رمضانيات 1436هـ(6) ..
-----------------------------
ونحن في شهر المباديء ..
العبقرية .. أن تكون وفياً.. وأن تعتبر ذلك من المناقب وفضائل الأعمال
.. في مناخ مريض ندر فيه الوفاء ..مناخ يعتبر الوفاء إحدى مقدمات
التملق والبحث عن المصالح .. من وجهة نظر ضعفاء النفوس ممن أنت مُصر أن
تكون وفياً معهم ..
-------------------------------
د.شهيرة عبد الهادي
#Drshahera_Abd_Elhady_Ibrahem
يا رب .. يا الله .. اللهم أنعم عليَّ وأحبتي في الله بالصحة والعافية .. آمين ..
لقد وصل الإسفاف والانحدار في برامج ومسلسلات رمضان 1436هـ / 2015م إلى
حد لا يمكن احتماله .. ألفاظ في منتهى الانحطاط بالإضافة للعري والرقص
والبلطجة وإظهار المرأة المصرية على أنها فتاة ليل مع عدم وجود فن ولا
تمثيل ولا حبكة درامية ولا سيناريو ولا حوار .. برامج سخيفة غير هادفة
ومضيعة للوقت ولا تحترم عقلية المشاهد..ومنها على سبيل المثال.. برنامج
على قناة تقول على نفسها أنها أجرأ قناة في مصر.. قيل فيه ألفاظ سوقية وتم
فيه مشهد لا يمكن احتماله وصل فيه الاستهتار بالشعب إلى حد تحفيز شاب
لكي يقضي حاجته في الشارع مع ذكر الأصوات والألفاظ التي تقال على مثل هذه
الحالة وتصفها .. هل هذا هو الفن ؟ .. هل هذه هي حرية الإبداع ؟.. الفن
والإبداع من شأنهما الارتقاء بالوجدان والذوق العام للشعب.. أما ما يتم
عرضه من أعمال في شهر فضيل كشهر رمضان فهذا تخريب متعمد للوجدان المصري
وذوقه العام وثقافته ولا يتناسب مع ما نتغنى به من حضارة 7000 سنة ..
يا رب .. يا الله .. اللهم اجعلني في عيني صغيرة وفي أعين الناس كبيرة .. آمين ..
عمري ما ارتحت للمذيع " أحمد منصور " .. عندما كان يستضيف بعض رموز
الدولة المصرية من الرجال والنساء على قناة الجزيرة _و هم كانوا سعداء
بهذه الاستضافة _.. فقد كنت أثناء متابعتي للحوار .. ألاحظ نظراته
وطريقته في " اللعب بحواجب عينيه " .. خلال تحاوره مع الضيف .. فينتابني
شعور بالاستياء الشديد جداً .. ولا أكمل مشاهدة الحوار .. في عز ما
كانت الجزيرة مثار إعجاب الجميع .. ومتستهونوش بلغة الجسد .. لأن ورائها
بيكون الكثير والكثير .. الزمن كفيل بإظهار الحقائق .. لعن الله السياسة
وساس ويسوس ..
على فكرة و بالبلدي كده ..اللي بيحب بلده مصر وبس وبجد ومبيدورش على
سلطة ولا منصب.. مش هو اللي بيقعد يطبل ويزمر طول النهار والليل للنظام ..
ولا هو اللي بيقعد يشتم في النظام طول الليل والنهار .. اللي بيحب بلده
مصر بجد .. هو اللي عايزها تكون أحسن بلد في الدنيا .. وعشان تكون أحسن
بلد في الدنيا .. لما يشوف حاجة حلوة بتحصل يشيد بيها .. ولما يشوف حاجة
وحشة بتحصل يقول عليها .. عشان نقضي ع الوحش وندمره ونستبدله بالحلو ..
مصر دي بإذن الله لازم ترجع زي ما كانت .. وعشان ترجع زي ما كانت .. لازم
نكون موضوعيين ونقول الحلو والوحش .. ونقول على كل فساد في البلد ..
البلد فيها فساد في كل سنتيمتر فيها .. وعلى فكرة أنا عمري ما حاكون
إخوان .. قبل ما حد يتكلم في الموضوع ده .. وعشان كمان الإخوان اللي
بيدخلوا على الخط عشان أنا خلاص زهقت منهم ومن إسلوبهم اللي انا عارفاه
كويس قوي .. نريد مصر كما نتمنى ..
