسبب لي في حالة اكتئاب أحياناً  وحالة  من الوهن  النفسي والجسدي  غالباًَ ..  قد أصابت  حتى من هم قريبين من أصحاب الياقات البيضاء  وأصحاب المطابخ المتعددة في جميع مجالات اتخاذ القرارات في  البلد   ..  و حالة الارتباك  والوهن النفسي والصحي هذه بالفعل أنا  قد لاحظتها  على شكل وصوت ونظرات  الكاتب وحيد حامد  ولعلي أكون  مخطئة في ذلك  وأعتذر عن ذلك لو أخطأت .. هنا  سألت نفسي  سؤالاً .. هو  اللي قدر  يوصل   الناس إلى هذه الدرجة من الارتباك  حتى مثقفيها  وصانعي المواقف  والقرارات فيها ..  يا ترى هو نفسه مرتبك ايضاً ؟.. يا ترى  هو قادر على إزالة حالة الارتباك هذه ؟.. يا ترى هو  يقصد ذلك  ؟ .. أم أنه نفسه غير قادر على إزالة الارتباك عنده أيضاً ؟ .. إن حالة الارتباك التي نعيش فيها هذه  قاتلة  للإبداع  عند  كل من يشعر ويحس ببلده  أي عند كل شخصية حساسة  لا تتمركز حول ذاتها فقط  ..كما أن حالة الارتباك هذه  بالتبعية  تنسحب على كل مؤسسات الدولة  وهذا واضح  جداً عند الاحتكاك بها والتعامل معها .. ثم أن حديثه قد أوضح  أن حالة الارتباك هذه كانت في مصر منذ سنوات ؟  .. وهنا وجدتني أتساءل بيني وبين نفسي  هذا السؤال .. لماذا  ؟  والبلد فيها مثقفين  ومبدعين ؟ أم أنهم هم أنفسهم جزء من حالة الارتباك هذه ؟ .. ثم وجدتني أقول  لنفسي  : البلد  فيها كفاءات  بأمانة  في كل المجالات منها على سبيل المثال  " مجال الكتابة "  .. لكن لم يصلوا  لنفس المكانة التي وصلت لها تلك الأسماء الكبيرة  .. يا ترى  ليه ؟.. هل الارتباك  هو المسؤول  ؟ .. أم أنهم  أيضاً من ضمن المسؤولين عن عدم إتاحة الفرصة للآخر  وهم ممن شاركوا في صنع حالة الخواء الاجتماعي والخلقي والعقلي  التي انكشفت  مؤخراً   في بلدي   ؟ .. ثم إذا كانت المشاكل التي يعاني منها المجتمع المصري منذ العهد الملكي وحتى الآن هي هي  مع احتلاف حجمها  وطهورها على السطح مع التقدم التكنولوجي  وإتاحة المعلومة  للجميع .. وأنها  لم تجد حلولاً مع تعاقب  الملكية والجمهورية  والملوك والرؤساء إلى أن وصلت الحال لما وصلنا إليه الآن  من تردي غير مسبوق .. فـ يا ترى .. هل  هي طبيعة شعب ؟ أم  عدم قدرة ؟ أم عدم رغبة ؟ ..  وهنا أجدني أعود ثانية إلى المشهد المرتبك الذي نحن فيه !!!.. يا ترى ما هو الحل ؟.. لماذا كلنا  ننتقد  وعندما نبحث عن حلول  لا نجد .. أو لا نعرف  ماهية تلك الحلول  ..أو لا تعرف كيفية التوصل إلى هذه الحلول ؟ .. لماذا لا نستطيع التعامل مع حالة الارتباك هذه  ؟ .. أم أننا لا نريد التعامل مع الارتباك  لآننا كلنا  " عبده مشتاق"  وكلنا "فاسدون"  وما يهمنا هو مصالحنا الشخصية وبس ..  أم  هو عيب في التكوين العقلي والنفسي لنا ؟  أم  هو عيب في التكوين الاجتماعي للمناخ الذي عشنا فيه ؟ .. لا أعرف .. لكن ما أعرفه جيداً هو أن ثورة 25 يناير 2011م  أحدثت نوعاً من الخلخلة في وجدان الشعب المصري  بات من الصعب معه  تقبل أي شيء  وربما في يوم من الأيام نجد حلولاً لما نعانيه الآن ..
--------------------------------------------------
د.شهيرة عبد الهادي
#Drshahera_Abd_Elhady_Ibrahem