النت بيسرقنا .. إستحالة تكون السرعة اللي بتديهالنا TE Data هي
الحقيقية لأن النت بطئ علطول .. وكمان فودافون بيسرقنا .. فودافون عامل
إعلان العائلة الرهيب ده .. شوفوا بقى تكلفته قد إيه .. مع أنه نصب في
نصب .. بناء عن تجربة شخصية .. مريومة بنت اخويا .. إشترت كارت ..
وبعتت لأربعة من أسرتها وأنا كنت واحدة منهم .. رصيد بنفس قيمة الكارت ..
وأنا عن نفسي كشفت عن رصيدي بعد ما هي بعتتلي رصيد وبعد أنا ما اتكلمت
مكالمة وكنت عارفة رصيدي السابق .. لقيتوا زي ما هو بل بالعكس نقص أكثر
من قيمة المكالمة .. يعني لا زاد بقيمة ما يقابل الرصيد اللي
بعتتهولي مريومة ولا حاجة.. دا غير الرسائل اللي بتلزق في الموبايل دي
وأنا مش فاهمة فايدتها إيه .. الكل بيسرقنا ..
رمضانيات 1436هـ(5) ..
-----------------------------
ونحن في شهر العدل والمساواة ..
العبقرية .. أن تُعمل العقل .. تتغلب على ضعفك الإنساني بالانتقام ممن
ظلمك..و اترك أمرك لله فهو العادل..و تذكر كم مرة وقف الله بجوارك ..
وأنقذك من ظلم البشر .. وأن تتدبر كلام الله .. "إِلَّا الَّذِينَ
آمَنُوا وَعَمِلُوا الصَّالِحَاتِ وَذَكَرُوا اللَّهَ كَثِيرًا
وَانتَصَرُوا مِن بَعْدِ مَا ظُلِمُوا ۗ وَسَيَعْلَمُ الَّذِينَ ظَلَمُوا
أَيَّ مُنقَلَبٍ يَنقَلِبُونَ" ..( الشعراء :227)
----------------------------------
د.شهيرة عبد الهادي
#Drshahera_Abd_Elhady_Ibrahem
رمضانيات 1436هـ(4) ..
-----------------------------
ونحن في شهر العزة ..
العبقرية .. ألا تكون كرامتك من ورق .. في مناخ فاسد جعل من الورق نموراً مُفترسة ..
-------------------------------
د.شهيرة عبد الهادي
#Drshahera_Abd_Elhady_Ibrahem
رحت الكلية النهارده .. إيه الحر ده وإيه الرطوبة دي .. وانا ماشية كنت
حاسة .. أن رجليا في مكان .. وبقيتي في مكان تاني خالص .. والسكة
طووووووووووويلة ومش عاوزة تخلص .. ههههههههههههه ..
رمضانيات 1436هـ(3) ..
-----------------------------
ونحن في شهر التسامح ..
العبقرية .. أن تكون مُتسامحاً مُتحملاً جهل مؤذي .. في مناخ يصف التسامح بالضعف ..
-------------------------------
د.شهيرة عبد الهادي
#Drshahera_Abd_Elhady_Ibrahem
من المشاهدات المبدئية لحلقتين فقط من بعض مسلسلات هذا العام .. أعتقد
أن مسلسل " حارة اليهود " سيكون الأفضل .. أما الدوافع وراء فكرة
هذا المسلسل .. فلن تتضح الآن .. وستتضح بعد مشاهدة جميع حلقاته ..
خاصة بالنسبة للجزئية التي تشيد بوطنية وطيبة وإخلاص اليهود
المصريين لمصر ..
فيه حاجة لفتت نظري كده في مسلسل شفته بالصدفة إسمه " حواري بوخارست" ..
في المسلسل ده .. شخصية لسيدة معروف أن سلوكها منحرف في الحارة أي "
سيئة السمعة ودي شغلتها وبضاعتها" .. اللي لفت نظري .. أن الست دي
إسمها في المسلسل " يونيه " .. وكمان بطل المسلسل "أمير كرارة" ..وهو
ماشي مع بنت لبنانية في حواري بوخارست .. البنت دي " فتاة ليل" أيضاً
وسكرانة.. وهو واخدها يسهر معاها .. لفت نظري أنه بيقول لها .. سمعتي
أغنية " بشرة خير " .. ردت عليه باللبناني وهي تتمايل وقالتله
" إي بتجنن" .. رد عليها وفال ليها " أهو الخير كله بقى عندي" .. مش
عارفة هل كل ده مقصود؟ ولا صدفة ؟ وليه؟ .. الفكرة مش واضحة
الحقيقة..لكن لفت نظري ذكر " يونيه" و" بشرة خير" مع سيدات وبنات
منحرفات .. وعشان أكون أمينة الواحد المفروض يشوف حلقات أكتر عشان يقدر
يشوف إيه الموضوع .. لكن الحاجات دي لفتت نظري ..وأنا شايفة أنها حاجات
سيئة .. والرأي لحضراتكم بقى ..
رمضانيات 1436هـ (2)
---------------------------
ونحن في شهر الصدق ..
العبقرية .. أن تكون صادقاً وتتحمَّل تبعات صدقك .. في مناخ يتنفس الكذب ..
-------------------------------
د.شهيرة عبد الهادي
#Drshahera_Abd_Elhady_Ibrahem
رمضانيات 1436هـ (1)
-----------------------------
ونحن في شهر الحُب ..
العبقرية .. أن تٌحب الآخر في الله .. في مناخ المصالح والماديات والفساد ..
-----------------------------------
د.شهيرة عبد الهادي
#Drshahera_Abd_Elhady_Ibrahem
ولا ننسى في رمضان 2015م / 1436هـ .. شهداء ثورة 25 يناير 2011م من
الشباب النبلاء الذين كان هدفهم الله والوطن فقط ..تحية إلى كل شهيد في
مصر.. من عامة الشعب ومن الجيش والشرطة الذين ضحوا بدمائهم من أجل مصر..
ونقول لهم .. رمضانكم في الجنة إن شاء الله ..
تحية خاصة إلى الجيش المصري اللي واقف ع الحدود ومنتشر في كل مكان في مصر..
وهو صايم في الحر ده والرطوبة دي ..كل رمضان وأنت أعظم جيش في العالم يا
رب ..
وطني .. كل رمضان .. وانت وطني ..
يا جنود مصر .. من الجيش والشرطة والأمن والمرور والتحريات والأفراد
وحتى الغفراء .. أرجوكم .. لا تأخذوا .. أيه .. وجبات .. من أي حد .. حتى
في شهر رمضان المبارك .. مهما كان نبل المقصد .. و حتى لو كان ممن
تعرفوهم شخصياً .. حفاظاً على أنفسكم .. فأرواحكم غالية عندنا .. وربنا
يستر .. ويعدي شهر رمضان على خير ..
ألف
شكر يا أجمل " هيثم " .. وربنا يستر عليك .. بعد ما ظهرت صورتك ..
فعلالالالا.. "ملح الأرض" .. هو .. اللي حيحمي مصر .. ضد الإرهاب
اللعين ..
كل عام وحضراتكم طيبيين .. يا أهلي وناسي ..
يا أنبل أصدقاء وصديقات في مصر .. ومن كل بلاد العالم .. العربي والإسلامي
و الإنساني ..
مفيش نوم .. شباب الشارع مزأطط وفرحان وعمال يعلق في زينة رمضان ..
يا رب فرح كل شباب وشيوخ وبنات وولاد ورجال وسيدات وجنود مصر
بمصر .. كل عام وحضراتكم بألف خير..
وده اللي انا بـ اقوله كل يوم .. نحن أصبحنا في مجتمع .. منفرط العقد
..للروابط الاجتماعية الإنسانية .. وهذا ما يُكَّون العنف بين الناس
ويُغذيه .. وإذا لم تُعالج مشكلات المجتمع علاج جذري .. باستخدام العلاج
الاجتماعي ..وتطبيق القانون بعدل وصرامة سيحدث ..أكتر من ذلك..