حول مكبرات الصوت في المساجد .. بقلم د.شهيرة عبد الهادي

الراجل اللي في المسجد اللي جمبي .. بدون مبالغة .. عمال يجرب في ميكرفون المسجد .. وهو .. بيقول .. "بسم الله الرحمن الرحيم" وكمان بيقول "الله" .. عشرات المرات إن لم يكن مئات المرات .. نص ساعة كاملة وهو على دي الحالة .. وبيقول بصوت عالي وأجش ..ودوشة لا تحتمل .. والميكرفون بيصفر والراجل بيصوت .. مفيش فايدة في سلوكياتنا .. فكرني بالستات اللي كانت في المسجد سواء في السعودية أو مصر .. دي تقولي اتوضي كده يا أخيه ..ودي تقولي لأ الوضوء مش كده يا أخيه .. ودي تقولي رجليكي غلط وانت واقفة يا أختي في الإسلام ..ودي تقلي رجليكي صح وانت واقفة يا أختى في الإسلام .. وقعدوا على كده .. لغاية ما زهقوني وطهقوني وطفشوني م المسجد .. وخلوني معنتش باصلي إلا في بيتي وبس وفي حجرتي وبس .. مفيش فايدة فينا وفي تصرفاتنا ..كمان فكروني بالوفد الياباني اللي كان جاي عشان يحط قوانين لتنظيم المرور عندنا .. فطفشوا .. وقالوا خليكوا كده زي ما انتوا .. انتوا لا بتحترموا نظام ولا قانون ولا أي حاجة .. ومينفعش معاكم أي قانون .. وقالوا لنا باي باي ..

هل هذا هو المطلوب إنجازه فقط من وزير الثقافة الجديد ؟.. بقلم د.شهيرة عبد الهادي

وائل الإبراشي بيسأل وزير الثقافة  الجديد .. الكاتب   المتميز حلمي النمنم ..في حلقة اليوم السبت 19 / 9 / 2015م من العاشرة مساءً..  هي إيه اهتماماتك في الوزارة الجديدة .. رد عليه وقاله:اللي ح اهتم بيه واللي جاي هو : مهرجان القاهرة السينمائي الدولي والمعرض الدولي للكتاب  .. عشان الناس تشوف إن احنا بنحارب الإرهاب وفي نفس الوقت بنعمل المهرجان السينمائي وفي نفس الوقت بنعمل معرض الكتاب .. وهذا كلام جيد لا غبار عليه ..لكن  هل هذا هو المطلوب  فقط من وزير ثقافة مصر  الآن  .. و في الحقيقة و بالرغم من اعترافي بمكانة الأستاذ حلمي النمنم ككاتب محترم ولا ينكر أحد ذلك واحترامي له كشخص.. لكن  لابد من أن يكون لديه  رؤية ورسالة واستراتيجية  لمهام وزارة الثقافة في مرحلة من أخطر المراحل في مصر.. خاصة في الفترة الحالية ما بعد ثورتي 25 يناير و30 يونيو .. وما نلاحظه بوضوح من تردي الحالة الثقافية في مصر والانفلات الأخلاقي والقيمي في البلد وانتشار الفساد حتى في وزارة الثقافة نفسها والتي نقرأ عنه يومياً في مجالات المسرح والسينما والإعلام المرئي والمسموع والورقي .. وما تتطلبه الحالة الثقافية في مصر من علاج وانتعاش .. في جميع مناحي الحياة الثقافيه بها .. مع ملاحظة أن جميع الإعلاميين سعداء بهذا الاختيار .. عموماً نتمنى لسعادته التوفيق لخدمة الثقافة في مصر باعتباره صحفياً ويعلم الكثير مما ذكرته   ويعلم الكثير مما لانعلمه نحن .. وربما تكشف لنا الأيام عن المزيد من اهتمامته بالشأن الثقافي في مصر .. مع تمنياتي وتمناياتنا جميعاً للوزراء الجدد والحكومة الجديدة في معالجة كل مشكلات المواطن المصري  الذي نطالب دائماً  بالاهتمام ببنائه ..
-------------------------------------------------------
د.شهيرة عبد الهادي
#Drshahera_Abd_Elhady_Ibrahem