أمين شرطة ينتمي للأمن الوطنى .. قتل 3 .. أثناء مشاجرة بين عائلتين في
الزقازيق بمحافظة الشرقية .. من بينهم ﻻعب كرة قدم .. وعندما توجهت قوة
للقبص عليه ..وكان يرأسها طابط أمن وطني آخر برتبة مقدم .. وأثناء قيام
القوة بعملها .. أطلق أمين الشرطة المذكور النار على قائد هذه القوة ..فـ
أرداه قتيلاً .. وفي الحال تعاملت معه القوة وأردته قتيلاً أيضاً .. إذا
أصبح العدد النهائي .. 5 قتلى .. مع ملاحظة أن الضابطين كان يعرفا
بعضهما البعض كما قيل في تفاصيل الحادث .. وهذا يوضح ما أشير إليه يومياً
.. #مشكلات_مصر_متجذرة_تحتاج_إلى_علاج_احتماعي_وتطبيق_قانون_بعدل_وصرامة_
المهندس إبراهيم سمك ابن الجنوب المصري الذي هاجر لألمانيا من 25 سنة .. العالم المصري الذي أنار مبنى المستشارية الألمانية كلها بالطاقة الشمسية .. بيشرح الفكرة والعملية للمذيع .. وبمنتهى البساطة والثقة بالنفس .. وقال للمذيع : الموضوع سهل ومش محتاج أي تعقيدات .. والمذيع مستغرب وفاتح بقه ومذبهل .. من كلامه المتواضع ده .. ليه مستغرب يا حضرة المذيع .. هو حضرتك يا سعادة المذيع .. مش مصري .. يعني معندكش فكرة عن المصريين وطبايعهم .. المصري داخل مصر .. يحب .. يبيِّن للناس في شغله .. إن الشغل اللي بيعمله شغل كبير أوي .. وأن الموضوع صعب أوي ..حتى لو كان بيلزق ورقتين على بعض بشوية صمغ.. و يقعد يعرَّض في الموضوع .. ويخبي في الموضوع .. ويقعد يبيَّن للناس .. إن هو اللي بيشتغل وغيره ما بيشتغلش .. ويروح عند رؤسائه .. ويبين أن هو الوحيد اللي بيشتغل في العمل اللي بيقوم بيه ويدِّي ذُنب في المجموعة اللي معاه ..وممكن كمان يمثل وهو داخل على رؤسائه .. ويعوج دماغه على كتفه .. على أساس.. أنه يا عيني شايل الشغل كله على اكتافه .. ومفيش حد بيساعده ..وكل اللي معاه نايمين.. وهو بس اللي تعبان .. وأن كل اللي معاه مبيشتغلوش ووحشين ..وهو اللي عسل وسكرة .. مع أن هو اللي بطبعه أناني و عاوز يشتغل لوحده .. ولو حد جه جمبه ..يخبي منه الشغل الفظيع اللولبي اللي بيعمله .. ولا كأنه بيعمل في قنبلة ذرية .. مع أنه ممكن يكون مبيعرفش يقرأ كلمتين على بعض والعمل اللي بيعمله تافه جداً.. ويقعد يضيع في الوقت على شغل ميآخدش نصف ساعة .. ويعملوا في 4 ساعات .. ومع ذلك الشغل بيكون أي كلام وكله أخطاء ومفيش فيه اتقان ومشي حالك وإثبات حالة والسلام .. و يقعد في بيته بالأيام ولما يجي الشغل يقعد يلف ع المكاتب عشان يوري الناس وشه وكمان يروح عند رؤسائه عشان يبين ليهم أن هو أبو الفكاكة كلها وأبو الجدعنة كلها وأبو الفهلوة كلها .. المصري مبيحبش الشغل الجماعي .. المصري يحب يستأثر لنفسه بكل شيء حتى لو خسر الجماعة .. والنتيجة أننا من تخلف لتخلف .. وما زلنا نعاني الفقر والجهل والمرض .. اللي نجَّح المهندس إبراهيم سمك في ألمانيا.. أنه وجد بيئة تساعده على النجاح ومناخ يساعد على الاستمرار بدون محاربته .. وأنه اتعلم في ألمانيا روح العمل الجماعي وروح التواضع .. مش بيئة مُحبطة .. كلها مليئة بروح الأثرة واللعب بالبيضة والحجر وشغل الحلانجية والفهلوة والأونطة وعدم الضمير واللي تكسبه العبه ..وشغل العصابات والشلل والتآمر على الغير في العمل .. واللي شغلتهم الغيرة من بعض والحقد على بعض والحسد لبعض والحساب لبعض .. وقعدتهم طول النهار كلها غيبة ونميمة والحديث في أعراض الناس وقطع أرزاقهم .. وكمان يحاربوا الناجح أو اللي حسوا أنه ممكن يكون ناجح أو متميز في حاجة حتى ولو كان في لون الشراب اللي لابسه و ميسببوهوش إلا لما يدمروه نفسياً ..
--------------------------------------------------------------
د.شهيرة عبد الهادي
#Drshahera_Abd_Elhady_Ibrahem
يا رب في يوم الجمعة.. إجمع شمل أبناء مصر على حب مصر ..
جمعة مباركة علينا وعلى كل فرد في مصر وعلى كل أصدقائي وصديقاتي الأعزاء ..
يعيش السواق " هيثم" اللي بلَّغ عن الإرهابيين اللي كان هدفهم معبد الكرنك
في الأقصر أو أي هدف تاني.. فعلاً.. شعب مصر الغلبان هو اللي حيحمي مصر ..
ألف تحية يا هيثم يا راجل يا وطني .. #تحبا_مصر
جنايات القاهرة.. تصدر حكماً .. بالسجن .. 15 سنة .. على ظابط الشرطة " يس
حاتم" .. الذي قتل .. شيماء الصباغ .. واللي اتقال .. إنه حكم نهائي .. إلا
إذا كنت أنا سمعت خطأ .. #كده_صح_القانون_هو_الحل_ #ولتحيا_مصر_
بالنسبة للرجال أو أشباه الرجال اللي بترقص ببدل رقص شرقي .. دي مش
جديدة.. لأنهم .. أو أنهن.. بيرقصوا .. على شاطيء بحر العجمي من زمان ..
والناس بتروح تتفرج عليهم .. وبتيجي مبسوطة .. للأمانة أنا مشفتش بنفسي ..
لكن جارتي هي وأسرتها اللي شافوا المسخرة دي على شاطيء شهر العسل
بالعجمي السنين اللي فاتت .. مع ملاحظة أن العجمي من سنين .. شعبي بامتياز
.. العاشرة مساءً تناولت هذا في برنامجها اليوم .. ومما .. استفزني .. أن
مقدم البرنامج .. بيقول.. "اعتراضي الآن لأنها اتعمل لها مهرجان
مخصوص.. لكن الرجالة اللي بترقص دي موجودة وبترقص في شرم الشيخ والغردقة
عشان السياح عادي وبيقولها كده عادي وهو هاديء ولا كأن فيه حاجة !!" ..
وانا باقول .. وبعدين بتعترضوا ليه دلوقتي .. هو مش فيه رجالة ممثلين
وليهم أفلام ورجالة ليهم فرق استعراضية بيرقصوا ولا أجدع رقاصة بس هم
بيرقصوا ببدل رجالي .. مشكلات مصر يا سادة متجذرة من زمان وعاوزة علاج ..
مش للإستهلاك في البرامج الإعلامية ..
كل شوية .. أقرأ ..عن .. جمعية أصدقاء الحيوان .. جمعية أصدقاء الفنان ..
جمعية أصدقاء الشرطة .. جمعية أصدقاء المعلمين .. جمعية أصدقاء المحاميين
.. جمعية أصدقاء الغفير .. ووووو .. طب .. اعملوا .. جمعية أصدقاء الضمير
.. وضموا ليها كل شعب مصر.. من أجل مصر .. وابدأوا بأنفسكم ..#الضمير_هو_الحل_
وزير التخطيط قالها على بلاطة .. مش حيحل البطالة للشباب .. و كان هو الحل
وسيظل وسيكون هو الحل ..إلا .. القطاع الخاص الوطني وغير الوطني ..
------------------------------------------------
المصدر: cbc : مع خيري رمضان
يا رب .. اللهم إني أعوذ بك من الهم والحزن .. وأعوذ بك من العجز والكسل..