إنا لله وإنا إليه راجعون ....

إنا لله وإنا إليه راجعون .. يُنعي " ملتقى محبي الله والوطن " فقيد الإمارات .. المغفور له الشيخ راشد بن محمد راشد آل مكتوم الذي توفي اليوم السبت 19 / 9 / 2015م .. عن عمر يناهز 34 عاماً.. بالإمارات العربية الشقيقه إثر نوبه قلبيه .. وهو الإبن الأكبر للشيخ محمد بن راشد آل مكتوم .. وإنا لله وإنا إليه راجعون ..للأسرة الحاكمة بالإمارات خالص التعازي .. اللهم الهمهم الصبر والسلوان ..اللهم أدخله فسيح جناتك ..اللهم آمين .. تعازينا للشعب الإماراتي وللأسرة الحاكمة بالإمارات .. الإمارات تحب مصر ووقفت بجوارها كثيرا .. ومصر تشاركها الأحزان ..

(كلمتين بالبلدي) أنا مبحبش التكريم الأرديحي .. بقلم د.شهيرة عبد الهادي

(كلمتين بالبلدي )
---------------------
في برنامج مانشيت اليوم الأحد 20 / 9 / 2015م.. كان فيه لقاء مع الكاتب علي سالم .. كاتب  مسرحية مدرسة المشاغبين .. في الحقيقة أنا مشفتش إلا الجزء اللي ح اكتب عنه دلوقتي..  وهواللي اتقال  في الدقائق الأولى للقاء قبل الفاصل الأول  له .. وفي هذا الجزء..  القرموطي في البداية سألوا عن الكتابة وما إذا كان ممنوعاً من الكتابة في مصر  ولماذا لم يتم تكريمه في مصر .. وهنا  بقى بدأت مأساتي مع ردوده ولعلي أكون مخطئة .. باختصار هو قال .. إذا كنت عاوز تكرمني  كرمني بدفتر شيكات !! يعني تعالى ومعاك دفتر شيكات ..لأنني لا أريد أن يكرمني أحد من خلال تكريمه لنفسه .. وتحدث عن الفلوس كثيراً  وطالب بها  بطريق مباشر.. على اعتبار  أنه سيكمل عامه الـ 80 في يناير القادم   وأنه يعاني من أمراض كثيرة.. مع ذكره تكراراً ومراراً بأن هذا ليس استجداءً وإنما  نوع من المطالبة !! وكما قال بالحرف الواحد " إنت يا اللي عاوز تكرمني عارف أنا عاوز الفلوس ليه والعلاج بيكلف  قد إيه " ..على اعتبار أن فيه حد عاوز يكرمه  وهذا  مجرد طرح من القرموطي  لأن محدش كرمه فعلاً  .. وبالطبع دعواتي  له ولكل مريض بالشفاء  وواضح مدى حاجته للفلوس  .. لكن اللي وجعني  بأمانة .. هو الآتي .. عندما سأله القرموطي عن مدرسة المشاغبين  وقال له : أن هذه المسرحية عليها الكثير من الانتقادات وأن الكثيرين يقولون عنها : أنها سبب الانهيار الأخلاقي للتلاميذ في مصر  مع بداية السبعينيات .. كان رده الآتي .."لو كانت  مسرحية هي سبب الانهيار الأخلاقي للطلاب في مصر .. فإن  مسرحيتين تلاتة  يصلحوا الانهيار الأخلاقي في مصر بس إرمي بياضك ..  واستطرد قائلاً مع ملاحظة أن مسرحية مدرسة المشاغبين كانت معمولة بعد موت عبد الناصر يعني في بداية السبعينيات مع عصر الحرية و التحرر من حكم الفرد بس الممثلين كانوا صيع !!! "  ..  بأمانة   هنا أنا زعلت ومكملتش اللقاء  ولو أني لو إتيحت لي الفرصة ثانية  لرأيته وسمعته  ثانية حتى ألم بجميع  جوانب فكر هذا الرجل .. مما لا شك فيه أن الكاتب علي سالم كان واضحاً  وصريحاً لكن كلامه  أفصح عن الكثير  العجيب ..معقوووووووووولة    كده  وبمنتهى البساطة  النظرة  إلى  كيفية  التحكم في   أخلاقيات  وثقافة بلد : مسرحيه تخليها وحشة  ومسرحيتين تلاتة يخلوها حلوة  ؟؟!!!!!  .. إذا نحن معنا حق في كل كلمة نقولها بخصوص الانهيار الأخلاقي   في مصر ..
-------------------------------
د.شهيرة عبد الهادي
#Drshahera_Abd_Elhady_Ibrahem