وأعوذ بك من الجبن والهرم ..وأعوذ بك من البخل والقهر والفقر .. وأعوذ
بك من الجهل والمرض.. وأعوذ بك من غلبة الدين وقهر الرجال .. وأعوذ بك من
فتنة المسيخ الدجال وفتنة المحيا والممات .. وصل اللهم وبارك على سيدنا
محمد وعلى آله وصحبه وتابعيه وتابعي تابعيه ونحن معهم في الملأ الأعلى إلى
يوم الدين..آمين آمين يا رب العالمين ..
هل يُعقل هذا الكلام .. في مصر.. إن مصر كانت ترتع فعلاً في فساد ما بعده
فساد .. قال الأستاذ الجامعي المسؤول في جامعة القاهرة عن تطبيق
القانون الخاص بحرمان الطلاب الذين لم يدفعوا مصاريف الكلية من دخول
الاختبار بعد إعلانهم مرات ومرات عن ضرورة دفع المصاريف وبطرق شتى .. أن
هناك بعض "الطلاب العرب" .. كانوا يأتون لمصر للتعلم في كلية الحقوق جامعة
القاهرة .. ويأخذون السنة في سنتين وتلاتة .. ولا يدفعون المصاريف ..
وعندما حسبوا لهم قيمة المصاريف التي لم يدفعوها .. وجدوا أنها تعادل
3000 سنة .. وبالمثل عندما حسبوا المصاريف التي لم يدفعها "الطلاب
المصريون "الذين لم يدفعوا المصاريف وجدوها تعادل 4000 سنة .. وفي بعض
الحالات وصلت إلى5000 سنة.. يعني ملايين الجنيهات تضيع على مصر .. ما هذا
؟؟..
----------------------------------------------------------------------------
المصدر: الأستاذ المسؤول عن ذلك الملف بكلية الحقوق جامعة القاهرة
الحياة اليوم الإثنين 8 / 6 / 2015م
ما لي أراك .....
تتنقل بين الفراشات ..
تداعب هذه ..وتلعق تلك ..
تتجاهل النحلة ..والنحلات ..
تتباكى ..تتمادى .. تترنح ..
ألا تخاف من اللسعات ؟ ..
-------------------------------------
د.شهيرة عبد الهادي
#Drshahera_Abd_Elhady_Ibrahem
شكراً على ترسيخ ثقافة وخلق الاعتذار في مصر .. حضرتك قدوة ..
يا رب .. يا الله .. في هذه الأيام المباركات .. نبتهل إليك .. اللهم احرس
مصر بعينك التي لا تنام.. مصر التي ذكرتها في كتابك الكريم 7 مرات .. مصر
التي أمرت بمجيء العائلة المقدسة إليها .. مصر التي مر بها الأنبياء
والرسل.. مصر التي قلت عنها في كتابك الكريم " إدخلوا مصر إن شاء الله
آمنين " .. اللهم اجعل مستقبل مصر مليء بالخير .. اللهم بارك في أطفالها
وشبابها وبناتها وشيوخها ورجالها ونسائها .. اللهم احفظهم .. اللهم وفق
ولاة أمورنا لما فيه الخير والصلاح لمستقبل مصر .. وصل اللهم وبارك على
سيدنا محمد وآله وصحبه وتابعيه وتابعي تابعيه ونحن معهم في الملأ الأعلى
إلى يوم الدين .. آمين ..
من أيام قليلات .. مع دكتورة هويدا حنفي .. أثناء حضور مناقشة رسالة
ماجستير .. لإحدى طالباتنا المجتهدات .. وللزمالة حقٌ عليَّ .. لها مني
كل التحية والاحترام والمحبة .. اللهم ديم المعروف والمحبة في الله
بيننا وابعد عنا شر شياطين الإنس ..
ممكن أفضفض مع حضراتكم شوية ..لفت
نظري موضوع كده عاوز أأقول لحضراتكم عليه.. لما الفيس بيبلغني بأعياد
ميلاد أصدقائي .. واروج أكتب لهم التهنئة على صفحاتهم .. اكتشفت .. أن عدد
كبير جداً من صفحات أصدقائي .. معمولة من سنة 2011 وحضراتهم أصدقائي من
ذاك التاريخ لكن مفيش عليها أي مشاركات خالص لدرجة أن مفيش عليها إلا
التورتاية اللي بابعتها كل سنة .. وصفحات كتير جداً بردوو يبدو أنها كانت وهمية مفيش فيها حاجة خالص ..
وصفحات لقيت عليها حاجات وحشة خالص .. وصفحات منشرتش حاجة من 2012 خالص
.. وصفحات أصحابها لا يشاركون معي في أي شيء خالص لدرجة أني نسيتهم ومش
فاكراهم خالص .. وصفحات غيرت أسماءها وبردو مفيش عليها إلا الأبراج
اليومية .. وصفحات شالت صورتها الشخصية وبردو فاضية .. وصفحات كتير أوي
اتقفلت .. بأمانة أعداد كبيرة أوي وأضطريت للأسف وأنا حزينة بجد لحذف
الصداقة معها لأنهم مجرد عدد وبس .. أنا مش عارفة .. هي كانت موضة مثلاً
.. أن كل واحد يكون له صفحة ع الفيس بوك وخلاص .. يعني وجاهة اجتماعية
؟! ..
مع نسمات فجر يوم جديد على مصرنا الحبيبة .. اللهم اجعله يوم خير وبركة
على كل مصري ومصرية .. وعلى أبنائنا الطلاب في اختبارات الثانوية العامة
.. ويا رب تمم بخير على أبنائنا الطلاب والطالبات الذين يقومون بإكمال
اختباراتهم في الجامعات المصرية .. ويا رب نعيش ونشوف تطور ملحوظ في نظام
التعليم المصري .. لأنه لا خلاص لهذا البلد الحبيب من مشكلاته إلا عن
طريق الاهتمام .. بالتعليم ثم التعليم ثم التعليم ..واعتباره مشروعاً
قومياً .. لأنه هو فعلاً الأمن القومي لمصرنا الغالية .. وصل اللهم وبارك
على سيدنا محمد وآله وصحبه أجمعين ..
--------------------------------------------
د.شهيرة عبد الهادي
أيها العرب : حرروا عقولكم أولً ثم ابحثوا عن حريتكم ..
-------------------------------------------------------
قرأت في الأخبار على النت .. أنه حدثت حرب بين عشيرتين في إحدى الدول العربية مُنذ خمسة أيام .. لا يهمني إسم الدولة مع الاحترام الكامل لها .. بقدر ما يهمني المفهوم والفكرة والرمزية .. كانت هذه الحرب بين العشيرتين بالسلاح وغيره.. وأسفرت عن .. قاتل ومقتول كالعادة .. ولكي تدفع العشيرة القاتلة .. دية لأهل العشيرة المقتول منها .. أعطت لهم الدية 50 إمرأة وفتاة قاصرة ..إنهاءً للحرب بينهما .. يطلق عليها .. المرأة الفصلية أو زواج الدم "دية " .. هذا نموذج فقط .. للفكر ..للعقل .. للمنهج .. الآن في القرن الواحد والعشرين .. في بعض المناطق .. ببعض الدول العربية .. وهذا الفكر وهذه العقلية وتلك المنهجية.. حتى ولو كانت متوارثة وعادات قديمة .. منتشرة تقريباً .. في معظم الدول العربية .. مع اختلاف المسميات والرمزيات والدلالات .. ومستمرة إلى الآن .. كالتار.. والثأر ..ومفهوم الدية ونوعها .. ولا أدري إلى متى ؟؟ .. ثم يوجد لديَّ سؤال يُحيرني .. لماذا على مر التاريخ يحل بعض رجالات العرب مشكلاتهم ويفكرون في إنهائها بمثل هذا التصرف الجاهلي ؟.. هل هناك منهم فعلاً من لا يفكرون إلا بنصفهم الأسفل ؟! ..ومن العجب العجاب أن دولاً ما زالت فيها مثل هذه العقليات الجاهلية تتحدث عن تآمر جميع دول العالم ضدها .. بالله عليكم أيها العرب .. حرروا عقولكم.. حرروا فكركم .. حرروا عاداتكم ..حرروا آرائكم .. حرروا أنفسكم .. قبل أن تتحدثون عن أن هناك مؤامرات تحاك ضدكم من كل دول العالم ..أيها العرب :حرروا عقولكم أولاً ثم ابحثوا عن حرياتكم ..
------------------------------------------------
د.شهيرة عبد الهادي
#Drshahera_Abd_Elhady_Ibrahem