يا رب يا رب يسعدكم ويهنيكم ويفرح قلوبكم ..
وتقضوا عيد أضحى مبارك وسعيد مع أسركم وحبايبكم يا رب ..
يا أغلى الأصدقاء والصديقات يا أجمل ما في حياتي ..
كل عام وحضراتكم بألف خير.. عيد أضحى مبارك ..

من إبداعات ابن الفارض ...

ﺃًُﺧﻔﻲ ﺍﻟﻬﻮﻯ ﻭﻣﺪﺍﻣﻌﻲ ﺗُﺒﺪﻳﻪ ..
ﻭﺃُﻣﻴﺘﻪ ﻭﺻﺒﺎﺑﺘﻲ ﺗُﺤﻴﻴﻪ..
ﻭﻣُﻌﺬﺑﻲ ﺣُﻠﻮ ﺍﻟﺸﻤﺎﺋﻞ ﺃﻫﻴﻒُ ..
ﻗﺪ ﺟُﻤِّﻌﺖ ﻛُﻞ ﺍﻟﻤﺤﺎﺳﻦ ﻓﻴﻪِ..

ﻓﻜﺄﻧﻪ ﺑﺎﻟﺤُﺴﻦ ﺻﻮﺭﺓ ﻳُﻮﺳﻒ..
ﻭﻛﺄﻧﻨﻲ ﺑﺎﻟﺤﺰﻥِ ﻣﺜﻞُ ﺃﺑﻴﻪ..
ﻳﺎ ﻣُﺤِّﺮﻗﺎ ﺑﺎﻟﻨﺎﺭ ﻭﺟﻪ ﻣُﺤﺒﻪِ..
ﻣﻬﻼً ﻓﺈﻥ ﻣﺪﺍﻣﻌﻲ ﺗُﻄﻔﻴﻪ..
ﺃﺣﺮِﻕ ﺑﻬﺎ ﺟﺴﺪﻱ ﻭﻛﻞ ﺟﻮﺍﺭﺣﻲ ..
ﻭﺍﺣﺮﺹ ﻋﻠﻰ ﻗﻠﺒﻲ ﻓﺈﻧﻚ ﻓﻴﻪ..
ﺇﻥ ﺃﻧﻜﺮ ﺍﻟﻌﺸﺎﻕ ﻓﻴﻚ ﺻﺒﺎﺑﺘﻲ..
ﻓﺄﻧﺎ ﺍﻟﻬﻮﻯ ﻭﺍﺑﻦ ﺍﻟﻬﻮﻯ ﻭﺃﺧﻴﻪ ..
---------------------------
ابن الفارض